Juwawu 1 - Mazu Otchena a Mulungu

Yesu Kiristu gupandutchile jatene voroma vene

¹ Voroma vene ohokalawo aitaniwa Mazu. Liye akala vamohi na Mulugu eto alive Mulugu.

² Kuma voroma vene, liye akalave vamohi na Mulugu.

³ Jengo jatene jipandutchiwe muwari mwa liye. Kilivo yengo yahapandutchiwe mwa liye.

⁴ Ingumi yali mwa liye. Eto ingumi ile yali moneya para atu atene.

⁵ Moneya unamoneya isi. Isi eto kinawanda timiha moneya.

Juwawu Mbatizi azele muhidedela umboni Moneya

⁶ Ohokalawo mulombwana mmohi arumiwe na Mulugu, nzina naye ali Juwawu.

⁷ Mulugu amurumile ira aze amuhidedele umboni Moneya ira atu atene kamuroromele muwari mwa liye.

⁸ Juwawu kaali Moneya, nari. So liye azele muhidedela umboni Moneya,

⁹ Moneya wa ibaribari wewo wafuna za mwilamboni ira waamoneye atu atene.

¹⁰ Mwa enne Moneya wenno eto unafwanyeya agali Namapandutcha wa jatene ohoza mwilamboni ya vati. Mbwenye agazile, atu a ilambo ya vati kiwandile muiziwa.

¹¹ Liye azaga mwilamboni, aazela atu a nlogo naye eto aliwa tchamuwatchenle.

¹² Mbwenye zela wa atene kamuwatchenle, zela anne karoromenle nzina naye, liye uhavaha wandeya ira kakale ana Mulugu.

¹³ Mbwenye ira aliwa kakale ana Mulugu, kuzenle muwari mobaliwa mwa sangiri owu mwa maningo, nne kuzenle muwari mofuna wa mutu. Mbwenye unazela mofuna mwa Mulugu.

¹⁴ Mulombwana Mazu ohoza, liye wara maningo, kalaga vamohi na hiyo atu. Hiyo nihiona undimuwa waye ineriha liye gu Mwana mmohive wa Baba unafwanyeyana sayi dilukulu vamohi na ibaribari.

Umboni wa Juwawu Mbatizi zela Yesu

¹⁵ Juwawu ohomuhidedela umboni Yesu aawandelaga atu eraga: <<Gwenne damuwonga miyo diiraga: <Mundulri mwaga ukala mulombwana unafuna zamo, wenno unafwanyeya agali mundimuwa odikwaranya miyo, mwasiwa liye ohokalawo miyo dahanakalewo.> >>

Sayi da Mulugu dikumile muwari mwa Yesu hiya mmalamuloni

¹⁶ Muwari mwa upama watene wa Yesu, hiyo atene nihifwanyamo sayi didjindji dene.

¹⁷ Tchoira Malamulo kavahediwe mwa Mozeji. Mbwenye sayi vamohi na ibaribari ilukulu zela Mulugu kajikumile mwa malamulo. Jikumile mwa Yesu Kiristu.

¹⁸ Kalivo ubabihile muona Mulugu Baba. Mbwenye umuiziweyihile gu Mwanaye mmohive wenno unafwanyeya agali Mulugu, wenno unakala wewo uli Mulugu Baba.

Juwawu Mbatizi ohofukiwa akala ali Namatikeliwa

¹⁹ Siku nimohi andimuwa a aJudewu kafwanyeya Jeruzalemu koharuma anamakuta angasi angasi na aLevi afwiwa ira kadowe kanfuke Juwawu ira: <<Weyo uli ani?>> Evale aliwa kohovenyaga, aliwa dowa nfwanya Juwawu.

²⁰ Kaganfukile, Juwawu ohawandelaga mohokayikela eraga: <<Miyo kadili Namatikeliwa.>>

²¹ Vevale kohonfuka, aliwa ira: <<Nnga uli ani? Uli Eliya?>> Liye ohoira: <<Nari, miyo kadili Eliya.>> Evale atu kwi: <<Nnga uli Namafiyiheda unadedihiwa?>> Liye ohowakula kwi: <<Hehi, kahi miyo.>>

²² Mwa enne aliwa kohonfuka keraga: <<Nnga weyo uli ani? Hiyo niire rumiwa ira nufuke. Kaniwandele ira nafiya wa ale kanirumile, niwande awandela. Kodi weyo uli ani?>>

²³ Juwawu ohowakula ira: <<Miyo dili wenno amuwonga namafiyiheda Izaiya wanle ira: <Ukala nizu nnakuwa muisalesaleni niiraga: <<Wongolani rampa wa Nabwiya.>>> >>

²⁴ Aliba nfukale karumiwe na aFarizewu.

²⁵ Evale aliwa kohonfukagave keraga: <<We uni: <Miyo kadili Namatikeliwa, nne kadili Eliya, nne kadili Namafiyiheda>, nnga unaabatizela nni atu?>>

²⁶ Juwawu ohawakula eraga: <<Miyo nnabatiza na mahindje. Mbwenye muwari mwa nyo ukala mundimuwa mwahamuiziwile nyo.

²⁷ Liye gwenno unafuna za mundulri mwaga, nne miyo kadili ofwanela tapula mingohi da sapato daye.>>

Juwawu ohatonyiheda atu ira Yesu gu mwana Nibila na Mulugu

²⁸ Jeji jaireyile tatamo ya Betaniya, yenno ili kombela ya muhindje Jordawu, wewo Juwawu waabatizetcha liye atu.

²⁹ Mmetcheloni muwa, Juwawu ohomuonaga Yesu azaga wali liye. Evale ohowongaga, liye ira: <<Kaing'anani! Mwana Nibila na Mulugu, neno nnatimiha yotega ya atu a ilambo ya vati, gwenne!

³⁰ Gwenne damuwonga miyo diiraga: <Mundulri mwaga ukala mulombwana unafuna zamo, odikwaranya miyo vano. Dikwaranya uwa, tchoira liye ohokalawo miyo dahanakalewo.> >>

³¹ Juwawu ohowongagave eraga: <<Miyo wanle kadamuiziwile. Mbwenye para miyo za abatizaga atu na mahindje, ali ira aIzarayeli kamuiziwe.>>

^32-33 Eto Juwawu ohomuhidedela Yesu umboni eraga: <<Miyo wanle kadamuiziwile. Mbwenye wenno adirumile abatiza atu na mahindje, ohodiwandela ira: <Wenne unamuone we Munemba Otchena ammorelaga eto aza aimela vazulu vaye, uiziwe ira unafuna abatizaga atu na Munemba Otchena gwenno.> Mwa enne vazile liye dimbatizaga, dohomuona Munemba Otchena ammorelaga kumela zulu kalaga nnga kangayiwa, za imela vazulu vaye. Pa evo vamunonne miyo ira: <Mulugu amuwonga liye gwenna.>

³⁴ Na ibaribari miyo dihiona jatene jene eto nnohidedela umboni ira na ibaribari liye gu Mwana Mulugu.>>

Andire na Peduru kohogumana na Yesu

³⁵ Noira enne, mmetcheloni muwa, Juwawu agali vamohi na anamamuharaye ambinli,

³⁶ ohomuonaga Yesu aviraga. Evale Juwawu ohoiraga: <<Kaing'anani, mwana Nibila na Mulugu gwenne.>>

³⁷ Anamamuharaye ambinli ale kagavwile mazu anno, kohoromaga muhara Yesu.

³⁸ Yesu againg'anne mundulri, vaaonne liye kamuharaga, ohafukaga eraga: <<Nnga diharaga eni, ikala inafuna nyo?>> Evale aliwa kohoiraga: <<Rabi, so hiyo nera nufukeni, kodi munakala waani?>> (Rabi ku tapulela namafundjiha.)

³⁹ Yesu ohawakulaga eraga: <<Ndoweni mwaonevo.>> Evale kohoviraga vamohi, aliwa fiya nimburo neno nakala Yesu. Tempu yafiya atu wewule, yafwanyeya yagali 16 ora. Mwa enne anamamuhara ambinlale kohofiyeda garati vevale na Yesu siku nenne.

⁴⁰ Muwari mwa anamamuhara ambinli kavwile yowonga ya Juwawu, karoma muhara Yesu, mmohi ali Andire. Andire ule ohomukana mbalaye eriwa Simawu Peduru.

⁴¹ Andire agakumile evale, mutu oroma anfwannye liye ali mbalaye Simawu. Aganfwannye ohomuwandelaga ira: <<Nihinfwanya Mesiya.>> (Mesiya ku wonga Namatikeliwa.)

⁴² Evale Andire ohomudowana Simawu wa Yesu. Yesu agamuing'anne, ohowongaga ira: <<Weyo uli Simawu, mwana Juwawu. Mbwenye roma peno dowa sogolro, unaitaniwege Sefa.>> (Sefa tchi imohive no wonga Peduru. [Inatapulela nibwe.])

Natanayeli ohogumana na Yesu

⁴³ Mmetcheloni muwa Yesu ohomaruwa afunaga ira adowe Galileya. Mbwenye ahanadowe, ohonfwanya mulombwana mmohi eriwa Filipi. Aganfwannye ohomuwongana, liye ira: <<Kadiharege.>>

⁴⁴ Filipi ule waniwa ali sidadi ya Betisayida wewo wakumenle mulombwana Peduru na Andire.

⁴⁵ Filipi eto ohokana nfwaye eriwa Natanayeli. Agavwile mazu a Yesu oira: <<Kadiharege>>, ohodowaga nfwanya Natanayeli, liye ira: <<Hiyo nihimala nfwanya wenno amulrembile Mozeji mmalamuloni eto wenno amulrembile anamafiyiheda a wanle. Gu Yesu mwana Joze, nkuda Nazareti.>>

⁴⁶ Natanayeli mbwenye ohokayikela eraga: <<Kodi vihikala wandeya ira yengo yapama ikumele Nazareti?>> Evale Filipi ohomuwakulaga ira: <<Ndowemo waone.>>

⁴⁷ Yesu agamuonne Natanayeli azaga vali liye, ohowonga, liye ira: <<Kaing'anani, ula gu muIzarayeli wa ibaribari, ohowanganyedeya.>>

⁴⁸ Vevale Natanayeli ohonfukaga Yesu, liye ira: <<Nyo mudiiziwile waani?>> Yesu ohomuwakula, liye ira: <<Filipi ahanaufwanye, miyo dohovayela uona wagali mutchindo mwa mufigera.>>

⁴⁹ Evale Natanayeli ohoira: <<Namafundjiha, nyo muli Mwana Mulugu! Muli Mwene wa Izarayeli.>>

⁵⁰ Yesu ohomuwakula ira: <<Kodi uwandile diroromela na mwasa wa miyo uwandela ira duhuona wagali mutchindo mwa mufigera? Miyo nnouwandela ira jinafuna we ona jinokwaranya yotikiniha yenno iwongile miyo.>>

⁵¹ Yesu ohowongagave eraga: <<Miyo nnafuna duwandeleni ibaribari. Nyo munoza muone zulu wagahuleyile, angelro a Mulugu katitaga, kazaga wa Mwana wa Mutu eto amohiwa kakumaga vali liye kagwelaga zulu akoka.>>