Mark 1 - Iñupiatun Mumiksat Uqalugiksuat

Alġaqsruiñiŋa John Paptaiqsim

¹ Uvva tusaayugaaġiksuat aullaqisaaŋat Jesus Christ-kun, Iġñiŋagun God-im.

² God-im uqaqtaa Isaiah aglaŋaruq taavrumuuna aglakamigich God-im uqaluŋi inna, “Uvva kivgaġa, tiliñiaġiga sivuŋni itqanaiyautitqulugu tikiññiksran.

³ Iñuk imma alġaqsruiruq nipatuvluni nunagluktuami, Ataniq qaiyasiruq. Apqutiksriuqsiuŋ sivukkiksiḷugich.”

⁴ Tavraasii John Paptaiqsi iñukpalliŋaruq nunagluktuami, alġaqsruivḷuni iñuich paptaiqsautquvlugich isumalitqiqqaaġlutiŋ piḷuunmiŋniñ, God-mun suliqutigiŋaiqulugich itqaumayumiñaiġḷugich piḷuutitiŋ.

⁵ Tavra iñuich ullaaŋagaat iluqaiññiñ nunaŋiñiñ Judea-m, Jerusalem-miḷḷu, aasii paptaiqsiłłutiŋ ilaanun kuuŋani Jordan, quliaqtuqługich piḷuutitiŋ God-mun.

⁶ Tavra John annuġaaqaŋaruq pikukturuam kakaktim amianik, tavsiqaqłuniḷu qisiŋmik, suli niqiqaqłuni nuttagayuŋnik qupilġunik, honey-miglu paqinnaqtuamik nunagluktuami.

⁷ Suli alġaqsruiŋaruq uqaqłuni, Imma qairuaqaqtuq aqupkun sapiġñałhaaqtuamik uvamniñ, siŋiqsuutiŋik aluġutikisa nalliummatiŋitchuŋa putchumiñaġluŋa siŋiiyaġuglugu.

⁸ Uvaŋa paptaiġivsi imiġmik, aglaan ilaan iḷiñiaġaa Ilitqusiġiksuaq iḷuvsiññun.

Paptaiqsauniŋa Ikł̣igutchaktinniaġusiaŋalu Jesus

⁹ Taipkunani uvluni, Jesus qaiŋaruq iniqpaŋmiñ Nazareth-miñ, Galilee-miittuamiñ, aasii paptaiqsiłłuni John-mun kuuŋmi Jordan-mi.

¹⁰ Tavra tavrauvvaa qakikami immamiñ, Jesus tautuŋagaa qiḷak aŋmaqtuaq, suli Ilitqusiġiksuaq tiŋmiatun atqaqtuaq inmiñun.

¹¹ Tavra tusaaŋagaa nipi qiḷaŋmiñ, Ilivich piviuttaġivlutin Iġñiġigikpiñ, iviġaummatigilluataġikpiñ.

¹² Tavra tavrauvvaa Ilitqusiġiksuam aullautiŋagaa nunagluktuamun.

¹³ Tavra Jesus nunagluktuamiinŋaruq malġukipiani uvluni. Aasii Satan-gum ikł̣igutchaktinniaŋagaa. Iqsiñaqtuat niġrutit tavraniinŋammiut, aasii isaġulgich qaivḷutiŋ ikayuŋagaat Jesus.

Jesus Ququaġai Sisamat Iqaluŋniaqtit

¹⁴ Tavra John tigutaaqtauganiŋman, Jesus Galilee-muŋaruq alġaqsruivḷuni tusaayugaaġiksuanik God-miñ,

¹⁵ uqaqłuni, Piviksraq nalautittuq, God-im atanniqsimasaaqsigai iñuich. Isumalitqigitchi. Ukpiġisiuŋ tusaayugaaġiksuaq.

¹⁶ Tavra Jesus pisuaġniallaġmi siñiqsraqługu tasia Galilee-m, tautuŋagaa Simon Andrew-lu aniqataa kuvriqsuak tatchimun, iqalugniaqtauvlutik.

¹⁷ Tavra Jesus uqallautiŋagik, Maliktinŋa. Iqalugniaġusiptiktun, iḷisautiniaġiptik iñunnagniaġniġmik.

¹⁸ Tavra tavrauvvaa qimaŋagaik kuvratik, aasii malikługu.

¹⁹ Ayuuġuraanilgiññami tavraŋŋa, tautuŋagik aniqatigiik James-lu, John-lu, iġñiŋik Zebedee-m, umiaqpauramiinniqsuat aapariglu, allaiyaqługich kuvratik.

²⁰ Tavra tautupqaqamigik ququaŋagik, aasii iliŋikta qimakługu aapariŋ Zebedee umiaqpauramun tuvaaqatiqaqługu akiññagniaqtuanik kivganik, maliŋagaak Jesus.

Iñuk Ilitqusiqł̣ulik

²¹ Tavra Capernaum-muŋarut. Aasii tavrauvva Jew-guruat Savairvianni, Jesus aŋaiyyuliaŋaruq, aasii iḷisaurrivḷuni.

²² Tavra iñuich kamasuŋarut iḷisaurrutiŋigun, qanuq ilaan iḷisaurrutiŋi kamanaŋarut. Iḷisaurriŋaitchuq pitquranik iḷisaurritun.

²³ Tavra aŋaiyyuviŋmiinŋaruq iñuk ilitqusiqł̣uqaqtuaq, aasii nipaalaŋaruq,

²⁴ uqaqłuni, Jesus Nazareth-miu, summan iḷaksiavisigut? Uvaniitpich suksraunġiġukłuta? Iḷisimagiga kiutilaan. Ilivich piḷuutaitchuaq God-im pia.

²⁵ Tavra Jesus suaŋagaa uqaqłuni, Nipaisaaġiñ. Anniiñ ilaaniñ.

²⁶ Tavra ilitqusiqł̣uum uuliksipkasugruŋagaa suli nipaalavluni aniŋaruq ilaaniñ.

²⁷ Tavra iluqaġmiŋ kamanniuŋarut, kamasukpaił̣ł̣utiŋ apiqsruqtuutiŋarut ilimiŋnun, Sunauna? Nutauruaq iḷisaurrun? Ataniġnaqutiqaqłuni piraksriḷḷagai ilitqusiqł̣uich, aasii ilaisa kamagillavlugu.

²⁸ Tavra Jesus tusaaŋagaat aliuġnaġniŋa uqaluk siamiłłuni qilamik sumulliqaa nunaaqqiñun Galilee-mi.

Jesus Iłuaqsigai Iñugiaktuat Iñuich

²⁹ Tavra anikamiŋ aŋaiyyuviŋmiñ, tavrauvvaa isiŋarut igluagnun Simon-lu Andrew-vlu, tuvaaqatigivlugik James-lu John-lu.

³⁰ Tavra Simon aakaruaŋa nalaŋaruq naŋiłłuni uunaqsivḷuni, aasii tavrauvvaa uqallautiŋagaat Jesus.

³¹ Tavra ullakługu tiguŋagaa argaŋigun, aasii makitiłługu. Suli tavrauvvaa uunnautaiŋaruq, aasii niqłiuġutiaqsivḷugich.

³² Tavra anaqaksraaġman, siqiñiq nipianiŋman, Jesus-muutiŋagaich iluqaisa naŋirrutilgich, tamatkualu ilitqusiqł̣uqaqtuat.

³³ Tavra iñupayaaŋi iniqpaum katinŋarut sivuġaanun iglum.

³⁴ Aasii ilaan iluaqsiŋagai iñugiaktuat naŋirrutilgich qanusiḷimaanik, suli aniłługich iñugiaktuat ilitqusiqł̣uich. Suli ilitqusiqł̣uich uqaqtaiḷivḷugich qanuq iḷisimaŋagaat kiutilaaŋanik.

Jesus Alġaqsruiruq Galilee-mi

³⁵ Tavra uvlaami Jesus itiqłuni uvluġiaġituŋŋaan aniŋaruq, aasii aullaqłuni iñuił̣aamun aŋaiyyuŋaruq.

³⁶ Tavra Simon piqatiniḷu aullaŋarut ivaġiaqługu,

³⁷ aasii paqinnamirruŋ uqallautiŋagaat, Iñupayaat ivaqłiarut iliŋnik.

³⁸ Tavra ilaan uqallautiŋagai, Aullaqta tuglivsiŋñun nunaaqqiñun alġaqsruimmiyumauŋa taamani. Tainnaġiaqłuŋa qaiŋaruŋa.

³⁹ Tavra alġaqsruiŋaruq aŋaiyyuviŋiññi iluqaani Galilee-mi, anittaqługiḷḷu ilitqusiqł̣uich iñuŋniñ.

Jesus Mamititkaa Kiḷḷiġruaqtuqtuaq

⁴⁰ Tavra kiḷḷiġruaqtuqtuaq ullautiŋaruq ilaanun aasii sitquqłuni qasiḷivḷugu uqaqłuni, Pisukkuvich mamititchumiñaġiŋma.

⁴¹ Tavra Jesus nagliksratchakłuni isaaŋaruq, aasii aksiukługu uqallautiŋagaa, Piyummatiqaqtuŋa. Mamittin.

⁴² Tavrauvvaa kiḷḷiġruaŋi maminŋarut, aasii salummaqłuni.

⁴³ Tavra aullaqtitchaqamiuŋ, uqaullaapiaġataŋagaa,

⁴⁴ Sumikunnii uqaġnak taavrumiŋa kimulliqaa. Aglaan aŋaiyyuliqsiqpaŋmugiñ qanuqitilaaġiaġlutin, aasii aitchuiḷutin ikipkautinik Moses piraksriutiŋiñik, ukpiġnaqsisaġlugu paŋmapak salumasisilaan.

⁴⁵ Aglaan aullaqami quliaqtuaqsautigillaġmi piŋaruq sumulliqaa. Quliaqtuaqpaił̣ł̣uni Jesus isiġumiñaiŋagaa iniqpaŋnun takkuqsraġlugich iñuich. Tavra nunagluktuamiinŋaruq, aasii iñuich qaiguŋarut ilaanun sumiḷḷiqaa.