Johani 1 - Izwi lya Leza

Izwi Lyaba Muntu wa Mubili

¹ Ku makancilo kakuli Izwi. Inzho Izwi kali antoomwi u Leza, ulimwi Izwi kali Leza.

² Izwi kali u Leza ku makancilo,

³ shoonse shintu shakaba kwiita mwakwe, kuti naatakaakwiko nikwaaakwiin a cintu niciba comwi ciliko.

⁴ Bumi kabuli mwakwe, ulimwi bumi kooli mumuni ku bantu boonse.

⁵ Mumuni ulamunika u mushinze, pele mushinze wiina niwakazunda.

⁶ Kakuli muntu wakatumwa u Leza uutewa ati Johani.

⁷ Johani wakeza kupa bumboni bwa mumuni wezu, kwaamba bantu boonse bashome kwiita mubumboni bwakwe.

⁸ Johani walo ingwe wakaakuli Mumuni, pele wakeza kupa bumboni bwa Mumuni.

⁹ Mumuni mwini mwini wezo uumunikila bantu boonse wakeza mu luundu.

¹⁰ Izwi kali mu luundu, ulimwi luundu lwakalengwa kwiita mwakwe, nikuba bobo bantu bayina nibakamuzhiba.

¹¹ Wakeza ku bantu bakwe mwini, pele bantu bayina nibakamutambula pe.

¹² Pele bantu babo bakamutambula u kumushoma wakabapa insana shakuba banakwe Leza.

¹³ Bayina nibakaba banakwe Leza kwiita mukuzhalwa kuhwa ku mubili, nikuba kuluzando lwa muntu, pele kunsana sha Leza.

¹⁴ Inzho Izwi wakaba muntu, wakazhalwa ku mubili, wakeza kukala akati kesu, ulizwile luse u lushinizho. Uswe twakabubona bulemu bwakwe, bulemu bwashimuzhalwa ice kwa Ushi.

¹⁵ Johani wakapa bumboni kwiita mumulumbe ngwaakakambauka ati, “Inguwe wezu ngundakaakwaamba ati, ‘Uuzhiza munshi lyangu ulambaala, nkaambo kaliko kale ume ncitana kuzhalwa!’”

¹⁶ Ukaambo kabube bwakwe buzulile, uswe twakatambula luse lunji lunji.

¹⁷ Nkaambo Leza wakapa Mulawo kwiita mwa Mozesi, pele luse u lushinizho lwakeza kwiita mwa Jeso Kilisito.

¹⁸ Kwiina naaba womwi wakamubona Leza. Cita Leza ice nana, walo uuli afwaafwi U ushi, nguwakatuzubululila Ushi mbwaabele.

Bumboni Bwaka Johani Mupapatizhi

¹⁹ Mbubobu bumboni mbwaakapa Johani kuba Juda, ciindi nibakatuma bapaizhi u Balevi kuhwa ku Jelusalemu, kwaamba bakamubuzhe ati, “No ndiweni?”

²⁰ Walo wiina naakakaka, wakabaingula cakushomeka ati, “Indime Kilisito Munanike waka Leza!”

²¹ Ulimwi bakamubuzha ati, “No ndiweni? Sa ndiwe Elaija?” Walo wakaingula ati, “Pe pe indime.” Ulimwi bakamubuzha ati, “Sa uli Mushinshimi?” Ulimwi Johani wakaingula ati, “Pe pe!”

²² Bakamubuzhisha ati, “Tushimwine, no ndiweni, kwaamba tukabashimwine batutuma.”

²³ Johani wakaingula ati, “Ndime wezo ngwaakaamba mushinshimi Aizaya ati, “Kuli uuwolobwezha mulukula ati, ‘Amululamike Inzhila ya Mwami!’”

²⁴ Inzho babo bantu bakatumwa kuba Falisi,

²⁵ bakamubuzha ulimwi ati, “No nkaamboonzhi ulapapatiza naa tuli Kilisito, ulimwi tuli Elaija naa Mushinshimi.”

²⁶ Johani wakabaingula ati, “Ume ndamupapatiza u meenzhi bulyo. Pele akati kenu ngaali ngumutezhi.

²⁷ Uzhiza munshi lyangu, walo ngunteelele kuba muzhice wakwaangulula twaanzho twa mpato shakwe.”

²⁸ Aza makani oonse akacitikila ku munzhi wa Betani, uuli amutala wa lweenje lwa Joodani, momo Johani mwaakaakupapatiza.

Mwanaa Mbelele wa Leza

²⁹ Nibwakaca Johani wakoombona Jeso uleza kwakwe, ngoonaawo wakamwaambila ati, “Amubone Mwanaa Mbelele, uukusha shibi shaluundu!

³⁰ Inguwe ngundakaakwaamba ati, Uuzhiza munshi lyangu ulambaala, nkaambo kaliko kale ume ncitana kuzhalwa.

³¹ Ume lwangu cintamwizhi, pele nciceco ncindakezhila kupapatiza u meenzhi kwaamba azubululwe kuba Izilaili.”

³² Ulimwi Johani wakapa ubumwi bumboni bwakuti, “Ndakabona Moza Usalala uleza buseluka kuhwa kwizeulu ukoya inzhiba, weza wamukala.

³³ Ume lwangu ncitana kumuzhiba, pele Leza wezo wakantuma kupapatiza u meenzhi wakaŋambila ati, ‘Kufwumbwa muntu nguukabona ulaselukilwa ukukalwa u Moza wa Leza, ati inguwe wezo uupapatiza u Moza Usalala.’

³⁴ Inzho ume ndimwini ndakalibonena, nciceco ncimpela bumboni bwakuti, wezu ngu Mwanakwe Leza.”

Ba Shiciiya baka Jeso Bataanzhi

³⁵ Nibwakaca Johani wakaakuzhimine ulimwi u ba shiciiya bakwe bobile.

³⁶ Naakamubona Jeso ulaya bweenda wakaamba ati, “Amubone nguwelya Mwanaa Mbelele wa Leza!”

³⁷ Ba shiciiya babo bobile nibakaateelela azo makani bakamucilila Jeso.

³⁸ Jeso naakacebuka wakababona baleza bumucilila, amane wakababuzha ati, “No mulazandaanzhi?” Bakamwiingula ati, “Labi, anu ulakala kwi?” Labi, cilapandulula ati Mwiiyi.

³⁹ Jeso wakaamba ati, “Kamwiza mubone.” Kalili kale lyakumbo, bamane bakaya aze kuya kubona nkwaakaakukala. Bakalibizha koko nkukona nkaambo kalimanine kale izuba.

⁴⁰ Umwi wa babo bobile bakamuteelela Johani naakaakwaamba kali Andulu, munina Saimoni Pita.

⁴¹ Ndilyona Andulu wakaya kumukapula munina Saimoni, wamwaambila ati, “Twamuyana Munanike waka Leza” leli izwi lilaamba Kilisito.

⁴² Amane wakamutola Saimoni kwa Jeso. Jeso wakamutongomwena wakaamba ati, “Ndiwe Saimoni mwanakwe Johani, pele ulaakutewa ati Kefasi.” Ceci cilaamba ati Pita naa “Mwala.”

Jeso Mbwaaketa Filipo u Natanyele

⁴³ Nibwakaca Jeso wakatelaika kuya ku Galilaya, koko nkwaakayana mulombwana uutewa ati Filipo amane wamwita ati, “Ncilila!”

⁴⁴ Filipo kali waku Betisaida koko nkubakaakukala ba Andulu u Pita.

⁴⁵ Filipo wakayana Natanyele, amane wakamwaambila ati, “Twamuyana muntu ngwaakalemba Mozesi mwibuka lya Mulawo. Inguwe nguulembelwe umu mabuka a bashinshimi, ngu Jeso waku Nanzaleta mwanakwe Jozefu.”

⁴⁶ Natanyele wakabuzha ati, “Sa amo mu Nanzaleta mulakonzha kuhwa cintu cibotu?” Filipo wakamwiingula ati, “Kweza ukalibonene umwini.”

⁴⁷ Inzho Jeso naakamubona Natanyele uleza nkwaabele, wakaamba ati, “Nguwezu muna Izilaili mwini mwini, uutacengi!”

⁴⁸ Natanyele wakoombuzha ati, “No wanzhiba buti?” Jeso wakaingula ati, “Ndaukubwene kale niwaakushite mucinhule ca bukuzu Filipo katana ukwita.”

⁴⁹ Ngoonaawo Natanyele wakamwaambila Jeso ati, “Mwiiyi, ndiwe Mwana Leza! Ndiwe Mwami wa Izilaili!”

⁵⁰ Jeso wakamwaambila ati, “Sa washoma bobo nkaambo ndakwaambila ati ndakubona niwaakushite mucinhule ca bukuzu? Ulakabona shintu shikando kubaala ali ceci!”

⁵¹ Ulimwi Jeso wakaamba ati, “Cini cini ndamushimwina ati, mulakalibona izeulu liliyalukile u baanjelo baleza balaliza ukuseluka a Mwanaa Muntu.”