UJƐRƐMÍYA 6 - Ubáyíbu kú Idɔma

Aólɛlā le íbɔm ce tū Ujerúsālɛm

¹ Ācɛ ipɔ́ɔma kú Ubɛ́njamīn, aá kwinya ŋmá ipú Ujerúsālɛm nyɔ̄ í tayínū! Aá lɛ opo tá Utekówa, cɛ́ɛ́ ká aá lɛ ɔlá gwó Ubét Uhácērem kóō cābɔ̄ ka ámíyā nɛ̄hi ŋmá ajɛ ɛhícō gáā wā í kpó aá yíífi ɛɛ́.

² Igelī nɛ̄hi kú Ujerúsālɛm, a lɔhi nɛ̄hi bɛ̄ɛka ajɛ ácí ō lúlé kú aálá ā. Amáŋ n géē je uwɔ yíífi.

³ Aɔ́cɛ́ géē kpó aícɔ́ɔja kú uwā wā í kwu aáklɔ̄kpɛ kú ɛfú kú uwā abɔ́ɔ bɛ̄ɛka ɛ́gɛ́nɛ̄ ācogbāálá gē kpó aálá kú uwā wā ɛga nēé í lúlé ā. Ɔnyɔɔnyɛ kú uwā géē lɛ áklɔ̄kpɛ kú ɛfú kú nū kwu ajɛ tū igelī nɛ̄hi ā ɛga dóódu nōo he ɔ́ ɔtū ā, ɛ́gɛ́nɛ̄ ācogbāálá gē kwú ajɛ lɛ aálá kú uwā ā.

⁴ Aɔ́cɛ́ ā géē bá ī ka kahíníī, “Aá tútū ká ālɔ̄ kpɛ́fú tú ācɛ kú Ujerúsālɛm! Aá tútū! Ālɔ̄ kpɛ́fú tá uwā ɔlɛ́ɛnɔ.” Ámāŋ é klla géē ka kahíníī, “Elé, eko le gla ɛɛ́, ɔ̄nɔ̄ɔ̄nɛ̄ le gbo ɛɛ́, otú le bá ō bī ɛɛ́.

⁵ Ó lɛ ā, alɔ géē kpɛ́fú tá uwā otú, ká alɔ kwú aɔ́lɛ́ kú uwā nēé gwó lɔfú nɛ̄hi ā ú wúlatāajɛ.”

⁶ Óndú ā nōo lɔfú fíyɛ́ dúú ā, lɛ ɔ́da je lɛ aɔ́cɛ́ nēe bá nyā kéē lɛ ɔcí kpó hɛ́ wā ajɛ kéē lɛ úbɔ́ kú íbɔm mā jīla Ujerúsālɛm tá. Ohígbū ó kahíníī, “N géē yá igelī nɛ̄hi nyā italā piíí ohígbū ka ācɛ nēe ī pīya ācɛ tū ā wɛ omōōmu nū.

⁷ Ɛ́gɛ́nɛ̄ njɔlɔ gē bū éŋkpɔ̄ ɛ̄yīpɛ̄ piyóó ā, ɛ́gɔ́ɔmā nɛ̄ ācɛ kú Ujerúsālɛm gē bī ɔ́bíipú eko dóódu á. N gē pó ɔ̄kā ka ācɛ nēe bá ī lɔnɔɔtū klla bá ī kpó ācɛ yíífi ipú igelī ā eko dóódu. N kē yɔ̄ ī má ācɛ nēé yá ágbe mɛ́mla ācɛ nēe bá ī kwú ɛbɛɛbɛ.

⁸ Ācɛ kú Ujerúsālɛm, aá jāhɔ̄ lɛ ahɔ̄ nɛ̄ um yɔ̄ ī pi aá anú ā. Ámāŋ n géē cīgbīhi kwu aá. Ámāŋ n géē je igelī nɛ̄hi ká aá tá alácɛ̄, nɛ̄ ɔ̄cɛ dúúmā í gáā lā anú ŋ́.

Ācɛ Ísrɛ̄lu gē yíīkpɛ̄yí olɔfú

⁹ Óndú ā nōo lɔfú fíyɛ́ dúú ā kahíníī, “É géē jila Ísrɛ̄lu dúúdú iyē tɛnɛ́ɛ́ kéē lɛ ācɛ nēe hile ā kpó yíífi, ɛ́gɛ́nɛ̄ gē jila ɔcí ufáyin iyē lɔɔlɔhi igbɔɔ́mpā kéē lɛ ikpō dóódu nēe hile ā kpó wū nɛ̄ īkpō dúúmā í gáā hile anú ŋ́ má.”

¹⁰ Anɔ́ɔ n tá ohi kahíníī, “Ɔ̄cɛ dúúmā í jāhɔ̄ gā um, eko nɛ̄ n gē kɛlā lɛ uwá, ká n̄ pī uwá ahɔ̄ ā ŋ́. É ī yá īkpɛ̄yí olɔfú klla tá ō jāhɔ̄ lɛ ɛhɔ̄ nɛ̄ a tū um fu uwá ā. É gē yɛhɛ tū olɛhɔ̄ nɛ̄ a tū um ka amíyɔ̄ cɛ̄ lɛ uwá ā. Ó klla he uwá ɔtū ŋ́.

¹¹ Óndú, ɛ́gɛ́nɛ̄ a yɔ̄ ī cɔ̄nū lɛyíkwu uwá ā nɛ̄ um yɔ̄ ī cɔ̄nū lɛyíkwu uwá dúú ā. Ń kōō bī ícɔ̄nū ā háyi glá ɛ́ɛ́ gɛ ŋ́. Anɔ́ɔ Óndú ā da um ka amíyɔ̄ cɔ̄nū ká anúɔ da ɛjɛ̄ɛ̄jī ācɛ kú Ísrɛ̄lu. Kwu ayípɛ̄nɛ̄ŋ́cɛ́ nēe bá ī hijā uláyi mɛ́mla aɛ́drɔ́ nēe ī jīla tɔ̄há ā. Kwu aɔ́bá mɛ́mla anyā. Kwu anyākwɔ́cɛ mɛ́mla aókplícī nɛ̄hi.

¹² N géē je aɔ́lɛ́ uwā, mɛ́mla aájɛ̄hɔ̄ kú uwā mɛ́mla anyā uwā kpó lɛ aólɛhɔ̄ kú uwā. N gē bī ɔfú kú um le yá ācɛ nēe lā ipú ajɛ nyā ā italā.

¹³ Kwu ācɛnɛ̄hi mɛ́mla ācɛnɛ̄ŋ́cɛ́, ɔnyɔ̄ɔnyɛ̄ yɔ̄ ī tíne ō bī ɔwɛ újí le lɛ ije. Kwu ācomɛ́ɛbɛ mɛ́mla ācogwɛ́ɛya bá ī plla ācɛ dúú.

¹⁴ Ācomɛ́ɛbɛ mɛ́mla ācogwɛ́ɛya ɔ́ɔmā bá ī yá bɛ̄ɛka ɔdā nɛ̄ ágbe nɛ̄hi kú ācɛ ɔlɛ́ um ā í wɛ ɔdā dóódu ŋ́ mā ā. É bá ī ka ka ɔdā dóódu ɔ́ɔ le lɔhí ɛɛ́, nááná nɛ̄ ɔdā dúúmā í lɔhi ŋ́ mā.

¹⁵ É cíkā ō yá uwēyī ohígbū aɔ́dā īcíci nɛ̄hi nēé yá ā. Amáŋ é yá uwēyī dúúmā ɛ́ɛ́ nēé kōō jé ɛyí ō le kwū ajɛ ŋ́. Ohígbū ɔ́ɔmā, é géē pɛ́ kwú bɛ̄ɛka ācɛ ohile nēe géē kwú ā. Eko nɛ̄ n géē yá uwā italā ā, n géē kpó uwā yíífi dúúdú.”

Ísrɛ̄lu tá ɔwɛ kú Ɔwɔicō

¹⁶ Óndú ā yɔ̄ ī da ācɛ ɔlɛ́ nu kahíníī, “Aá háyi ɔnyɛ̄pa kú ɔwɛ ká aá má ɔ̄. Aá dɔɔ̄kā kéē ma ɔwɛ kú íkée ā fú lɛ aá. Aá klla tíne ɛga nɛ̄ ɔwɛ nōo géē bī aá ga ɛga ɔdōlɔhi ā yɔ̄ ā. Aá yɛ ɔwɛ ɔ́ɔmā, cɛ́ɛ́ aá kē í lā ɛbɔ́.” Amáŋ ācɛ ā tá kahíníī, “Ehé, alɔ í gáā yɛ ɔwɛ ɔ́ɔmā ŋ́.”

¹⁷ Óndú ā klla ka anúɔ lɛ ācogbāājɛ fu gbō ācɛ ā klla da ācɛ ā kéē jāhɔ̄ lɛ opo nɛ̄ ācogbāajɛ ā géē bá ī tá kéē pi aá ahɔ̄ ā. Amáŋ ācɛ ā tá kahíníī, “Alɔ í gáā jāhɔ̄ ŋ́.”

¹⁸ Óndú ā kahíníī, “Ohígbū ɔ́ɔmā, aéwɔhá, aá jāhɔ̄, cɛ́ɛ́ ká aá jé ɔdā nōo gáā yá ācɛ ɔlɛ́ um ā lɔɔlɔhi.

¹⁹ Ācɛ kú odúúdú ɛcɛ, aá jāhɔ̄! N géē yá ācɛ ɔlɛ́ um ā ífi ohígbū ojuju obɔ̄bí nēé húmáyī ī yá ā. N géē yá uwā itolā ɔ́ɔmā ohígbū ka é jāhɔ̄ lɛ ukɔ́ nɛ̄ um tū uwá ā ŋ́, é klla tá ō lɛyítáajɛ lɛ ɛlā kú um.

²⁰ Ɔdí wɛ itene kú ɔtulalī nēé gē bī ŋmá Uséba gé um ā mɛ́mla aɔ́dōōkpóocu ɔhá nēé ī kpó wā ŋmá aájɛ ɛga oligbó āa? Ń gáā mīyɛ ɛhi nēé ī kpó gé um ā ŋ́. Ɛya nēé ī gwó gā um ā í kē he um ɔtū ŋ́.

²¹ Ohígbū ɔ́ɔmā, n géē je ɔdā nōo ī hɛ̄ ɔ̄cɛ gwónū tá iyɔ̄bū ācɛ nēe bá nyā kéē lɛ ikpó gbo ɔ́ kéē gwōnū. Ɛjɛ̄ɛ̄jī uwā, kwú aádā mɛ́mla ayí, kwu ayípōklóbīya, ayípɔ̄nɔ̄nyā mɛ́mla aóladógbe géē pɛ́ kwú.”

Ɛfú géē ŋmá ɛhícō wā

²² Óndú ā kahíníī, “Ācɛ okpɛ́fú nɛ̄hi éyi bá ī wā ŋmá ajɛ ɔlɛ́ uwā nōo kwu ajɛ ɛhícō ā. É bá ī tútū ɛfú ŋmá ɛga oligbó ā gē wā.

²³ É lɛ tútū mla ɔtā mɛ́mla ōbō kú uwā. É lɔnɔɔtū nɛ̄hi, í klla ī ményinyi ɔ̄cɛ ŋ́. É ce ɛyí aɔ́nya kú ɛfú kú uwā bá ī wā kwūūū bɛ̄ɛka úgbagwú kú ísu ā. É le tútū ɛfú lɛyíkwu aá, ācɛ kú Ujerúsālɛm.”

²⁴ Ācɛ kú Ujerúsālɛm kahíníī, “Alɔ lɛ ɔ̄kā pó lɛyíkwu ācɛ ɔ́ɔmā ɛɛ́, ufi kē c­ɛ̄ le abɔ̄ hɛ́ alɔ iyē. Alɔ bá ī jɔ́ɔnɔ bɛ̄ɛka ɔnyā nɛ̄ ɔma lɛ ɔ́ kwú ā.

²⁵ Ɔ̄cɛ éyi gē da ɔ́mpā nū kahíníī, “Alɔ í bɛ̄cɛ ŋmá ɔlɛ́ ga ɛhɔ̄, ɛ́ɛ́ nɛ̄ alɔ gē jámá yɛ ɔwɛ ā gɛ ŋ́. Ohígbū ka aólɛlā kú alɔ bī iyɔ́fú. É kē bá ī wā í yá alɔ unwalu ŋmá ābɔ̄ dóódu.”

²⁶ Óndú ā da ācɛ ɔlɛ́ nū kahíníī, “Aá kwú īlī ekwu ú kpó wiiyē ká aá jikwū klla míya ajɛ. Aá yēkwu bɛ̄ɛka ɔ̄cɛ nōo ī yēkwu kú ɔyí ékpónú kú nū ā. Ohígbū ka ɔ̄cɛ nōo gē wā í je aá yíífi ā, í wā í kpɛ́fu tú aá acígilí.

²⁷ Ujeremíya, lɛ ācɛ ɔlɛ́ um jámá ká a má ɔdā nēé wɛ ā, ɛ́gɛ́nɛ̄ é gē já oje má ɔlá ā.

²⁸ Odúúdú uwā wɛ ācɛ ō yíīkpɛ̄yí olɔfú nɛ̄hi bɛ̄ɛka ɛ́gɛ́nɛ̄ oje udɔ mɛ́mla oje ɔlamu í gē tōō cē ŋ́ mā nɛ̄. Odúúdú uwā bá ī bá ɔlɔ́ɔlɛ́ ī híla ācɛ klla ī yá awanda. Odúúdú uwā le bīya kpɛ́mm.

²⁹ Útuló yɔ̄ ī kplá ɔlá nɛ̄hi nááná, īmīyōjó nōo bá ipú nū ā í ja bónū ŋmá anú ŋ́. Ɛ́gɛ́ dúú nɛ̄ um tíne ō yā āobɔ̄bíipú ā ŋmá ipú ācɛ ɔlɛ́ um nááná, ó tōō yá ŋ́.

³⁰ É lɛ ile dúúmā ŋ́. É lɛbɛ̄ɛka īmīyōjó kú oje nɛ̄hɛ́ áncā, ohígbū ka ami nōo wɛ Óndú ā tá uwā ɛɛ́.”