Dzwan 1 - Isu New Testament

Dzə̀ ə̀ Kə̀zə̀ ə bù dòʼò wù

¹ Â mbyi ani kaʼ tsə, Dzə̀ ə̀ Kə̀zə̀ kə də̀ ŋwô. Dzə̀ ì ghè yə̀ kə də̌ nə̀ Zə̀kìy, Dzə̀ ì ghè yə̀ kə də̀ sòʼo Kəzə̀.

² Dzə̀ yə̀ kə də̌ nə̀ Zə̀kìy awò mbyi ani kaʼ tsə.

³ Zə̀kìy kə zəŋi ufyiə udzə̀m abidzəmə̀ dzə̀ ì ghè yə̀. Fyiə kə̀liy kiy way dzə kə̀mòʼ Zə̀kìy kə də kə̀ zəŋi nəway abidzəmə̀ we.

⁴ Imuə̀ yìy kə̀ ŋwò bə̀ awò Dzə̀ ì ghè yə̀, imuə̀ yə̀ kə̀ bù àghè dzə̀m nə̀ asə ə̀ zwe yiy.

⁵ Asə ə̀ zwe ghè yə̀ ə mwà nyi yə̀ an-a-ləm, ləm kiy kamə nəm maʼà kôʼ àsə ə̀ zwe a ghè yə̀.

⁶ Zə̀kìy kə twum bə̀ wè twum ə̀ we, izəd i we i də nə̀ à də̌ Dzwan.

⁷ Ù kə bù ani bù bày tyi dzày bə̂ ayiə awò aghù kwùmə̀ yə̀ nə̀ àsə ə̀ zwe a ghè yə̀, ani zəŋi tsə nə̀ aghê zuw tsə tə̀ ghu bɛmə kə ntwùm ìghà yə̀.

⁸ Dzwan kə wày dzə asə ə̀ zwə a ghà yə̀ nə̀ ùwe u we wiy, ù kə màŋ bù kə ani bày tyi dzày bə̀ àyiə awò àghè àdzə̀m kwùmə̀ yə̀ nə̀ asə ə̀ zwe a ghà yə̀.

⁹ Asə ə̀ zwe à soŋə̀ yə̀, a kə bù ani bù mwà dè bə̀ àghě mbyi nə̀ asə ə̀ zwe yiy.

¹⁰ Ù kə də anə mbyi, aghě mbyi yə̀ kə kə̀ bwoʼò kôʼ kəli nə way we, də̀ aghii nə̀ Zə̀kìy kə zəŋi mbyi yə abidzɛ̀mə̀ we.

¹¹ U bòʼ bù kə awò àghě inaʼ i we yiy, ghu twe màʼà dyaŋi yə̀ sòʼò we.

¹² A kwuni bù àghù yə̀ ghu kə ŋgwam na nəniy we, bɛmə nyə̀ yə̀ awò we, u nyə̀ tsə ghu nə̀ daʼa kiy nə̀ ghu doʼò àwa Kə̀zə̀.

¹³ Ghu way dzə anə ndòʼò ayiə yə aghee mbyi yiy kilə nəniy awa ghu yiy ate. À wày dzə anə yiə yə aghee mbyi byikə bə̂ awa ghu yiy ate. Tè ghu də Kəzə̀ nə̀ ùwe uwe wiy.

¹⁴ Dzə̀ ì ghè yə̀ kə bù dòʼò bə̀ wû, nə̀ fòŋ ìdzòŋì yə̀ ì kwoʼ kpe doʼò nəniy, nə̀ àyiə àsoŋə̀. A mə kòʼ daʼa kə we kiy nə̀ à də̀ daʼa kə ù kə kəli nəniy təə kə̀lə̀kə̀lə̀ kə Wà nə ù ŋwò bə̂ awò Təli.

¹⁵ Dzwan kə nìʼà àyiə kùmə̀ yə̀ nə̀ we, u bwoʼo kə̀bòŋ dzìy tsə nə, “A wə̀ də wù wə̀ mə kə dzìy nəniy â ghà nə̀, wù wə̀ ù namə bê nəniy abidzəmə̀ mìə̀, ù mə miə tsîy fyi, aŋwòə ù maa doʼò zìy bə̀ isə â ghu ani byi bə̀ miə.”

¹⁶ Anə Fòŋə̀ we ìdzòŋə̀ yə̀ ì kwoʼ kpe doʼò nəniy, ù mə lwì ŋgaŋ, ù tsəŋə̀ nyìə̀ bə̀ kə aghê àdzə̀m nə̀ lelê tə ulwì tìy.

¹⁷ Zə̀kiy kə ùlàŋ wìy nyiə̀ bə̀ abidzəmə̀ Musîs, a kwuni bû fòŋ we ìdzòŋə̀ yìy, nə̀ àyiə àsoŋə̀ yìy, Zə̀kìy kə nyə̀ bə̀ abidzɛ̀mə̀ Yesù Kə̀litò.

¹⁸ Wù lìy kamə kôʼkôʼ nəway Zə̀kìy. À mày kə Wa, ù də nəniy yəə Kəzə̀, ù də nəniy akə̀lə̀ təli, ù tyi dê bə̂ nəniy wù wə̀ Zə̀kìy də nəniy we awò ŋgàŋ.

Ntwum ə̀ Dzwan wə ù kə nyiə̀ nəniy mwi m-à-zə̀ mìy

¹⁹ Dzwan kə tyi dzày yə̀ wù wə̀ ù kə də nəniy we awò aghè lwàʼa yiy nə̀ àghê tuu kə Levì yə̀ ŋgəd tə aghě Dzwû tìy kə twum fyi yə̂ nəniy ghu a Yèlusalèm nə̀ ghu zû bəb yə̂ a we nə, “Wò baa də̌ ndiə?”

²⁰ Dzwan kə kə̀ ndoʼò twe nəway ani dzày yə̀ awò ghu, u kwuni dzày te fyi yə̀ a ghu nə, “À wày dzə miə wù wə̀ Zə̀kìy sûw kyili na nəniy.”

²¹ Ghu namə gbai bəbə yə̀ kə a we nə, “Wò nyìə̀ baa də̀ ndiə? À də̀ wô Èlaydzà ə̀?” Ù mee a ghu nə, “Mə way dzə Èlaydzà.” Ghu bəb yə̀ a we nə, “Wò də̌ wè ntwùm ə̀ Kə̀zə̀?” Ù mee a ghu nə, “Hǎy, mə way dzə wè ntwùm ə̀ Kə̀zə̀.”

²² Ghu baa bəb yə̀ nyìə̀ â we nə, “Wò nyìə̀ ba dě ndiə ə? Bəli bə̀ ghə̀d tə̀ ghè ə zû dzwoŋi nə̀ fə̀d kə idzwə kiy awò àghù yə̀ ghu twum bə̂ nəniy ghəd! Wò baa dzìy nə̀ìndiə kùmə̀ yə̀ nə̀ wù wə̀ wò də nəniy ə?”

²³ Dzwan bə̀lì yə̀ ghu anə ayiə yə wè ntwùm ə̀ Kə̀zə̀ Ìzayà kə niʼà nəniy nə̀, “A də̀ miə bôŋ kə̀ kə foŋə fənə bə̂ nəniy a mbvən ə̀ kə̀sisi dzìy tsə nə̀, ‘Ghà byay na tsə dzəd ì dòʼò tsə tsi tsi awò Mwe ə̀ Mbyi ani bwì ate!’”

²⁴ Aghě Falàsî àliy yiy ghu kə twum bə̂ nəniy ghu,

²⁵ ghu bəb yə̀ awò Dzwan a we nə, “Abu wò də wǎy Kə̀litò, wò də̀ wày soʼo Èlaydzà, moo wè ntwùm ə̀ Kə̀zə̀, wò kwunə nyə̀ nə̀ìndiə aghê nə̀ mwi m-à-zə̀ mìy ə?”

²⁶ Ù mee a ghu nə, “Mə maŋə̀ nyə̀ àghè nə̀ mwi m-à-zə̀ mìy, wù ù lìy kwuni də anə fwumi kəli ghà də kwu way we.

²⁷ À də we ù bè nəniy abidzəmə̀ mìə̀, mə kə̂ bôʼ kwoʼ kpe dzə̂ wày ani zè màʼà ùbaʼ u təgùw u we.”

²⁸ Ayiə yə àdzə̀m kə ghii fyi anə inaʼ i Betanì a ŋgwùŋə̀ dzwì Dzudà ìlìy yiy, Dzwan kə nyiə̀ nəniy aghê ate nə̀ mwi m-à-zə̀ mìy.

Wù wə̀ ù nìyzə̂ nəniy ayiə aghè àbɛbə yiy

²⁹ Abù tswu tswu wə, Dzwan kôʼ Yesù ù bè nəniy akə̀lə̀ we. Ù mee a ghu nə, “Ghà kôʼ Wà ndzù ə̀ Kə̀zə̀ yə̀ ì kì sûw miʼà nəniy ibɛb i aghè àdzə̀m yìy anə mbyi!

³⁰ À yù də wù wə̀ mə kə dzîy nəniy â ghà nə̀, ‘Wù wə̀ ù bè nəniy abidzəmə̀ mìə, wù wə̀ mə kə dzîy nəniy â ghà nə̀ ù mə miə tsîy fyi, aŋwòə ù maa dòʼò zìì bə̀ â miə ani bù.’

³¹ Mə kə kwu dyaŋi sòʼò way wè, mə kwunə nyiə̀ àghè nə̀ mwi m-à-zə̀ mìy ani zəŋi tsə nə̀ ghu nə̀ tyi dê bə̂ we awò aghě Islàel yìy.”

³² Dzwan fìy tòʼò tyi dzày yə̀ ŋwò a ghu nə̀, “Mə kə kòʼ yə̀ yəə Zwàykə̀zwekiy fyi tswi bə̀ an-a-byiwuŋ yəə à də̀ kəbubumə, bù ma tsə azoŋə̀ we.

³³ Mə kə kə̀ kəli dzə̂ nə̀ à də we, i kwuni də̀ kə nə̀ Zə̀kìy maa mbaŋ dzây awò mìə̀ a sòŋə fə ù kə twum bə̂ miə nə̀ mə bû nyiə̀ mwi m-à-zə̀, u dzày bə̀ â mìə̀ nə̀, ‘Wù wə̀ wò kì kòʼò nəniy Zwàykə̀zwekiy tswi bû ma doʼò tsə a zoŋə̀ we, a kiy də wù wə̀ ù kiy nyiə̀ nəniy aghê nə̀ Zwàykə̀zwekiy.’

³⁴ Anə yiə yə mə kə kôʼ nəniy ghi, à yù də̀ ighe mə tyi dzîy bə̂ nəniy nə̀ ù də Wà Kə̀zə̀.”

Tsə̀təndii tə səsə tiy ani dzwùmì Yesù

³⁵ Abù tswutswu wə Dzwan ə nam də sòʼo nə̀ tsə̀təndii tə we tə̀liy tiy ibè.

³⁶ Abù ù kòʼ yiə̂ nəniy Yesù, u ŋwò dzày fyi kə nə̀, “Kòʼo yə̀ nənìy Wà ndzù ə Kə̀zə̀ yìy!”

³⁷ Ayiə tsə̀təndii tə we tə ibè zuw tsə aghii, ghu ŋwò dzwùmì yə̀ Yesù.

³⁸ Yesù ə fə̀d bə̀ ùwee, kòʼ tsə yəə ghu dzwumə̀ bə̂ nəniy we, bəb yə̀ a ghu nə, “Ghà kghu kyiə̀ adzəmə̀ mìə̀ ə?” Ghu bə̀lì kə we nə, “A Labì, (i myiŋə̀ nəniy àtyidè), wò suki dòʼò yiə?”

³⁹ Yesù mee a ghu nə, “Bu kòʼò nənìy.” Ghu ŋwò yə̀ sòʼo adzəmə̀ we, zù kòʼ yə̀ loʼo kə ù suki doʼò nəniy ate. Ghu zəli lyili yə̀ nə̀ we awote, ghu kə ŋwò tsə kə nə̀ inyi yiy mə gaŋə.

⁴⁰ Andùlù àzə̀ ə Simùn Pità kə də wù mòʼ anə ghù yə̀ àbè ghu kə zuw yə̂ nəniy ayiə yə Dzwan kə dzây tsə nəniy, u ŋwò dzwùmì yə̀ Yesù.

⁴¹ Iyiə i səsə yiy Andùlù kə zəŋi nəniy ù kə zù kaw yə̀ àzə̀ ə̀ we Simùn dzày yə̀ a we nə, “Ghè mə kòʼ Wù wə̀ Zə̀kìy sûw kyili na.” (I myiŋə̀ nəniy Kə̀litò).

⁴² Andùlù ə nìy bù nə̀ àzə̀ we a kə̀lə̀ Yesù. Yesù ə lyay kə àzə̀ wə̀ ghii dzày yə̀ a we nə, “Wò də Simùn wà wà Dzwan, ghu nyiə̂ wò ni twoŋə nə̀ à də Sefàs,” (i myiŋə̀ nəniy nə̀ à də kəna.)

Filîp we nə̀ Nàtanìyèl ə dzwùmì yə̀ Yesù

⁴³ Abù tswutswu wə, Yesù zəŋi kə fòŋə̀ we ani zù a Galìlî, u kòʼ tsə Filîp, ù mee a we nə, “Dzwùmi bə̀ miə.”

⁴⁴ Filîp kə bvwami də̀ sòʼo wè ìnaʼ i Bètsaydà. Inaʼ yə Andùlù nə̀ Pità kə fyi nəniy ate.

⁴⁵ Filîp ə kaw yə̀ Nàtanìyèl, dzày yə̀ a we nə, “Ghè mə kòʼ wù wə̀ Musîs kə twâ na nəniy ayiə yiy kwùmə̀ yə̀ nə̀ we anə ŋwàʼà kə ulàŋ! Wù wə̀ aghee ntwùm ə̀ Kəzə̀ kə twà na soʼò nəniy ayiə kwùmə̀ yə̀ nə̀ izəd i we yiy. À də Yesù wà Yùsə̂f, wè inaʼ i Nazalèt.”

⁴⁶ Nàtanìyèl mee a we nə, “Wò taŋə nàʼà fə Nazalèt fə̀! À dəə ndzòʼò iyiə ìdzoŋə̀ ìghaa yiy i də ani fyi bə̀ a nàʼà fə Nazalèt fə̀?” Filîp ə màŋ nìy tsə kə a we nə, “bǔ kòʼo.”

⁴⁷ Ayiə yə Yesù kòʼ yə̂ nəniy Nàtanìyèl ù bè nəniy, ù mee a ghu nə, “À yù ndzə̀m də̌ wè Islàel, ù ndzə̀m kwu nəniy ayiə àsoŋə anə fôŋ.”

⁴⁸ Nàtanìyèl ə bəb yə̀ a we nə, “Wò kaʼ tsə mə̀yiə ani kəli miə ə?” Yesù mee a we nə, “Awò Filîp ani bù twoŋə bə̀ wò, mə mâ kòʼ wô nə̀ wò nam tiy a təŋə kàʼ fə fîk.”

⁴⁹ Nàtanìyèl ə dyaŋi dzày yə̀ a we nə, “À tyi dè, wò ndzə̀m də Wà ə̀ Kə̀zə̀, à də wô dòŋ kə Islàel kìy.”

⁵⁰ Yesù ə bəb yə̀ a we nə, “Wò ghî bɛmə kə ayiə yə mə dzìy nə̀ mə mə̀ kòʼ wò a təŋə kàʼ fə fîk. Wò ki kòʼò tsìy fyiə ŋwò kwab tə ayiə tiy tə tsìy fyi nəniy ì yuu.”

⁵¹ U kàm dzày fwuli yə̀ a we nə, “Mə ndzəmə̀ dzìy bə̀ ayiə àsoŋə̀ â wò nə̀, wò nì kòʼo ŋwò Vələ kiy kə fwi tsə nəniy, wò kî kòʼ tsə̀təndii t-a-zə̀ tìy ki bwîy kwoʼo bwìy tswi azoŋə̀ Wà Wù.”