DAA'AANGW 1 - Biblía Axweesantá Hhohho' ar Mungú 2004

¹ Kaangwí a Daa'ángw úr oo sla'aari oo Solomon.

Daa'ángw geera Dasír ta duxuuti

² Kuúng, afkoge aníng na ma'aasáng! Asma sla'aarirók i tsú' ta difaáiro.

³ Mooyángw di/tók tidár slikiingw naa tláy, Umuuwók a adór mooyángw taa tsipipi'iís, an gár /ameena kuúng us sla'.

⁴ Aníng ar tlawáng, góh ar gaanslaay, Waawutmo aníng iga dahaás baraá do'ós, Atén kuúng uri saqwalaala/aán nee uri sa bara/aán, sla'aarirók kari alki/itaán tam difaái ba/a. /Ameena kuúng uwa sla' i hariín.

⁵ Aá /ameenár Yerusalemu, aníng ti ló'wa boó/ ala ti hhoohhoó'. Ti hhoohhoó' adór heemadaá Kedari, adór inqwaruú Solomon.

⁶ Aníng mi i qaytsimiitara' asma tiwa boó/, asma án tina boo/eés nee tsee/amá. Hhaee'eé' awa daaqaay ina i buhhiyé', Iri xuumusmoó qaymór sabiíbuú wa qaasiyé'. Ala qaymo te'eé' ar kilá' aga xuumiiká.

⁷ Aá sla'aarusmooeé' oo muuná, áx axweesáng, amór bee/aangók kway tles a amá? Dír tlaatla/ango kway tlahhas a diimá? Ahaá asma aníng ma har adór heé tawo hi'iimiít, dír bihhaá bee/ángw mulqeeroge?

Garmoó duuxuxuúm

⁸ Aá sla'aarusó'o, kiíngadá' hhoohhoo' baraá /ameenaaro, amo bar xu'uká, loohi ooheek, ya/atír bee/aangw eehareek. Aaraawók de'eemeek bihhaá heemadaá de'eemuusér wa alé.

⁹ Aá sla'aaruso'or'eé', kiíng a slaqás nee faraásír yaqaamba ar gaardaá Farao uuruxuum.

¹⁰ Tlaaqarmaawók ki hhohho' as parooti, Nee istók ka hhoohhoo' as himtuú taa tleéhh ar tla/aá tlaxo gawden.

¹¹ Ala atén kiíng i parootuusaán ar himtuú sahaábu kudá' taa qaalín ar muqslár peésa.

Dasír ta duxuuti

¹² Qoomár waawutmo iwa iwiít gawaá kitaangós kudá' bununuúq Mooyangw'eé' kuduú nárdo nina tláy.

¹³ Sla'aarusmooeé' gawaá da/ewaaeene a adór tlakoó manemánér koóm dir'eene.

¹⁴ Sla'aarusmooeé' a adór /ayór /ayuumiis, ar mooyángw tsuú' koom, tidár baraá qamaá sabiíbu kudaá baraá Engedi.

Garmoó duuxuxuúm

¹⁵ Aá sla'aaruso'or'eé', kiíng ti ló'wa hhoohhoó', ti ló'wa hhoohhoó', ilaawók a adór kuqaá hhooki.

Dasír ta duxuuti

¹⁶ Sla'aarusmooeé', kuúng tu ló'wa hhoohhoó', kuúng tu ló'wa hhoohhoó'. Qatanirén a gitsór hiririi'.

¹⁷ Uheemaá doorén a sahhta, nee xaa'aá ta bay beroóshi an hhaftá doorén.