Bagalatiya 1 - Izwi lya Leza

Kubuka kwa Jeso ku Bafwu

¹ Ndime Paulu mutumwa, watakatewa umuntu kuba mutumwa na ukaambo kakuzanda kwa muntu, pele nkuzanda kwa Jeso Kilisito u Leza Taata wakamubusha ku bafwu.

² Ume ubashomima mbutulyaabo twatuma myooni ku cikombelo ca Galatiya.

³ Tatesu Leza u Mwami Jeso Kilisito amupe luse u luumuno.

⁴ Kwaamba atufwutule kumusela wezu washibi, Kilisto wakaaba bumi bwakwe ukaambo ka shibi shesu, kwiita mukulemeka luzando lwaka Leza Tatesu.

⁵ Bulemu nabube kwa Leza shikwense u shikwense! Ameni.

Makani Mabotu ali Omwi

⁶ Ume ndamuzhingwa! Muciindi cishoonto ceci caita mwamukaka wezo wakamoompolola kwiita mu luse lwaka Kilisito, mwakanka kutambula makani aanji.

⁷ Mubwini kwiina aanji makani mabotu, pele ndaamba bobo nkaambo nkubali bamwi ubamupenzha nkaambo balasoleka kucinca makani aka Kilisito.

⁸ Pele naa kuli umwi, wesu naaba anjelo wa kwizeulu, weza kumukambaucila mulumbe uyishenye u wezo ngutwakamukambaucila, wezo naabe muntu mushinganye!

⁹ Umbona mbutwakaamba kale, uninzho ndabweelela ulimwi, naa nkwaali umukambaucila mulumbe unji kuleka welya ngumwakatambula, wezo naabe mushinganye!

¹⁰ Sa ndaamba bobo cilaba ukoya ndaliboshezha ku bantu naaba kwa Leza? Na ambweni ndazanda kuzhibwa ku bantu? Kuti indaakukwete wezo muzeezo indataakuli muzhice waka Kilisito.

Paulu mbwa Koompololwa kwa Leza

¹¹ Inzho nubakwesu ndazanda kumushimwina kwaamba muzhibe ati wezu mulumbe mubotu ngwinkambauka wiina ukahwa ku muntu pe.

¹² Ndiina kuutambula kuhwa ku muntu ulya maila, ulimwi kwiina muntu wakanjiisha pe. Ngu Jeso Kilisito lwakwe mwini nguwakanzubululila.

¹³ Mwakashimwinwa bumi bwangu mbubwakaakubele ciindi indakaakupona mubukombi bwaci Juda, mbundakakupenzha cikombelo ca Leza, umundakasoleka kuciyaya.

¹⁴ Ndime indakaakuli musolozhi akati kaba Juda bamusela wangu mubukombi bwaci Juda, ulimwi ncitalibanza ku makani atwaambo twa tunshiyanshiya ba shikale.

¹⁵ Pele Leza wakansala mu luse lwakwe ume ncitana ukuzhalwa, amane wenta kwaamba nkamusebezele. Naakazanda

¹⁶ kunzubululila Mwanakwe, kwaamba nkakambauke makani mabotu aka Jeso ku bantu bakunze, ndiina ku muntu nkundakaya kwaamba ambule,

¹⁷ nikuba kuya ku Jelusalemu kuli babo bakaakuli batumwa kale ume ncitana kuba. Ncindakacita nkuya bulyo ku Alebiya mane ndazhokela ku Damasikasi.

¹⁸ Kwiite myaka yotatwe indakaya ku Jelusalemu u kubuzha makani kwa Pita, twakakala aze insunda shobile.

¹⁹ Ndiina unji mutumwa ngundakabona cita bulyo Jemusi munina Mwami Jeso.

²⁰ Oonse aza ngundamuletela meni meni alishinizhe ku bushu bwa Leza!

²¹ Kuhwaawo, ndakaya kumashi a Siliya uku Silisiya.

²² Ku ciindi ceco bantu mu shikombelo shamu Judiya kabatenzhi.

²³ Kabateelele bulyo impuwo njibakaakwaamba bantu yakupenzha cikombelo, pele inzho nguukambauka makani a lushomo ndwaakaakuzanda kuyaya!

²⁴ Ubobo bakamutembaula Leza ukaambo kangu.