ĀCƐ UFÍLIPĀYI 1 - Ubáyíbu kú Idɔma

Ɔkpá nɛ̄ Upɔ́lu tá fu ācɔ̄lóhɔ́nyɛtá nēe bá Ufílipāyi ā

¹ Ami, Upɔ́lu mɛ́mla Utímōti, ācocɛ̄hɔ̄ kú Ohɔ́nyɛtá Ujísɔ̄si ā, bá gē tɔ́kpá nyā á. Alɔ tɔ́kpá nyā fu odúúdú aá nēe wɛ ācɔ̄lóhɔ́nyɛtá nēe lā Ufílipāyi ā, ācɛ nēe pīyatɔ̄há mla Ohɔ́nyɛtá Ujísɔ̄si, kwu aótrɛ̄yí kú ācɛ icɔ́ɔci mɛ́mla ācotáācɛ-abɔ̄ ipú icɔ́ɔci.

² Ɔwɔicō Ádā alɔ mɛ́mla Óndú Ujísɔ̄si Ohɔ́nyɛtá ā kéē je ɛhi kú eyīnyinyi lɛ aá nɛ̄ɛ̄nɛ̄hi, kéē klla yá kú aá bá ɛbɔ́.

Ɔkɔ nɛ̄ Upɔ́lu gbā ohígbū ācɛ nōo ī jɔ́kpá kú nū

³ N tá Ɔwɔicō kú um ahínyá eko dúúmā nɛ̄ n gbɛlá kwu ɔdā nɛ̄ aá yá ā.

⁴ Eko dúúmā nɛ̄ n gē gbɔ̄ɔkɔ lɛ Ɔwɔicō kwɛyí odúúdú aá nɛ̄, ɔtū kú um wɛ ɛnɛ̄hɛ́.

⁵ Ɔtū kú um wɛ ɛnɛ̄hɛ́ ohígbū ɔwɛ nɛ̄ aá tá um abɔ̄ ipú úklɔ́ kú ɔna kú ɔ̄kōolɔhi ā nɛ̄ n tá lɛ ācɛ ŋmá ɛ̄cī aflɛ́yí nɛ̄ aá cɛ̄ɛ̄lā ā jāā kwu abālɔbányā ā.

⁶ Abɔ̄ ó le lɛ ā, n jé kpɔ́cíí ka Ɔwɔicō nōo gbɔɔ́ ō yúklɔ́ olɔhi nyā ipú aá géē yɔ̄ gē yúklɔ́ ā gɔbɔ̄ɔ̄bū, jāā gbéeko nōó lɛ ɔ́ ŋmɛ́yí ɛ̄cī nɛ̄ Ohɔ́nyɛtá Ujísɔ̄si í pīyɛyí ā.

⁷ Eko dúú nɛ̄ n lɛ ɛlá gbo kwu aá nɛ̄, ɔtū kú um gē wɛ ɛnɛ̄hɛ́. Ó le kpaakpa kú um gbɛlá ɛ́gɛ́nyā lɛyíkwu aá. Ohígbū ka aá tá um abɔ̄ ipú úklɔ́ nɛ̄ Ɔwɔicō ményinyi um je gā um ā, kwu abālɔbányā nēé kwú um tá agbá ā mɛ́mla eko nɛ̄ n lɛ iyī um gē tá ācɛ nēe gē ka ɔdōōbɔ̄bí lɛyíkwu ɔ̄kōolɔhi ā ohi o yá ɛ́ɛ́ kú um yá kú ācɛ kéē mīyɛ ɛlā kú ɔ̄kōolɔhi ā cɛ̄ kpɔ́cíí.

⁸ Ɔwɔicō wɛ ijáalí kú um ka n kɛlā ɔkwɛ̄yi lɛ aá eko nɛ̄ n ka ka aá he um ɔtū ɔwɛ ékpó nɛ̄ aá he Ohɔ́nyɛtá Ujísɔ̄si abɔ̄yī nū ɔtū ā.

⁹ N gē gbɔ̄ɔkɔ ká aá yɔ̄ ī yíhɔtū tá iyī aá nwuné nwuné cɛ́ɛ́ ká aá lɔfú jé ɔdā nōo wɛ ɔkwɛ̄yi nōo í yá kú aá kɛpɔ̄ okpaakpa glá.

¹⁰ Cɛ́ɛ́ ká aá lɔfú je ɔdā nōo lɔhi fíyɛ́ dúú ā. Anɔ́ɔ aá gáā lɛ ɔdōōbɔ̄bí dúúmā iyē ŋ́, é ke gáā yá ɔdā dúúmā nēé géē bī le ŋmó aá okónu ɛ̄cī nɛ̄ Ohɔ́nyɛtá géē wā ā ŋ́.

¹¹ Kú odúúdú ɔdā nɛ̄ aá géē yá ā kóō lɔfú lɔhi ɔkwɔ̄ɔ̄kwɛ̄yi, Ujísɔ̄si Ohɔ́nyɛtá ōfūnū lɔfú yá kú aá yá ɛ̄nyā glá á, cɛ́ɛ́ ka ācɛ kéē lɔfú lɛ ojīlīmā ce Ɔwɔicō, kéē klla cɛ̄tra iyē nū.

Ɔ̄cɛ yēeyī kóō cɛ̄ Ohɔ́nyɛtá ɛhɔ̄

¹² Ayínɛ́ um, ācɔ̄lóhɔ́nyɛtá ɔ́mpā um, n tíne ká aá le jé ka ɛdɔ ōwē nɛ̄ n má ā cɛ̄ lɛ úklɔ́ kú ɔ̄kōolɔhi ā le jɛ̄ gɔbū.

¹³ Ohígbū ɛ̄nyā odúúdú aícɔ́ɔja nēe gē gbō agblɔ̄cɛ́ ā mɛ́mla odúúdú ācɛ ohile nēe bá amānyā ā, le jé kéē tū um agbá ohígbū ka n cɛ̄ Ohɔ́nyɛtá ɛhɔ̄.

¹⁴ Agbá nēé tū um ā cɛ̄ lɛ ɛyínɛ̄hi ayínɛ́ um ācɔ̄lóhɔ́nyɛtá ā lɔtūce Óndú ā fíyɛ́. É kē yúúfi gɛ ŋ́, é lɔtū lɛ gbɔɔ́ ō tɔ́ɔna kú olɛhɔ̄ ā tɛ́ɛcɛ pāāla eko dóódu.

¹⁵ Ācɛ ōhī kú ayínɛ́ nēe wɛ ācɔ̄lóhɔ́nyɛtá mla alɔ ā gē tɔ́ɔna kú Ohɔ́nyɛtá lɛ ācɛ ohígbū ímálānyī alɔ. É wɛ ācɛ o yíkpɛ́lā tá ācɛ ɔhá, amáŋ ācɛ ɔhá ā gē tɔ́ɔna kú Ohɔ́nyɛtá ā ŋmá ɔtū ékpó.

¹⁶ Ɛdɔ ācɛ ɛ́gɛ́nyā gē tɔ́ɔna ā ŋmá lɛ ihɔtū. Ohígbū kéē jé ka Ɔwɔicō kwú úklɔ́ u gā um ká n̄ yá kú ācɛ kéē le jé ka ɔ̄kōolɔhi ā wɛ ɔkwɛ̄yi.

¹⁷ Amáŋ ígwu kú ācɛ ɔhá nōo ī mímálānyī ā, í tɔ́ɔna kú olɛhɔ̄ lɛyíkwu Ohɔ́nyɛtá ŋmá ɔtū o yēŋēē ŋ́, amáŋ ohígbū ɔdā nēé gē dɔɔ̄kā lɛ iyī uwā ofūnū. É gbɛlá ka aá géē yá kú um móōwē fíyɛ́, abɔ̄ nɛ̄ n yɔ̄ agbá amānyā ā.

¹⁸ Ɔdā nēé dɔɔ̄kā ō yá ā í junwalu gā um ŋ́! Ɔtū he um lɛyíkwu ɔ́. Ɔdā ékpó nōo cɛgbá ā wɛ ka, é bī ɔwɛ otɔ́ɔtɛ́ dóódu le tɔ́ɔna kú olɛhɔ̄ lɛyíkwu Ohɔ́nyɛtá. Amáŋ ó kōō wɛ o tɔ́ɔna ohígbū Ohɔ́nyɛtá oo ámāŋ ka ohígbū itene nēé í dɔɔ̄kā á nɛ̄ oo. Ɔtū géē yɔ̄ gē he um.

¹⁹ Ohígbū ka n jé kpɔ́cíí ka ohígbū ɔkɔ nɛ̄ aá yɔ̄ gē gbā ā mɛ́mla ohígbū otábɔ nōo ī ŋmá ɛgiyí Alelékwū kú Ujísɔ̄si Ohɔ́nyɛtá ā, é géē hɛ́ um tá.

²⁰ Ɔdā nōo kwu um ɔtū nɛ̄hi mɛ́mla eyīyōce kú um ā wɛ ka n̄ géē yá ɔdā nɛ̄ n cíkā ō yá ā ojigógó, cɛ́ɛ́ ká n̄ lɔfú lɛ nɛ̄ɛ̄nɛ̄hi eko dóódu, ofíyɛ́ dúú abālɔbányā kú n̄ kɛlā nɛ̄ ń gáā yúúfi ɔ̄cɛ dúú ŋ́. Cɛ́ɛ́ ipú ɔdā nɛ̄ n géē yá ā, n géē yá kú ācɛ kéē lɛ ojīlīmā ce Ohɔ́nyɛtá, ó kōō oŋmá lɛ ɔdā nɛ̄ n gē yá abɔ̄ n yēeyī kpɔ́ ɛ́ɛ́ mā, ámāŋ eko nɛ̄ n gekwú.

²¹ Ɔdí wɛ itene kóō yɔ̄ gē yēeyī kpɔ́ á? Ákú um ā, ɛyí kú oyēeyī wɛ o yɔ̄ ī cɛ̄ Ohɔ́nyɛtá ɛhɔ̄. Ikwū kú um kē géē bī itene gé um.

²² Amáŋ ɔ́dāŋ ka n yēeyī gɔbū kpɔ́, nɛ̄ n lɔfú yúklɔ́ tū ɔ̄ nōo géē tīile glá. Ɛ́gɛ́nɛ̄ ó lɛ nyā, ń jé kpɔ́cíí ŋ́, ka n̄ kwú oyēeyī gɔbū ú nɛɛ kɛ̄ɛ ká n̄ kwú íkwū ú.

²³ É yɔ̄ gē pi um ŋmá abɔ̄ ɛplɛ́ɛpa, ó kwu um ɔtū nɛ̄ɛ̄nɛ̄hi kú um yɔ̄ ī yēeyī kpɔ́ ipú ɛcɛ amānyā gɛ ŋ́, n tíne cɛ́ɛ́ ká n̄ gaá yɔ̄ mla Ohɔ́nyɛtá.

²⁴ Amáŋ o yá ɛ́ɛ́ ká n̄ yɔ̄ gē tá aá abɔ̄ ā, ó cɛgbá fíyɛ́ ká n̄ yēeyī kpɔ́.

²⁵ N jé kpɔ́cíí ka n géē tíne ká n̄ yēeyī gɔbɔ̄ɔ̄bū. N géē yēeyī gɔbū kú n tá aá abɔ̄, kú ɔtū kú aá kóō wɛ ɛnɛ̄hɛ́ abɔ̄ aá gē lɔtūce Ohɔ́nyɛtá ā.

²⁶ N géē yá ɛ̄nyā cɛ́ɛ́ eko nɛ̄ n le pīyɛyí wā í tá aá kpɔ́, aá géē lɛ ɔdā nōo yá nɛ̄ aá géē bī Ohɔ́nyɛtá Ujísɔ̄si gwō ohígbū ɔdā nōó yá gā um ā.

²⁷ Ɔdā nōo cɛgbá ā wɛ ka aá yēeyī ɔwɛ nɛ̄ ɔ̄kōolɔhi lɛyíkwu Ohɔ́nyɛtá dɔɔ̄kā kú aá yɔ̄ ā, cɛ́ɛ́ ka ɔ́dāŋ nɛ̄ n wā í má aá glá ɔ́ɔmā lɔhi, ɔ́dāŋ nɛ̄ ń wā glá ŋ́, ɔ́ɔmā kē lɔhi. N géē pó ŋmá ɛgiyí aá ka aá bī ɔtū ékpó le yá ɔdā ɛdɔ ékpó mɛ́mla odo ékpó nɛ̄ ɔdā dúúmā í gáā jíla aá iyē ŋ́, abɔ̄ aá bá yɔ̄ ī nunu tɔ̄há ohígbū ɔtōōce Ɔwɔicō nɛ̄ ŋmá ɔ̄kōolɔhi ā.

²⁸ Aá híīī yúúfi aólɛlā kú aá ŋ́. Aá híīī kwu ŋmá ɛgiyí uwā ŋ́, ɔ́dāŋ nɛ̄ aá kwu ŋ́, ó géē wɛ ocābɔ̄ lɛ uwá kéē yá aá lé glá ŋ́. Aá géē yálé ohígbū ka Ɔwɔicō yá ɛ́ɛ́ nɛ̄ aá géē yá uwā lé á.

²⁹ Ohígbū ka Ɔwɔicō lɛ ɔ̄ yá tɔ́ɔtɛ lɛ aá kú aá yúklɔ́ lɛ Ohɔ́nyɛtá oŋmá lɛ o cɛ̄ɛ̄lā kú nū mɛ́mla oŋmá lɛ o móōwē ohígbū nū.

³⁰ Abālɔbányā aá lɔfú pīyatɔ̄há mla um ipú unu nɛ̄ n yɔ̄ gē nu ohígbū ɔ̄kōolɔhi ā, ɛ̄nyā wɛ unu ɛdɔ ékpó nɛ̄ aá má um yɔ̄ gē nu eko nōo yɛ ŋmá igbīhi ā, nɛ̄ aá kē pó abālɔbányā ka n kē yɔ̄ gē nunu gɔbū kpɔ́ ā.