Filimoni 1 - Izwi lya Leza

¹ Ndime Paulu uli muntolongo ukaambo kakusebezela Kilisito Jeso, tuli antoomwi u Timoti mukwesu. Twakulembela mukwesu Filimoni uwe umufwunwa ulimwi musebezhi nokwesu,

² u mukwesu Afiya u Akipasi shikalumamba nokwesu mwa Kilisito antoomwi imbungano iswaangana muŋanda yako.

³ Leza Taata u Jeso Kilisito Mwami wesu bamufwile luse u kumupa luumuno.

Makani a Lufwuno u Lushomo lwaka Filimoni

⁴ Ndamulumba Leza wangu ciindi coonse niinkutelaika mu kukomba kwangu,

⁵ nkaambo nditeelele ati ulashoma Mwami Jeso ulimwi ulifwini bantu baleza boonse.

⁶ Ndalomba ati ulyaabe mukwaabanya lushomo lwako, kwaamba ukashizhibishe shibotu shoonse nshitukwete mu lukamantano u Kilisito.

⁷ Lufwuno lwako mukwesu lwampa lutangalo ulimwi lwanzumya zumya cini cini kaambo weebukulusha myonzo ya bantu baleza.

Paulu Walombela Onesimasi

⁸ Nikuba bobo ndikwete insana sha kukulailila nshuuyelele kucita mwa Kilisito.

⁹ Pele ukaambo kalufwuno, ndakulomba ume ndi Paulu nikuba kuti ndacembala, ulimwi ucaninzho ndyaanjilwe ukaambo kakusebezela Kilisito Jeso.

¹⁰ Ubobo ndakulomba kuzhiminina Onesimasi wezo wakaba mwanangu mwa Kilisito ciindi indaakuli muntolongo.

¹¹ Ku ciindi cakaita kaina mulimo kwako, pele ninzho ulakonzha kutuyohwa uswe toonse tobile.

¹² Inzho nguwezo ndamupilusha kwako ukoya ndatumya monzo wangu woonse.

¹³ Ndaakuzanda ati a kucishite kono kwaamba anjohwe mulimo mu busena bwako ciindi nincili muntolongo ukaambo ka kukambauka Makani Mabotu.

¹⁴ Nikuba bobo nshizanda kukushinicizha kwaamba unjohwe, pele ndazanda ati ulihuminine umukamwini.

¹⁵ Ambweni ncimwakaandaanina u Onesimasi kwa ciindi cishoonto, kwaamba apiluka mukakale antoomwi shikwense.

¹⁶ Inzho atabi ukoya muzhice bulyo, pele mucite ukoya munyoko nakufwunwa mulukamantano u Kilisito. Ume ndimufwini aze ulyeelele kumufwunisha nkaambo muntu noko ulimwi mushomi noko.

¹⁷ Na ulinzhi ati ume ndi musebezhi noko, umutambule ukoya mbuukonzha kuntambula ame.

¹⁸ Na kuli cibiyabi ncaakakucitila, nicikaba cikwelete, wezo mulandu noobe wangu.

¹⁹ Ume ndimwini ndi Paulu ndalemba luŋwalu lolu iitashi lyangu kwaamba ati ndakakuliya mali. Utaluba ati inzho ndikwete cikwelete kwako, pele cikwelete cako kwangu cilabaala nkaambo mbumi bwako boonse.

²⁰ Ee mukwesu, ndalomba unjohwe ukaambo ka Mwami. Nkalika monzo ukoya munyoko mwa Kilisito.

²¹ Nkaambo ndikwizhi mbuubele, nshizuluzha mukulemba kwangu, ndizhi kwaamba ulakacicita ncindakulomba ukwiitilizha.

²² Cimwi cintu nciŋamba ncakuti umambile busena bwakoona, kaambo ndashoma ati kwiita mu kukomba kwenu, Leza ulakandeta koko.

Kwaanzha kwa Mamanino

²³ Epafulasi ngutwaanjilwe aze muntolongo ukaambo ka kukambauka Makani Mabotu aka Kilisito Jeso, wamwaanzha.

²⁴ U Maako musebezhima, kubicilizha uba Alisityakosi u Dimasi u Luka abo bamwaanzha.

²⁵ Inzho luse lwa Mwami Jeso Kilisito alube amwe noonse.