Judi 1 - Izwi lya Leza

¹ Ndime Judi, musebezhi wa Jeso Kilisito, ndimunina Jemusi, indalemba luŋwalu lolu kwenu, umwe numwakoompololwa ulimwi nubafwunwa ba Mwami Leza Tatesu, umwe numwakwabililwa u Jeso Kilisito.

² Luse, u luumuno ulimwi u lufwuno luhwa kwa Leza alube amwe.

Ba Maayi Babeshi

³ Nubafwunwa, ndazandisha kumulembela luŋwalu kwaamba ati mupandululile sha lufwutuko lwesu toonse. Pele ndakabona ati cintu cikando kacili cakumulembela u kumukumbila kwaamba mulwile lushomo lolo Leza ndwaakapa ba bantu bakwe ciindi comwi.

⁴ Nkaambo bantu bamwi batazanda sha Leza, bakanjila cakuzubaila akati kenu. Baba bantu balaamba ati luse lwa Leza lulatuhuminya kucita shintu shamafwunze. Ulimwi balakamukaka Jeso Kilisito Mwami wesu, shimatwanga esu. Mashinshime a kale kale akaamba ati, balakasubulwa.

⁵ Inzho ndazanda kumuzhibalusha, nikuba ati mulishizhi shoonse sheshi ati Mwami wakafwutula bantu kuhwa mucishi ca Ijipiti ciindi comwi bulyo ukuzonauna babo bayina nibakashoma.

⁶ Inzho baanjelo balya bayina nibakabamba masena abo, pele bakashiya masena abeelele. Leza wakabaanga inceetani shashikwense u shikwense, wakabawaala mu mushinze ushiya mbi, mpaka kushika kwa buzuba bukando bwa lubeta.

⁷ Bantu bamu Sodomu u Gomola u minzhi njicibambene ayo, balo bakaakuli bashimamambe ulimwi ubakaasololelwa u shisushi shitali shabuntu, bakaba citondezho ciindi Leza naakabapa cisubulo mu mulilo utamana.

⁸ Umbona bobo, baba bashimaloto balasofwaazha mibili yabo, balakaka kweendezhewa u Leza u kutuka shilenje shilemekwa shaka Leza.

⁹ Pele ciindi anjelo mukando Maiko, naakaakukazhanya u Shaatani, ku makani a mubili waka Mozesi, wiina kumubeteka cakumusampaula, pele wakaamba bulyo ati, “Mwami Leza akupe cisubulo!”

¹⁰ Pele bantu baba balasampaula kufwumbwa ncibatateeleli, ubobo sheshi shintu ncibatateeleli shilabaletela kuzonaunwa ukoya banyama bayina maanu.

¹¹ Mapenzhi kuli babo! Nkaambo baleenda munzhila ya Kaini wakayaya munina. Umbona mbwaakacita Balamu, wakacenga bantu ukaambo ka mali. Balazonaunwa ukaambo kakupapila Leza ukoya mbwaakacita Kola.

¹² Bakabisha mapobwe enu aalufwuno. Balalya akati kenu tabafwi insoni, balalisanina beni. Bali ukoya makumbi aaya bupepaulwa iikunku, amana taaleti inhula; Bali ukoya masamu aateezha micelo nicishika ciindi cayo, masamu akazhulwa, mazumu ntaa;

¹³ bali ukoya mankutisha amu lwatele mbwaacita iyohu, abo mbubatondezha busofwaazhi bwabo. Bali ukoya intongwezhi shuumpaila, Leza nshabambilile busena bwa mushinze utamana ushiya mbii.

¹⁴ Imbabo baba mbaakashinshima Enoki wezhalane lya ciloba kuhwa kwa Adamu, nakaamba ati, “Mwami ulakeza u baanjelo bakwe bali shuulu shuulu.

¹⁵ Ulakabeteka boonse u kuya kubapa cisubulo bamunyansha Mwami Leza nkaambo ka milimo yabo iitaluleme njibacita cakutatiya Leza. Ulakabapa cisubulo nkaambo kamazwi oonse akusampaula ngubamusampula.”

¹⁶ Baba bantu balasholauka u kutongauka, balacilila shisushi shabo shibiyabi, balaamba calweeno u kulyeensheensha mukwamba kwabo ulimwi balabosha bosha bantu kwaamba babanange shintu calucengo.

Kucenjezha u Kuzumya Zumya

¹⁷ Pele umwe, nubafwunwa, amuzhibaluke mazwi akaambwa u batumwa ba Mwami Jeso Kilisito.

¹⁸ Bakamwaambila ati, “Ku ciindi ca mamanino, kulakaba bantu basampaula, shisushi shabo nshibiyabi.”

¹⁹ Bantu babo mba anshi, bayina Moza wa Leza, mbubaleta lwaandaano akati kenu.

²⁰ Pele umwe nubafwunwa, amulizake mu lushomo lwenu lusalala. Amusololelwe u Moza Usalala mu kukomba kwenu.

²¹ Amukale mu lufwuno lwa Leza ciindi nimulindila bumi buteeli bobo Mwami Jeso Kilisito mbwaakaamupa mu luse lwakwe.

²² Ulimwi amutondezhe luse kuli babo bamwi bacizuluzha.

²³ Bamwi mubanunune cakubakwempa mu mulilo. Ukuli bamwi mutondezhe luse luhwelene ubukandu, pele mushisule shakusama shabo shisofweele, micito yabo yamafwunze a mubili.

Kulumba kwa Mamanino

²⁴ Inzho kuli wezo ukonzha kumubamba kwaamba mutawi, ulimwi ukonzha kumushisha ukwa Leza, bwiina kampenda, u kutangalila mu bulemu bwakwe ubwiina shibi,

²⁵ walo wezo ngu mufwutuli wesu, Jeso Kilisito Mwami wesu. Akube bulemu, u bukando, iinsana, u bwami, kuhwa ku makancilo, ubwasunu u mazuba oonse shikwense u shikwense. Ameni.