1 Timoti 1 - Izwi lya Leza

¹ Ndime Paulu, mutumwa waka Kilisito Jeso kwiita mu kuzanda kwa Leza Mufwutuli wesu u Jeso Kilisito uli mbubulanjizhi bwesu.

² Ndalembela Timoti mwanangusha mu lushomo, Leza Taata u Kilisito Mwami wesu akupe luse u lweenzo u luumuno.

Kucenjezha shaba Maayi Babeshi

³ Umbona mbundakakushimwina indakaakuya ku Masedoniya, kushite mu Efesusi kwaamba ubaleshe babo bantu bayiisha injiisho shabubeshi.

⁴ Baambile bataakusowa ciindi cabo kubandika twaano twakutamikizhanya u kwaamba mazhalane a tashimpa, sheshi tacisumpula mulimo wa Leza shilaleta bulyo mizeezo ya bubeshi, kubaala injiisho sha Leza shiletwa u lushomo.

⁵ Muzeezo wamalailile aza ngwa kubusha busha lufwuno luhwa mu monzo usalala u mizeezo mibobu u lushomo lwini lwini.

⁶ Bamwi bantu bakazhimina bakaleka kucilila inzhila shalushomo, bapamine misalo yabulimbushi.

⁷ Balazanda kuba ba maayi ba Mulawo wa Leza, pele tabacizhi ncibaamba, ulimwi tabashiteeleli shintu nshibapandulula.

⁸ Tulizhi ati mulawo mubotu kuti muntu woosebezha bweelele.

⁹ Ceci cilaamba ati tulyeelele kuzhibaluka ati mulawo toopangilwa baluleme, ngwa babo basotoka milawo u bayazhi u babo ba shishibi batezhi Leza umbumi bwabo. Ngwa babo batakombi, bayaya ma ushabo uma nokwabo, bayazhi,

¹⁰ ba shimamambe, ba shikoona u balombwana nokwabo, batewu ba bantu, babeshi u babo bapa bumboni bwa bubeshi naa babo bacita kufwumbwa cintu cikazhanya injiisho shabushomi bwini bwini.

¹¹ Yezhi injiisho ya Makani Mabotu njindakapewa kuhwa kwa Leza mulemu ulimwi ulyeelele kutembaulwa.

Luse lwa Mwami Leza

¹² Ndamulumba Kilisito Jeso Mwami wesu wakampa insana ukunsala kwaamba musebezele mulimo nkaambo wakambona kushomeka.

¹³ Nikuba ati limwi ndakaakumusampaula u kumupenzha u kutuka bantu ba Leza, ulimwi ndakaakuli shicisapi. Pele Leza wakamfwila luse nkaambo ndakaakuli muntu wiina ncezhi utashomi.

¹⁴ Inzho Mwami wesu wakamfwila luse lunji lunji ukumpa lushomo u lufwuno, shalo shiyanwa mulukamantamo u Kilisito Jeso.

¹⁵ Kaambo keni keni keelele kutambulwa u kushomwa nkukaka; Kilisito Jeso wakeza anshi kwiza kunununa ba shishibi, inzho ume ndime imbabaala kubisha,

¹⁶ pele ceci ncicakapa kwaamba Leza amfwile luse, kwaamba Kilisito Jeso ansebezhe kuba citondezho cikando ca bu shicamba ku ba shishibi bati bakamushome, kwaamba abo bakatambule bumi butamana.

¹⁷ Inzho ku Mwami wa shikwense, utafwi, utabonwa, Leza womwi nana, akube insana u bulemu shikwense u shikwense. Ameni.

¹⁸ Inzho mwanangu Timoti ndakupa malailile aza umbona mbwaakashinshimwa kale kale kukwatilizha uwe, kwaamba naa waacilila, ulakonzha kulwa inkondo imbotu.

¹⁹ Ukwatishe lushomo u mizeezo iluleme. Bamwi bantu bayina nibakacilila mizeezo yabo iluleme ubobo lushomo lwabo lwakaloba.

²⁰ Ali baba kakuli Himeneyusi u Alekizanda, balo babo mbundakasubula indakabaaba kwa Shaatani, ceci cilabayiisha kuleka kusampaula Leza.