Dzûd 1 - Isu New Testament

¹ À ŋwàʼà kə̀ twà mìə̀ Dzûd, wè kə̀fàʼ ə Yesù Kə̀litò. Mə də sòʼo àzə̀ Dzɛ̂m. Mə twâ bə̀ awò ghà, gha yə Zə̀kìy sây kə nəniy gha nə̀ ghà doʼò aghè ighe. Tè ŋgàŋ, Kə̀zə̀ ù liə gha nyə̀ na yə̀ ghà awò Yesù. Yesù Kə̀litò kyìŋə̀ soʼò nəniy gha.

² Mə gwùŋə̀ nə̀ Zə̀kìy ŋge kwoʼ nə̀ mwuli kiy azoŋə̀ ghà, ù nyiə̀ ghà nə̀ ìbvay yiy, ù dè sòʼò ghà nə̀ ìliə ìsoŋə̀ yìy.

Dzûd ə tswù yə̀ àghě Kəzə̀

³ Awizə̂ yam àsoŋə̀ yìy, mùmùŋə̀ tìy kə ŋge kwoʼo ŋwò miə ani twà bə̀ ŋwàʼà kə̀ â ghà kwùmə̀ yə̀ nə̀ àyiə yə Zə̀kìy bii fyi dzə̂ nəniy ŋgaŋ abidzəmə̀ Yesù Kə̀litò. Mə kôʼ tsə nə̀ idzwabə̀ ŋwò â mìə̀ ani twà bə̀ ŋwàʼà kə̀ awò ghà, ani kwe bə̀ fòŋ təli ani zəŋi tsə nə̀ ghà də̂m tsə ani təmi taw tsə anə iyiə ìsoŋə̀ yə̀ ŋgà bɛmə nəniy, Zə̀kìy kə nyiə̀ bə̂ nəniy awò ŋgàŋ, ŋgaŋ yə ŋgà də nəniy aghee we yiy. Ntwùm ì ghè yə̀ nì kwuni kòʼ dzə̀ wày.

⁴ Mə twâ bə̀ ayiə yə â ghà aŋwòə aghê àliy yiy ghu nɛbə nəniy aghû yìy dzìy nə̀ ghu mə bɛmə awò Zə̀kìy, ghu mə bù nyad nyi anə dzəŋə kəli nə̀ ghà ə kə̀ kəli nəway. Ghu tyi dè nəniy ayiə àguw yiy, nə̀ yəə Zə̀kìy dê dzə̂ nəniy fòŋə̀ we ìdzòŋə̀ yìy, aghê də ŋwô ani zəŋi ayiə àlyaŋə yiy. Ghu twe mìʼà sòʼò Yesù Kə̀litò wə̀ ù də nəniy Mwe awò ŋgàŋ, də̀ sòʼò mwe ə̀ mbyi ŋgàŋ. Ghu də dzòʼò àghù yə̀ Zə̀kìy kə kwu dzây na nəniy anə ŋwàʼà k-a-zə̀ nə̀ ghe nî nyìə̀ ghu nə̀ mfə̀m.

⁵ Mə dziy zəŋì bə̂ ghà anə iyiə yə ghà boʼò kwu nəniy nə̀, Zə̀kə̀ kə kə fây nəniy awa Islàel yìy anə sòŋə fə ghu kə tee ŋwô fyiə bə̂ anə inaʼ Idzìp, à də̀ we ù kə bû wiy màʼà tsə aghû yə̀ ghu kə də kə̀ bɛmə nəway awò we.

⁶ Ghà myìŋi tsə sòʼò tsə̀təndii t-a-zə̀ tə̀, Zə̀kìy kə nyiə nəniy ghu nə̀ ùbwòʼ u ufàʼ wìy an-a-vələ, ghu ŋwò nyəli màʼà tsə loʼo tə ghu kə kwu ani də ate an-a-vələ. Zə̀kìy nìy kwi kwù na tsə ghu anə ntsaʼ tə tə doʼò təŋ nəniy, nìy kə ghu na yə̀ ghu anə lòʼo k-a-ləm. Ghu də awote lyimə yə̀ ntsuk fə̀soŋə̀ fə̀, Zə̀kìy nî saʼa wiy nəniy ghu ate.

⁷ Ghà môʼ tsə soʼò fyiə kə kə kə fyi nəniy azoŋə̀ àghě Sodòm yìy nə̀ àghě Gòmolà yìy nə̀ azoŋə̀ nàʼà tə̀ tə kə kwulì də nəniy awote aghê ghu yiy kə zəŋə tsə nəniy ayiə kəlyaŋi yiy. Lyaŋi kə ghu kiy kə zwùnə̀ dyaŋə ŋwò, iŋə̀mə̀ ə nìŋə̀ kwùnə̀ nə̀ iŋə̀mə̀, iyəŋi nìŋə̀ kwùnə̀ sòʼò nə̀ iyəŋi. Zə̀kìy byɛbi màʼà ghu anə uvə̀lə̀ wə̀ u byaʼa anə nsòŋə indzə̀m ani dè tsə kətsəe nə̀ Zə̀kìy nî nyìə̀ àghù yə̀ ghu zəŋə nəniy ayiə àbɛbə yiy nə̀ mfəm anə uvə̀lə̀ wə̀ u doʼo təŋ nəniy.

⁸ Aghû yə̀ ghu nyad nyi bə̂ nəniy anə uzə ghii, ghu bvami zəŋi sòʼò ndzòʼò àyiə bɛbə ghè yə̀. Ghu kyilə mə̀ndzèmə, in zəŋə nə̀ ghu zəŋi ayiə àbɛbə yiy anə iwè i ghu aŋwòə ghu zəŋə yə̀ ayiə yə ghu kôʼ nəniy anə udzɛ̀mə̀. Ghu koʼò kè daʼa k-a-zə̀, nyàʼà sòʼò tsə̀təndii t-a-zə̀ tə̀ dzoŋə̀ tə̀ tə mwâ dzwâbə̀ nəniy.

⁹ Maykèl wə̀ ù kə boʼò də kə nəniy tsə̀ndii ù nè wìy anə tsə̀təndii t-a-zə̀, ù kə kə̀ kwuni môʼ dzə̂ ani nyàʼì àmbvə̂ntsə anə sòŋə fə ù kə zwaʼà nəniy nə̀ àmbvə̂ntsə kwùmə̀ yə̀ nə̀ ìvəən i Musîs yìy. Maykèl kə kə̀ nyaʼì dzə̂ nəway we. Ù kə dzày yə̀ kə a we nə, “Mwe ə̀ mbyi kî kwà ŋwò wô.”

¹⁰ Aghû yə̀ ghu nyad nyi bə̂ anə uzə ghəli nə̀ ghu zuw way awò Zə̀kìy, ghu kwuni nyàʼà àyiə yə ghu də kə̀ zuw kəli nəway. Ghu də yəə à də̀ nyâm tə mbvən tə tə zəŋə nəniy ayiə yiy nə̀ ghu moʼò tsə dzə̀ wày. Ayiə yə ghu zəŋə, à də̀ ayiə yə a nî zəŋə nə̀ Zə̀kìy nyiə̀ ghu nə̀ mfəm anə uvə̀lə̀.

¹¹ Zə̀kìy nî nyìə̀ ŋwò ghu nə̀ mfəm aŋwòə ghu bvami dzwùmì wuu kə Kên anə ayiə àbɛbə yə ghu zəŋə nəniy. Dzùmə̀ sòʼò wuu kə Balàm anə ayiə yə ghu kwu nəniy isə yiy anə ukhiy. Ghu mə twe ani zuw awò Zə̀kìy anə yiə yə Kolà kə də zuw sòʼò wày awò Zə̀kìy. Zə̀kìy kî byebə myàʼà ŋwò ghu anə yiə yə ù kə byebi màʼà Kolà ate.

¹² Abu aghû yə̀ də nə̀ ghà anə sòŋə fə̀ ghà nyiə nəniy mfànyiə mə ìn təmə nia dzəŋə bə̂ gha, ghu də̀ yəə à də̀ una ùbɛbə wə u də nəniy a təŋə dzwî. Ghu maŋə̀ bè kə ani bù nyi nə̀ ghà, bòʼò kwu way utuw ùdələ wiy. Ghu də yəə à də̌ nə̀ nə̀ àbàʼàtə̀ndzù yə̀ ghu də nia way isə yiy anə təndzù. Ghu də yəə à də̌ mbàʼ tə iwe tə ŋgwùŋì kìy tyiŋi ŋwô nəniy iwe yiy doʼò yə̂ kə̀ niə̀. Ghu də yəə à də̌ ŋkàʼ mə̀ ùtam mə ìn də kwu way utam wiy anə sòŋə fə utam. Ghu də̀ sòʼò yəə à də̌ ŋkàʼ mə̀ ghu zɛ̂b ŋwò fyi kə nəniy anə aghàŋə nə̀ ìn zwum ŋwô.

¹³ Ghu bvami də̀ kə yəə mbuw kə dzwî kǐy nə̀ təŋə miʼà fyiə kə nəniy udzə wiy idoŋ anə iŋgwùŋə i dzwî nə̀ ntsəbə tiy ate. Ntsəb tə tə də nəniy yəə à də̀ ayiə à dələ kətuw yə ghu zəŋə nəniy. Ghu də yəə à də̌ nsǐbə̂d mə̀ ìm màŋə̀ làʼà bwìy tsə̂, nə̀ ìn wày dzə anə loʼo tə Zə̀kìy kə na nəniy ghu ate. Zə̀kìy mə kaw na loʼo k-a-ləm kiy ani na ghu awote anə nsòŋi ndzə̀m.

¹⁴ Enòk kə zəŋə yə̀ àghè sèmbe anə tu kə Adàm. Enòk kə kwu dzày na zìì bə̀ àyiə kwùmə̀ bə̀ nə̀ àghù yə̀ nə̀, “Ghà kəli tsə nə̀, Mwe ə̀ mbyi nî bè nə̀ tsə̀təndii tə we tə̀ zwe tiy yəə anə taŋ fyi kə anə ndə̀mə̀ tə̀kaam,

¹⁵ ani bù saʼ aghê dzə̀m. Ù nì nyìə̀ mfəm awò àghù yə̀ àdzə̀m ghu də kə̀ bɛmə nəway Zə̀kìy, ghu tsəŋə̀ zəŋə soʼò ayiə àbɛbə yiy. Ù nì nyìə̀ sòʼò ŋwòə mfəm awò àghù yə̀ ghu zəŋi kôʼ dzə̂ àyiə àbɛbə yiy, ghu dzây kòʼ soʼò àyiə abɛbə yiy anə tuw kə we.”

¹⁶ Aghû yə̀ mə twâ dzìy bə̂ ayiə ghu yiy awò ghà, ghu taw ŋwuŋə dzə̀ŋə̀ tsə̀ àghè àliy yiy, bà sòʼò ani dzày nə̀ aghê àliy yiy mə zəŋi bɛb. Ghu taw zəŋə àyiə àbɛbə yə fôŋ tə ghu tìy liə nə̀ ghu zəŋi, ghu bâ ani kwiʼi iwe i ghu, niyoŋə dzə̀ŋə̀ sòʼò ani kəli fyiə kə ghu liə nəniy.

Ayiə yə aghee Kəzə̀ yìy kwu ani mùə̀ ate

¹⁷ Awizə̂, ghà môʼ bə̂ àyiə yə aghee ntwùm ə̀ Mwe ə̀ mbyi ə̀ ŋgàŋ, Yesù Kə̀litò kə kwu dzày na nəniy awò ghà nə̀ a kwu ani bù fyi.

¹⁸ Ghu kə dzày na awò ghà nə̀, “Ani bu ntsukə mə ìbàmə̀, aghê liy yiy ghu zəŋə nəniy ayiə yə fôŋ tə ghu tiy liə, ghu ni tsoʼ gha.”

¹⁹ Aghee ghè yə̀ à də̀ aghû yə̀ ghu zəŋə nəniy nə̀ aghe Kəzə̀ yìy dzàw doʼò. Ghu moʼò təŋə kə ayiə mbyi anə fòŋ tə ghu, Zwàykə̀zwekiy də wày soʼo azoŋə̀ ghu.

²⁰ Akwuni bû gha awizə̂ yam àsoŋə̀ yìy, ghà kwu ani fiiy yə iwee nəli yiy ani zəŋi tsə nə̀ ibɛmə ghii yiy taw doʼò tsə anə ntwùm ə̀ ìsòŋə̀ yə̀ Zə̀kìy nyiə̀ nəniy awò ghà. Ghà ki gwuŋə yə̂ anə daʼa kə Zwàykə̀zwekiy.

²¹ Anə yiə yə ghà lyimə nəniy Mwe ə̀ mbyi ŋgàŋ Yesù Kə̀litò nə̀ ù nyə̀ ghà nə̀ ìmùə̀ itsà yìy anə mwùli kə we kə̀kwoʼo kiy, ghà ki muə, ndzə̀m kwu nə̀ Zə̀kìy liə ŋwô gha.

²² Ghà kwoʼ tsə nə̀ mwuli kiy, ghà fây kə aghû yə̀ ibɛmə i ghu yiy də taw way.

²³ Ghà fây kə aghû yə̀ ghu də kàm kwu way ibɛmə yiy awò Zə̀kìy, à ki də nə̀ gha mə zè ŋwò fyi bə̌ ghu anə uvə̀lə̀. Aghê liy yiy nam də̀ fəli ŋwô ghà kwu nəniy ani kaw tsə dzəd ani fày sòʼò ghu. Ayiə àbɛbə àdzəə yə ghu zəŋə nəniy, a mə zəŋi ghu nə̀ ghu doʼò yəə à də̀ aghû yə̀ ghu dzəŋì kəli nəniy ndzwu tə̀ dzəə tiy anə iwè. Ghà kwuni kwu ani nìy tsə iyemì nə̀, ghu kə sê ŋwò dzə̀ gha awò Zə̀kìy. Ghà kwu ani yèmì yəə à də̌ wù wə̀ ù də liə way ani mwàm ndzwu tə ghu tə̀ dzəə tə.

Dzûd ə nyiə̀ ùkali awò Zə̀kìy

²⁴ Ukali wiy də anə izəd i wû wə̀ ù zəŋə nə̀ ghà kə bvə̀ dzə̀ anə ibɛb, zəŋə sòʼò ghà, ghà də kwu way gə̂ŋ kə udzə kiy anə iwè, zəŋə sòʼò nə̀ ghà ki səaŋə anə sə kə we kə̀ mwaa kiy.

²⁵ Mə gwùŋə̀ nə̀ Mwe ə̀ mbyi ə ŋgàŋ, Yesù Kə̀litò zəŋi tsə nə̀ aghê nyiə̀ ùkali, nə̀ ŋkwiʼi miy awò Zə̀ kə̀ kə bii fyi nəniy ŋgaŋ, ù kə kwu kədaʼa ani saʼ, ù kə kwu sòʼò kədaʼa tsìy fyi ufyiə udzə̀m â mbyi ani kaʼ tsə, ù nam kwu soʼo nyiə, nə̀ anə nsòŋə indzə̀m. I doʼò kə ghii.