ƆDĀ NĒÉ MAFÚ LƐ UJƆ́ƆNI 1 - Ubáyíbu kú Idɔma

¹ Ɔdā nēé tá tū ɔkpá nyā ā wɛ ɔdā nɛ̄ Ujísɔ̄si Ohɔ́nyɛtá mafú ā. Ɔdā nōó mafú nyā ŋmá ɛgiyí Ɔwɔicō. Ɔwɔicō lɛ ɔdā nyā mafu lɛ ɔ́, cɛ́ɛ́ kóō lɛ aɔ́dā nēe í yá eko kpiií nōo ī wā ā mafú lɛ ācɛ nēe ī cɛ̄ ɔ̄ ɛhɔ̄ ā. Ujísɔ̄si Ohɔ́nyɛtá le alelékwū-ōtɛ̄hɔ̄ kú nū tɛ̄hɔ̄ kóō lɛ ɔdā nēé mafú lɛ ɔ́ nyā da Ujɔ́ni, ɔ̄cotɛ̄hɔ̄ kú nū.

² Anɔ́ɔ Ujɔ́ni lɛ ɛjɛ̄ɛ̄jī ɔdā nēé mafú lɛ ɔ́ ā kpó ka wɛ̄ɛcɛ á. Olɛhɔ̄ nōo ŋmá ɛgiyí Ɔwɔicō mɛ́mla ɛlā ɔkwɛ̄yi nɛ̄ Ujísɔ̄si Ohɔ́nyɛtá mafú ā yɔ̄ á.

³ Ɛyí kú ɔ̄cɛ nōo géē jé olɛhɔ̄ nyā nōo ŋmá ɛgiyí Ɔwɔicō ā tɛ́ɛcɛ ā kóō le lɔhi. Ákú ācɛ nēe kē í jāhɔ̄ lɛ ɔ́ klla lɛyítáajɛ lɛ ɔdā nɛ̄ olɛhɔ̄ ā ka ā kéē le lɔhi. Ohígbū ka eko nɛ̄ aɔ́dā nēe bá ā géē yá ā le kwu ajaajɛ ɛɛ́.

Okónu nɛ̄ Ujɔ́ni hɛ́ tū aícɔ́ɔci ahāapa ā

⁴ Ami Ujɔ́ni yɔ̄ ī tɔ́kpá fu aícɔ́ɔci ahāapa nēe bá Ésīya nɛ̄ŋ́cɛ́ ā á. Ɔwɔicō nōo yɔ̄ abālɔbányā, nōo tɛtɛ yɔ̄ ŋmá ikée, nōo klla ī wā ɛcɔ̄bū ā, mɛ́mla aálelékwū ahāapa nēe bá iyɔ̄bū akpa kú ɔcɛ́ kú nū ā kéē je ɛhi ŋmá lɛ ihɔtū kú Ɔwɔicō mɛ́mla ɛbɔ́ lɛ aá.

⁵ Ujísɔ̄si Ohɔ́nyɛtá, nōo ī cījáalí kú ɔkwɛ̄yi lɛyíkwu Ɔwɔicō ā, ɔ̄cɛ aflɛ́yí nōo héyī ŋmá ɔlékwū, nōo klla wɛ ɔcɛ́ kú aɔ́cɛ́ kú ɛcɛ nyā ā, kóō je ɛhi ŋmá lɛ ihɔtū kú Ɔwɔicō mɛ́mla ɛbɔ́ lɛ aá dúú. Owóofu mɛ́mla odúúdú íkwu kóō yɔ̄ lɛ Ujísɔ̄si Ohɔ́nyɛtá nōo ī yíhɔtū alɔ, klla lɛ alɔ hɛ́tá ŋmá íne nɛ̄ alɔ bīya ā ŋmá lɛ ikwū nōó kwú ohígbū alɔ ā piyóó.

⁶ Ó klla le alɔ yá ajɔ̄ɔ̄cɛ́ éwo kú ācogwɛ́ɛya, kú alɔ kē cɛ̄ Ɔwɔicō nōo wɛ ádā nū ā ɛhɔ̄. Aamí.

⁷ Mɔ́ɔ̄, ó yɔ̄ ī wā ipú ojuja! Ɛjɛ̄ɛ̄jī ācɛ géē má ɔ̄, kwu ācɛ nēe gwū ɔ̄ odée ā. Ɛjɛ̄ɛ̄jī ācɛ nēe bá ipú ɛcɛ nyā ā géē jikwū nū. Ɛ́gɔ́ɔmā nōó gáā wɛ á. Aamí.

⁸ Óndú ā nōo wɛ Ɔwɔicō ā kahíníī, “Ami wɛ aflɛ́yí, ami kē wɛ ámōōmɛ ā. Ami yɔ̄ abālɔbányā á, ami tɛtɛ yɔ̄ ŋmá ikée á, ami kē í wā ɛcɔ̄bū á.

Ujɔ́ni má Ujísɔ̄si ipú ɛbɛ́

⁹ N wɛ Ujɔ́ni ɔyínɛ̄ aá. Bɛ̄ɛka aá, n wɛ ɔ̄cɔ̄lóhɔ́nyɛtá nēe ī móōwē klla ī lɔ́tū, ɛ́gɛ́nɛ̄ ō ī yá ācɛ nēe wɛ ācɛ kú ajɔ̄ɔ̄cɛ́ kú Ohɔ́nyɛtá ā. É kwú um tá idɔ kú Upátīmɔsi, ohígbū ka n cɛ̄hɔ̄ kú Ɔwɔicō tɛ́ɛcɛ, klla kē ka ɔkwɛ̄yi nɛ̄ Ujísɔ̄si mafú ā tɛ́ɛcɛ.

¹⁰ Ɛ̄cī kú Óndú ā éyi, Alelékwū kú Ɔwɔicō ā wā í kwú um ú. Anɔ́ɔ n pó ɔkɔ nɛ̄hi éyi, nōo kɛlā bɛ̄ɛka opo ā, igbīhi um.

¹¹ Ɔkɔ nōo yɔ̄ ī kɛlā ā kahíníī, “Lɛ ɔdā nɛ̄ a gáā má ā tá tū ɔkpá, cɛ́ɛ́ ká ā kwú ɔkpá ā ú tɛ̄hɔ̄ ga aícɔ́ɔci nēe bá ipú aígelī ahāapa nēe bá nyā. Iyē uwā wɛ Ɛ́fēsɔsi, Usimɛ́ɛ́na, Upɛ́gámum, Utiyátira, Usádisi, Ufiladɛ́fiya, mɛ́mla Ulawodésiya.”

¹² Eko nɛ̄ n leyī pīya kú um má ɔ̄cɛ nōo yɔ̄ ī kɛlā ga um ā, anɔ́ɔ n lɛ aɔ́dā o lɛ agege cɛyí uwā ahāapa nēé bī ugóolu yā má á.

¹³ Anɔ́ɔ n má ɔ̄cɛ éyi nōo lɛbɛ̄ɛka ɔlɛɛcɛ ā ipú aɔ́dā o lɛ agege ce uwá ā. Ó lɛ awulú nōo kwu ɔ́ ikpó wiye. Ó kē lɛ ɔdōgbɛ̄ɛ́nyɔ́ nēe bī ugóolu yá ā kwú ɔtū.

¹⁴ Īnyīlɛ̄yí kú nū wɛ ɛnɛ̄hɛ́ bɛ̄ɛka owú otutú ā. Īkpéyī kú nū yɔ̄ ī cɛ̄ bɛ̄ɛka ígblɛ́nyī ɔlá ā.

¹⁵ Ikpó kú nū fíyáajɛ bɛ̄ɛka oje udɔ nēé na ŋmá útuló klla lɛ ɔ́ nya péee ā. Ɔkɔ kú nū kē ī kɛlā bɛ̄ɛka éŋkpɔ̄ ɔkpá nɛ̄hi nōo gē pɛ́ wāajɛ ŋmá icō ā.

¹⁶ Ó bī aínyílɔ́ɔwɔ ahāapa abɔ̄lɔ́ná kú nū, ɔkpacaŋ́gelī o leyī ɛpa nōo lulé nɛ̄hi ā yɔ̄ ī bɛ̄cɛ ŋmá okónu kú nū. Eyī kú nū ī ceyī bɛ̄ɛka ofíyajɛ kú ɛnɔ oyɛ̄ɛyí ā.

¹⁷ Eko nɛ̄ n lɛ ɔ́ má ā, n mágwōnū wɔɔlɔ bɛ̄ɛka okwū ā pī ikpó kú nū. Amáŋ ó kwú abɔ̄lɔ́ná kú nū ú ce um, anɔ́ɔ ó kahíníī, “Á yúúfi ŋ́. Ami wɛ aflɛ́yí á, ami kē wɛ ámōōmɛ á.”

¹⁸ Ami lɛ oyēeyī á! N gekwú, amáŋ abālɔbányā n kē yēeyī piyóó. Ami bī ayígodó kú ikwū mɛ́mla ákú ɔlékwū á.

¹⁹ Lɛ aɔ́dā nɛ̄ a ī má ā tá táajɛ mɛ́ɛ́nɛ. Aɔ́dā nēe bá ī yá abālɔbányā mɛ́mla aɔ́dā nēe kē í yá ɛ̄cɔ̄bū ā.

²⁰ Ɛyí kú aínyílɔ́ɔwɔ ahāapa nɛ̄ a má abɔ̄lɔ́ná kú um ā, mɛ́mla ákú aɔ́dā o lɛ agege ce uwá ahāapa ā yɔ̄ á. Aínyílɔ́ɔwɔ ahāapa ā kwɛyí ācotɛ̄hɔ̄ nēe gē leyīkwu aícɔ́ɔci ahāapa ā. Aɔ́dā o lɛ agege ce uwá ā kwɛyí aícɔ́ɔci ā.