Baloma 1 - Izwi lya Leza

Kwaanzha u Kulipandulula

¹ Ume ndime Paulu mutwanga wa Jeso Kilisito, mutumwa mwite, wakasalilwa Makani Mabotu a Leza.

² Makani Leza ngaakashomezha kwiita mu bashinshimi bakwe mbuli mbwaamba Malembe Asalala.

³ Ngaaza Makani Mabotu a Mwanakwe Leza wakazhalwa ku luhubo lwa Devidi ku mubili.

⁴ Pele wakaambwa ati mwanakwe Leza munsana sha Moza Usalala, kwiita mukubuka ku bafwu. Wezu ngu Jeso Kilisito Mwami wesu.

⁵ Muli wezu, Leza twakapewa luse ubutumwa, buletela mishobo yoonse Makani Mabotu kwaamba bamushome u kumuteelela.

⁶ Inzho amwe mbubona, muli bamwi bababo mbaaketa Leza kwaamba mube bakwe Jeso Kilisito.

⁷ Ndalembela kuli umwe noonse, nubafwunwa baka Leza numuli mu Loma, bakatewa kuba bana Musalali. Leza Tatesu u Jeso Kilisito Mwami wesu, amufwile luse u kumupa luumuno.

Kukomba kwa Kulumba Leza

⁸ Kutaanguna ndalumba Leza wangu kwiita mwa Jeso Kilisito ukaambo kenu, nkaambo kakuti inshi yoonse bantu balaamba bulyo shalushomo lwenu.

⁹ Nkaambo Leza ngumanina milimo u monzo wangu woonse, kukambauka Makani Mabotu a Mwanakwe, ngu kamboni wangu kwaamba coonse ciindi ndamutelaika mu kukomba kwangu.

¹⁰ Ubobo ndalomba ati ambweni mu luzando lwa Leza, ndakakonzha kushika koko nkumubele.

¹¹ Nkaambo ndazandisha cini cini kumubona kwaamba tukaabane amwe shilonjezho sha moza shakumuzumya zumya.

¹² Cintu cikando ncakuti, tukalizumye zumye toonse mu lushomo.

¹³ Nkaambo nubakwesu ndazanda kumuzhibya, nikuba kwaamba ati lyoonse ndakaakuzanda kwiza koko, pele ceno ciindi ndikacililwe. Ndazanda ati nkasebeze amwe kwaamba nkasandule bamwi akati kenu mbubona mbuli mbundakacita akati ka bantu bakunze.

¹⁴ Ndikwete cikwelete, kuba Giliki u babo batayiile, basongo, u balimbushi.

¹⁵ Nkukaambo kako ume ndazandisha kumukambaucila Makani Mabotu amwe numuli ku Loma.

Insana sha Makani Mabotu

¹⁶ Ume taangusha insoni Makani Mabotu aka Kilisito nkaambo nshiinsana sha Leza sha kufwutula babo boonse ba shoma, kukancila kuba Juda kushicila kuba Giliki.

¹⁷ Nkaambo ka Makani Mabotu aza, bululami bwa Leza bwakazubululwa kwiita mu lushomo, mbuli mbukulembelwe ati, “Muntu ululeme, ulapona u lushomo.”

Bantu Boonse Bakabisha

¹⁸ Inzho bukali bwa Leza buhwa kwizeulu bwazubululwa ukaambo kakutazhiba Leza u kutalulama kwa babo bashinkila lushinizho nkaambo kamafwunze abo.

¹⁹ Ubobo, shesho muntu nshaakonzha kuzhiba sha Leza shilalibonya, nkaambo Leza wakashizubulula.

²⁰ Nkaambo kukancila kumalengelo anshi, insana shabu Leza bwakwe shiteeli, nikuba ati tashibonwa, shilazhibwa kwiita mushitu nshaakalenga. Ubobo bantu bayina mbubakonzha kutama pe

²¹ Nikuba kuti kabamwizhi Leza, bayina nibakamulemeka ukumulumba, nkaambo mu mizeezo yabo kabakwete matelaishi mabiyabi, u myonzo yabo yabulimbushi yakaba mu mushinze.

²² Kabazunga ati mbasongo, anu mbalimbushi.

²³ Muciindi ca kukomba Leza uutafwi, bakakanka kukomba baleza bapanje bakozhene u bantu bafwa, na bazuni na banyama na bazoka.

²⁴ Ubobo Leza wakabaleka kwaamba bacite shamafwunze shamu myonzo yabo shuusha insoni, ukutalemeka mibili yabo.

²⁵ Bakaleka sha Leza sha lushinizho u kucilila shabubeshi, bakakomba ukusebezela shilenje mu busena bwakulemeka ukusebezela Leza wakashilenga, walo kutembaulwa lyoonse! Ameni.

²⁶ Ubobo Leza, wakabaleka ati bacite shamafwunze shuusha insoni. Abo bakaintu bakeeleka milimo ya bukaintu mibotu u kucilila milimo isofweele yakulyana inkwela mukaintu u mukaintu nina.

²⁷ Mbubona bobo abo balombwana bakashiya milimo yabo yabulombwana ku bakaintu, bakakanka kulyana inkwela u balombwana nokwabo. Bakacita shiyanza shiyazha insoni, mukucita bobo bakaliletela cisubulo ca milimo yabo yamafwunze.

²⁸ Inzho ukaambo kakuti bayina nibakazanda kubika maanu sha Leza, Leza wakabaleka mu matelaishi aabo beni mabiyabi, kwaamba bacite shintu shiteelele kucitwa.

²⁹ Myonzo yabo ilizwile bubiyabi, ubuli ukoya bulyato, u munyono, u buyazhi, u bulwati, u lweeno, u buhwizhi ulimwi u bubeshi.

³⁰ Tabazanda Leza, mbubashikasampusampu, mbubashikantu kantu, balalipa,

³¹ bayina maanu, bayina lushomo, bayina luse, bantu bateetezhewa.

³² Balyuuzhi mulawo wa Leza wakuti, “Bantu bacita shili bolya, balyeelele kufwa. Nikuba bobo tabaciti bulyo shesho, pele balabeensheensha babo bashicita.”