ISÍKƐ̄LU 1 - Ubáyíbu kú Idɔma

Ɛbɛ Aflɛ́yí kú Ɔwɔicō nɛ̄ Isíkɛ̄lu má ā ( 1.1—7.27 ) Akpa-ɔcɛ́ kú Ɔwɔicō

¹ Iyē um le ka Isíkɛ̄lu, ɔyí kú Ubúsi. N kē wɛ ɔ̄cogwɛ́ɛya. Ɛ̄cī ɔ́mɛhɔ̄ kú ɔyā ɛnɛ kú iháyí ɔmɛ ofucigwó ā, n lā mɛ́mla ācɛ Ujíyu nēe kpó abɔ̄fú ga ajɛ Ubábīlɔn ā. Alɔ bá okónu ísu kú Ucɛ́ba ajɛ kú Ubábīlɔn ā. Ícíícɛ ɔ́ɔmā ɔkpáncō kwú nwūla tū um eyī, n kē lɛ ɛbɛ má ŋmá ɛgiyí Ɔwɔicō.

² Eko nyā wɛ iháyí ɔmɛɛhɔ̄ nēé kwú Ujɛhóyākim abɔ̄fú ga ajɛ kú Ubábīlɔn á.

³ Okónu ísu kú Ucɛ́ba ipú ajɛ Ubábīlɔn abɔ́ɔ ā, n pó ba Óndú ā kɛlā gā um, ɔfú kú nū kē gā iyē kú um.

⁴ N je eyī gicō, anɔ́ɔ n má owu nɛ̄hi yɔ̄ ī tá kwūūū, ŋmá ɛhícō ā. Ɔwɔ yɔ̄ ī límanya ŋmá ipú ojuja nɛ̄hi éyi. Ɔkpáncō abɔ́ɔ kē yɔ̄ cɛ̄ maámaá. Ɛga nɛ̄ ɔwɔ yɔ i límanya ā, n má odée yɔ̄ ī ceyī ŋaáŋaá bɛ̄ɛka oje udɔ ā.

⁵ Anɔ́ɔ n má aódée nēe lɛbɛ̄ɛka, aɔ́dā olɛ oyēeyī ā ɔtāhɛ̄ kú owu nɛ̄hi ā. É lɛbɛ̄ɛka alɛɛcɛ ā amáŋ

⁶ éyééye kú uwá lɛ eyī ɛnɛ mla acá ɛnɛ.

⁷ Ikpó kú uwā kwu ajɛ kpaakpa, é klla lɛ āpīice bɛ̄ɛka ɛna ā. É bá i ceyī ŋáaŋáa bɛ̄ɛka ugóolu (oje ɔdɔ) nēé lɛ ɔ́ nya pélúú ā.

⁸ Mɛ́mla eyī ɛnɛ mɛ́mla acá ɛnɛ kú uwá ā, ɔnyɔ̄ɔnyɛ kú uwá klla lɛ abɔ̄ kú ɔ̄cɛ ɛnɛ ɛháajɛ aácá kú uwā. Abɔ̄ éyééye kwu ɛháajɛ acá éyééye.

⁹ É le acá kú uwā ɛplɛ́ɛpa nāndaa kwu īyī uwā klla lɛ ɔ́kíkā ɛnɛ yá. Ɛga dúúmā nēé ge yɛ nyɔ̄, é gé yɛ tɔ̄há, í gē pīyeyī ŋ́.

¹⁰ Éyééye kú aɔ́dā olɛ oyēeyī ɛnɛ nyā lɛ eyī ɛyɛ́ɛyɛ́yí ɛnɛ. É lɛ eyī kú ɔ̄cɛ iyɔ̄bū, eyī kú ágábá kwú abɔ̄lɔ́ná, eyī kú ɛna kwu abɔ̄lúfīyē, eyī kú idu kwú igbīhi.

¹¹ Ɔnyɔɔnyɛ kú uwā lɛ acá ɛpa kú nū je gicō, cɛ́ɛ́ ɛyí acá ɛpa kú nū ā gaá kwu ɛyí acá ɛpa kú ɔ́mpā nū. Ó klla lɛ acá ɛpa ɔhá kú nū ā ce klá īyī nū iyē.

¹² Ɔnyɔ̄ɔnyɛ kú aódée ā lɛ eyī pīya kwu ābɔ̄ ɛnɛ ā. Ohígbū ɔ́ɔmā ígwu kú uwá nyā klla lɔfú ga ɛga dúúmā nōo he uwá ɔtū, nēé gáā pīyeyī ga ɛga dúúmā ŋ́.

¹³ Ipú aɛ́bɛ́ nyā, Ɔdā éyi yɔ̄ ɔtāhɛ̄ aɔ́dā olɛ oyēeyī ā, nōo lɛbɛ̄ɛka ɛmu nōo yɔ̄ ī cɛ̄, yɔ̄ í yɛ gicō ga ajɛ ā. Ɔlá nyā gē cɛ̄ blu gicō klla ī cɛ̄ maámaá bɛ̄ɛka ɔwolímanya ā.

¹⁴ Aɔ́dā olɛ oyēeyī ā abɔ̄yī uwā klla bá ī yɛ ga ajɛ gico fíyá fíyá bɛ̄ɛka ɔwolímanya ā.

¹⁵ Abɔ́ɔ n yɔ̄ í má aɛ́bɛ́ ɛnɛ nyā a, n má akā ɛnɛ kwu ajɛ pi uwā. Akā éyééye kwu ajɛ pi éyééye kú uwá.

¹⁶ Odúúdú akā ɛnɛ nyā wɛ ɛdɔ ékpónú. Éyééye kú uwā yɔ̄ ī cɛ bɛ̄ɛka ɛcɔ̄ ogbɔɔ́lá nɛ̄hi ā. Éyééye kú akā ā klla lɛ akā ɔhá nēe kwu ɔ́ɔ pīya cíla anú.

¹⁷ Cɛ́ɛ́ ka aákā nyā lɔfú ga ɛga dóódu kú ābɔ̄ ɛnɛ ā.

¹⁸ Aíkpēyī kwu aóje nēe cíla aákā ɛnɛ ā ɛbɛɛbɛ.

¹⁹ Ɛga dúúmā nɛ̄ aɔ́dā olɛ oyēeyī ā yɛ nyɔ̄ ā, akā ɛnɛ ā ī nyɔ̄ mla uwá. Ɔ́dāŋ́ ka aɔ́dā olɛ oyēeyī ā le wu ŋmá ajɛ nɛɛ, akā nyā gē wu mla uwá dúú.

²⁰ Ɛga dúúmā nōo he aɔ́dā olɛ oyēeyī ā ɔtū ā nēé gē nyɔ̄ á. Ɛ́gɔ́ɔmā nɛ̄ aákā ā kē í nyɔ̄ mla uwá dúú á. Ohígbū ka aɔ́dā olɛ oyēeyī ā gē bī uwá yá ɔdā dóódu á.

²¹ Ohígbū ɔ́ɔmā, eko dúúmā nɛ̄ aɔ́dā olɛ oyēeyī ā ī yɛ ga ajɛ gicō, gē hayi ɛga ékpónú klla ī wu nɛɛ, aákā ā kē ī yá ɔdā ékpónú ɔ́ɔmā dúú.

²² Odée yɔ̄ icō kú aɔ́dā olɛ oyēeyī ā yɔɔlɔ nɛ̄ ɔ̄cɛ mɛ́ɛbɛ bū ɔ̄ɔ glá lɛbɛ̄ɛka ogigo ā, nōo yɔ̄ ī ceyī ŋaáŋaá ā.

²³ Anɔ́ɔ aɔ́dā olɛ oyēeyī ā māháyi ɛháajɛ kú odée yɔɔlɔ ā, ɔnyɔ̄ɔnyɛ lɛ acá ɛpa kú nū nańdaa kwú ɔ́mpānū nōo gboce ɔ́ ā. É klla kwú aácá ɛpa ɔhá ā í cē klá iyē kú uwā.

²⁴ N pó uya kú acá kú uwá eko nēé ī wu ā kwūūū bɛ̄ɛka úgbagwú kú ísu. Uya kú uwā klla lɛbɛ̄ɛka uya kú ɛwa nɛ̄hi kú aícɔ́ɔja ā, mɛ́mla ɔkɔ kú Ɔwɔicō nōo lɔfú fíyɛ́ dúú ā. Eko dúú nēé mā oōwu nɛɛ, é kwú aácá kú uwá ī cē klá.

²⁵ Amáŋ uya gē yɔ̄ ī yá kpɔ́, ŋmá ɛhícō kú odée yɔɔlɔ nōo yɔ̄ icō kú aɔ́dā olɛ oyēeyī ā.

²⁶ N má ɔda éyi nōo lɛbɛ̄ɛka akpa kú ɔcɛ́ nēé bī ɛcɔ̄ ōgbɔɔ́lá nɛ̄hi le yá ɔ́ ā ce icō kú odée yɔɔlɔ ɔ́ɔmā. Ɔdā nōo cīce akpa kú ɔcɛ́ nyā lɛbɛ̄ɛka ɔ̄cɛ ā.

²⁷ Oŋmá ohí kú nū gicō, ɔdā ɔ́ɔmā yɔ̄ ī ceyī ŋaáŋaá lɛbɛ̄ɛka oje udɔ nōo tá ipú ɔlá ā. Oŋmá ohí kú nū wā ajɛ, ó lɛbɛ̄ɛka ɔlá nōo yɔ̄ ī yi ā, klla yɔ̄ ī fíyaajɛ mɛ́mla ɛgahi nɛ̄hi.

²⁸ Ó fíyaajɛ ga ɛga dóódu mla ɔlá mla oceyī nōo lɛbɛ̄ɛka ɔwohɔ́gwā ā. Ɔ́ɔmā wɛ ofíyaajɛ kú ɛgahi nɛ̄hi nōo ī mafú ɛga nɛ̄ Óndú ā yɔ̄ ā. Eko nɛ̄ n lɛ ɔ́ má ā, n má gwutá ajɛ kwú eyī í pīya klá ajɛ. Anɔ́ɔ n pó ɔkɔ kú ɔ̄cɛ éyi yɔ̄ í kɛlā. Ɛnya ā mafu ɛgahi kú Óndú á.