1 Timotì 1 - Isu New Testament

Pôl ə toŋə zuw yə̀ Timotì

¹ À ŋwàʼà kə̀ twà bə̀ mìə̀ Pôl. Zə̀kə ŋgàŋ kə̀ kə bii fyiə nəniy ŋgaŋ, kə mə nyə̀ miə nə̀ daʼa kiy nə̀ mə doʼò wè ntwùm ə̀ Yesù Kə̀litò, ù də̀ nəniy wù wə̀ ŋgà gaʼ na fôŋ tə ŋgàŋ tìy azoŋə̀ we.

² Mə twâ yə̀ awò Timotì, wa nam ùsòŋə̀ wìy, ù bɛmə nəniy Zə̀kìy. Mə gwùŋə̀ nə̀ tè ŋgàŋ, Kə̀zə̀ we nə̀ Yesù Kə̀litò Mwe ə̀ Mbyi ə̀ ŋgàŋ, ghu dê wò nə̀ fòŋ ìdzòŋə̀ yìy, ghu dê soʼò wò nə̀ mwuli kə̀kwoʼo kiy, ghu nyiə̀ soʼò wə̀ nə̀ ìbvay yiy.

Pôl ə dzày yə̀ nə̀ Timotì kə bɛmə na dzə̀ ityidè ìguw yiy

³ Yəə mə kə zê nəniy a mbwòʼ ə̀ Màsèdonìyà, mə tsə̀ŋə̀ dzìy kə nə̀ wò doʼò tsə kə a Efesùs tə̀ wò twe na yə̂ àghû yə̀ ghu tyi dê nəniy ntwùm yə i də wǎy ìsòŋə̀ yìy.

⁴ Wò dzây yə̂ â ghu nə̀ ghu bwi na ani nyàb soŋə fə ghu ani dzày nzə̀zə̌ mə̀ liʼà mìy kwùmə̀ yə̀ nə̀ ndə̀mə̀ àzəd ə nə̀ tě ghu asəsə yə ghu tyoŋə. Ayiə ghè yə̀ zəŋə nə̀ aghê ki zwaʼa anə iwè, a fîy dzə̀ wày ghu nə̀ ghu fâʼ fàʼ kə̀ Zə̀kìy liə anə ibɛmə yə ghu kwu.

⁵ Wò kwu ani tyi dè yə̀ awò àghù yìy yəə ghu kwu ani kəli tsə iliə ìdzoŋə̀ yìy i ŋwô bə̂ nəniy anə fòŋ tə̀ zwe tiy, nə̀ fòŋ tə̀ dzoŋə̀ tìy, ghu kəli tsə soʼò ìbɛmə ìsoŋə̀ yìy.

⁶ Aghê liy yiy mə twe màʼà ani dzwùmì ityi dè ìsoŋə̀ yə̀, i mə zəŋi nə̀ ghu kaʼ yə̂ ani nyàb fə̀ soŋə ani dzày ayiə yə a də kwu way fàʼ kìy.

⁷ Ghu liə ani dòʼò tsə aghû yə̀ ghu tyi dê nəniy ulâŋ u Kəzə̀ wìy. Ghu kwuni zuw kyilə dyaŋə way ayiə yə ghu dzîy fyiə bə̂ anə adzwə ghu. Ghu maŋə̀ mòʼò kə nə̀ ghu dzîy àyiə yə a də nəniy àsoŋə̀ yìy.

⁸ Ŋgà kwu ŋwô nə̀ ulâŋ u Kəzə̀ wìy dzwâbə̀ ŋwò abu wù fàʼà yə̂ anə ayiə yə ù mə̀ kwu nəniy ani fàʼ ate.

⁹ Ŋgà kwu sòʼò ŋwô nə̀ Zə̀kǐy kə̀ zəŋi na dzə̂ ùlâŋ wìy awò àghù yə̀ ghu zəŋə nəniy ayiə yə a də nəniy tsitsi. Ù kə kwuni zəŋi na awò àghù yə̀ ghu zaʼa nəniy ulâŋ wìy, nə̀ àghè ŋwunə, nə̀ àghù yə̀ ghu də fwùlə̀ wày we. Ù kə̀ zəŋi na soʼò awò àghè àbɛbə yiy. U də sòʼò awò àghù yə̀ ghu wiy nəniy aghû yìy, nə̀ àghù yə̀ ghu wiy nə̀ təli ghu, nə̀ nə̀ zəə ghu yiy, wiy sòʼò àghè àliy.

¹⁰ Zə̀kìy zəŋi na sòʼò ùlàŋ awò àghè lyaŋə yiy, nə̀ awò iŋə̀mə̀ yə̀ ghu niŋə̀ kwunə̀ nə̀ iŋə̀mə̀ àliy yiy. Ù zəŋi na sòʼò awò àghù yə̀ ghu kwi kə aghê liy yiy ghu zù na yə̀ ghu nə̀ à də̀ ukwə̂d, nə̀ awò aghè àguw yiy. Ù zəŋi na sòʼò awò àghù yə̀ ghu ndzəmə̀ kà kə nə̀ ghu kî dzìy bə̀ ŋwò àyiə àsoŋə̀ yìy, ghu fə̀d dzày bə̀ àyiə àguw yiy. Ù zəŋi na sòʼò awò àghù yə̀ ghu zəŋə nəniy ayiə àbɛbə àliy yiy. Ndzòʼò àyiə yə a kwu nəniy kwuni kiy nə̀ à yiə yə Zə̀kìy tyi dê nəniy awò ŋgàŋ.

¹¹ Ityi dè i ghè yə̀ də̀ ighəd nə̀ ntwum yə Zə̀kìy kə nyiə̀ bə̂ â mìə̀ nə̀ mə naʼà yə̂. Ntwùmə̀ ìdzòŋə̀ yə̀ ŋwò bə̀ awò Zə̀kìy, wù wə̀ ù də nəniy wù ùsoŋə̀ wìy, də̀ sòʼò wù ù dzòŋə̀ wìy.

Pôl ə nyiə̀ zòŋə kə Kə̀litò anə daʼa kə ù kə nyiə̀ â we

¹² Mə nyiə̀ kə̀zòŋə̀ awò Mwe mbyi ŋgàŋ Yesù Kə̀litò, ù nyə̀ nəniy miə nə̀ daʼakiy ani fàʼ fàʼ kə̀ mə fâʼ nəniy. Mə nyiə̀ kə̀zòŋə̀ â we anə yiə yə ù kòʼ tsə nə̀ mə kpe ŋwô ani fàʼ, ù sày kə nəniy miə nə̀ mə fâʼ awò we.

¹³ Səsə mə kə bòʼò dzìy tsə àyiə àbɛbə yiy kwùmə̀ yə̀ nə̀ we, nyàʼà sòʼò we. Mə bà tsə̀ sòʼò ani nyə̀ ùtswə̀d awò àghě we. Zə̀kǐy kwuni dè mìə̀ nə̀ mwuli kə̀ kwoʼo kiy aŋwòə mə kə kwu dzə̀ way ibɛmə yiy, kwu sòʼo way ayiə yə mə zəŋə.

¹⁴ Mwe ə̀ mbyi ə̀ ŋgàŋ, maa ŋge dè sòʼò miə nə̀ fòŋə we ìdzòŋə̀ yìy. Ù maa zəŋi nə̀ mə̀ bɛmə kə â we, zəŋi sòʼò nə̀ mə kəli tsə iliə azoŋə̀ àghè liy yə ŋgà dzəŋi də anə fyiə kəmòʼ nə̀ ghu nə̀ Kə̀litò. Ndzòʼò àyiə yə a fyiə nə̀ ŋgàŋ abu ŋgà təm doʼò fwumi anə fyiə kəmòʼ nə̀ Yesù Kə̀litò.

¹⁵ Ani dzày tsə nə̀, “Yesù Kə̀litò kə bù fə anə mbyi ani bù bii fyi aghê bɛbə yiy” à ndzə̀m də̀ ayiə àsoŋə̀ yìy wù də nəniy ani gaʼ na fòŋ ate. Mə kə də̌ wù ù bɛbə wìy mə kə bɛb tsîy fyi nəniy aghê dzə̀m.

¹⁶ Zə̀kǐy kwuni kəli tsə mwuli kə̀kwoʼo kiy azoŋə̀ mìə̀, zəŋi tsə nə̀ Yesù Kə̀litò dè bè yəə ù kwè nəniy fòŋ ate azoŋə̀ mìə̀, nə̀ mə də̀ wù wə̀ ù fàʼà nəniy ayiə àbɛbə yiy tsìy fyi aghê dzə̀m. Ù kə ghii zəŋi nə̀ mə doʼò tsə kətsəe â àghù yə̀ ghu kî byemə kə nəniy ibàm, ghu kəli tsə soʼò ìmùə̀ itsà.

¹⁷ Mə gwuŋə̀ nə̀ ghà ki tsəŋə nyiə̀ yə kə ŋkwiʼi miy nə̀ ùkali wiy awò Zə̀kə̀ kə mùə̀ doʼò təŋ, ù də nəniy dòŋ kə itsà kə̀ a də wày dzə ani kòʼ, ù də pfə kòʼò wày. I doʼò kə ghii.

¹⁸ A wa nam Timotì, à yù də̀ itswû mə nyiə̀ bə̂ nəniy â wò. Mə dziy nə̀ wò myiŋì tsə ayiə yə aghee ntwumə Kəzə̀ kə̀ kwuu dzây nəniy nə̀ a nî fyiə ŋwòə àsoŋə̀ yìy â wò. Wò kwu ani nìy yə̀ àyiə yə ghu kə dzây yəə à də ufyiə u tsam ani zəŋi tsə nə̀ wò ki də ani ŋwày dzwàb nə̀ àghù yə̀ ghu tyi dê nəniy ntwùm ə̀ ìguw yìy.

¹⁹ Təmi tsə kə ani ibɛmə yə wò kwu awò Zə̀kìy, wò ki tsəŋə zəŋə yə kə ayiə yə wò kwu nə̀ a də àdzoŋə̀ yìy. Aghee liy mə kəli iyiə yə i də nəniy tsitsi, kwuni twe màʼà ani zəŋi ayiə ghè yə̀. I mə zəŋi nə̀ ghu kə kâm kəli sòʼò ìbɛmə yiy azoŋə̀ Kə̀litò. Ghu kə də̀ aghû yə̀ ghu kə bɛmə nəniy awò Zə̀kìy, ghu nyiə̀ kàm də̀ yəə à də̀ kəmfə̀n kə zû zàʼ nəniy uwe wiy anə una.

²⁰ Aghû yə̀ àbè ghu ndyimə yə̂ ìwe yiy anə ityi dè ìguw yə, à də̌ Hìmenùs nə̀ Àlèzandà. Mə mə̀ liə ani zəŋi tsə nə̀ Satàn kəli tsə kədaʼa azoŋə̀ ghu, tə̀ ghu kəli tsə nə̀ i dzwabə̀ dzə̀ wày ani dzày ayiə guw yiy azoŋə̀ Kə̀zə̀.