Ɛ́STA 1 - Ubáyíbu kú Idɔma

Ɔcányā Ufássiti lɛ eyī gla ɔcɛ́

^1-2 Eko nɛ̄ Ahásɛ̄rɔ̄si, wɛ ɔcɛ́nɛ̄hi kú Upɛ́sīya nōo gbɔɔ́ ŋmá Índīya jāā ga Etiyópiya ā. Ó gē gbō ɛyí ajɛ ofu ɛhīlī ce ahāapa ŋmá Usúsa.

³ Ipú iháyí ɔ́mɛtá kú ɔcɛ́ kú nū ā, ó lɛ ucɛ nɛ̄hi yá lɛ odúúdú aígabɔ̄ mɛ́mla aígbómína kú ɔlɛ́ nū. Aícɔ́ɔja kú Upɛ́sīya mɛ́mla Umɛ́dīya bá abɔ́ɔ mɛ́mla aígbómína kú ɔlɛ́ nū ā, mɛ́mla odúúdú ācɛ nēe wɛ ācɛ ojīlīmā kú Upɛ́sīya ā.

⁴ Ɔyā ɛhīlī nōó bī lɛ ma agbénú, ɛgahi mɛ́mla ojīlīmā kú ɔcɛ́ kú nū fú lɛ odúúdú ācɛ kú ajɛ kú ɔlɛ́ nū á.

⁵ Eko nɛ̄ ó le ɔdu kú nū ā mafú kwɛyí ā, ó lɛ ucɛ nɛ̄hi yá lɛ odúúdú ācɛ nēe lā Usúsa, ɔlɛ́ ɔtāhɛ̄ kú ajɛ Upɛ́sīya ā. Ó yá ucɛ nyā lɛ odúúdú ācɛ. Ucɛ nyā nōó yá, ipú ɛhɔ̄ kú ipú agblɔ̄cɛ́ kú nū ā, lé ɛ̄cī ahāapa.

⁶ É lɛ abɔ́ɔ yá ifa mla īlī owú nɛ̄hɛ́ mɛ́mla odufā. É klla lɛ īlī ɔgalúlā fúlá tū eliká kú ugóolu (oje ɔdɔ) mɛ́mla ɔtángbédē, le uwá hɔ́ɔgba icō lɔɔlɔhi. É lɛ agōdō kú ugóolu (oje ɔdɔ) mɛ́mla oje nɛ̄hɛ́ kpó bá eyɛ̄ɛcɛ kú agblɔ̄cɛ́ ā. É lɛ ɔ́ yá mla ɔtángbédē nɛ̄hɛ́, ɔnɔ̄wá, odufā mɛ́mla ɔgalúlā. É bá ī ceyī nyɛɛ́nyɛɛ́.

⁷ Ɛdɔ íkókwū kú ugóolu (oje ɔdɔ) ɛyɛ́ɛyɛ́yí nēé bī le tū ejé lɛ ācɛ á. Ejé nōó kpó klɛ́ɛcɛ lɛ ācɛ ā í tōō ka ŋ́.

⁸ Ejé ā í tōō gwá kwɛyí ŋ́. Ɔcɛ́ ā kllā lɛ ɔ́da je lɛ ācɛ ɔlɛ́ nū nēe bá í tū ejé ā, ka ɔnyɔ̄ɔnyɛ kóō gwá ejé ā í kwu ɛga nōo he ɔ̄ ɔtú ā.

⁹ Ipɔ́ɔ́nū kú ɔlɛ́ ɔcɛ́ ā, ɔcányā Ufássiti yɔ̄ ī yá ucɛ lɛ ācɛnyā dúú.

¹⁰ Ɛ̄cī ɔ́mahāapa kú ucɛ ā, ɔcɛ́ ā yɔ̄ ī gwéejé nɛ̄hi mla ɔtū nɛ̄hɛ́, anɔ́ɔ ó lɛ aídibo ahāapa nēe gē cɛ̄ ɔ̄ ɛhɔ̄ ā kpó hīīgwú. É wɛ Uméhūman, Ubísita, Uhabóna, Ubígita, Abágita, Ussɛ́ta mɛ́mla Ukákasi.

¹¹ Ó le ɔ́da je lɛ uwá kéē lɛ ɔcányā, Ufássiti, bī wā kú ɔ̄ lɛ ɔdōkwɛyí kú ɔcányā kú nū kwɛyí. Ó kóō gaá lɛ ɔhi kú nū mafú lɛ odúúdú aígabɔ̄ mɛ́mla aúgbɔga nɛ̄ ɔcɛ́ pūla wā ɔnū ucɛ ā. Ohígbū ka Ufássiti jɔ̄ɔ́ncɛ́nyā nɛ̄hi.

¹² Amáŋ, eko nɛ̄ ācocɛ̄hɔ̄ kú ɔcɛ́ ā gaá lɛ ɛhɔ̄ kú ɔcɛ́ ā cɛ̄ lɛ ɔ́ ā, Ufássiti tá ō wā. Ɔdā nōó yá nyā tū ɔcɛ́ íwɔ́tú nɛ̄hi.

¹³ Ó wɛ ucē kú aɔ́cɛ́ kéē da ācɛ o jɔ́ɔ́dā nɛ̄hi ā ɔ̄kā lɛyíkwu íne mɛ́mla ɔ́da. Anɔ́ɔ ó le ācɛ nēe gē lɛ ahɔ̄ bá ɔ̄ ahɔ̄ kpó hīgwú, cɛ́ɛ́ kéē da ɔ́ ɔdā nɛ̄ ó cíkā ō yá ā.

¹⁴ Ācɛ nēe ī nwū ɔ̄ ɛlā íbí ā wɛ, Ukasséna, Ussɛ́ta, Adimáta, Utássissi, Uméresi, Umaséna mɛ́mla Umémūkan. Uwá wɛ aígabɔ̄ kú nū ahāapa nɛ̄ āhɔ̄ kú uwá fíyɛ́ dúú ipú ajɛ kú Upɛsīya mɛ́mla Umɛ́dīya á.

¹⁵ Anɔ́ɔ ó da ācɛ ā kahíníī, “Ami nōo wɛ ɔcɛ́, Ahásɛ̄rɔ̄si, ā le ācocɛ̄hɔ̄ kú um ahāapa tɛ̄hɔ̄ fu ɔcányā, Ufássiti kóō wā, amáŋ ó tá kóō lɛyítáajɛ lɛ ɛlā kú um ā. Ɔdí nɛ̄ íne ā ka, kú ālɔ̄ yá ɔ́ ā?”

¹⁶ Anɔ́ɔ Umémūkan tá ɔcɛ́ ā ohi kahíníī, “Ó wɛ ɔcɛ́ ōfōōfūnū nɛ̄ ɔcányā, Ufássiti cɛ́ɛcá klla leyī gwu ɔ́ bónū ā ŋ́. Amáŋ ó lɛ ɛcá cá odúúdú aígabɔ̄ mɛ́mla odúúdú ācɛ kú ajɛ ā, klla leyī gwū uwā bónū.

¹⁷ Ɛjɛ̄ɛ̄jī ācɛnyā kú ajɛ ɔlɛ́ alɔ géē pó ɔdā nɛ̄ ɔcányā Ufássiti yá nyā, cɛ́ɛ́ é klla gáā lɛyítáajɛ lɛ aɔ́bá uwā ɛ́ɛ́ nēé gē lɛ ojīlīmā ce uwá ɛ́ɛ́ gɛ ŋ́. É géē bā í ka ka, ‘Ahásɛ̄rɔ̄si, ɔcɛ́ ā, le ɔcányā, Ufássiti, hīgwú wā ɛgiyí nū, ó tá kóō nyɔ̄.’

¹⁸ Eko nɛ̄ anyā kú aígabɔ̄ kú Upɛ́sīya mɛ́mla Umɛ́dīya ā lɛ ucē kú ɔcányā nyā pó, é géē bī ɔ̄ le yá aɔ́bá uwá okónu ŋmá ɔcɔ̄ɔ̄cī jāā gbótú eko dóódu. Anyā ā í klla gáā le ojīlīmā ce aɔ́bá uwá ipú ajɛ ɔlɛ́ alɔ ɛ́ɛ́ gɛ ŋ́.

¹⁹ Ɔ́dāŋ́ koó he ɔcɛ́ ɔtú nɛɛ, ayíka ó lɛ íne mɛ́mla ɔ́da kú ɔcɛ́ je, cɛ́ɛ́ ká ɔcányā, Ufássiti kóō híī wā iyɔ̄bū Ágábáidu gbóógbóō ɛ́ɛ́ gɛ ŋ́. Cɛ́ɛ́ kéē lɛ ɔ́ tá tū ipú íne kú Upɛ́sīya mɛ́mla Umɛ́dīya nōó gē pīyabɔ̄ gbóógbóō ŋ́ mā. Cɛ́ɛ́ kóō kwú āhɔ̄ kú nū ú lɛ ɔnyā ɔhá kóō lɛ ɔcányā lé.

²⁰ Eko dúúmā nēé lɛ íne kú uwɔ nyā pó ipú odúúdú ajɛ kú uwɔ nɛ̄hi nyā, ɔnyā dóódu géē yɔ̄ ī lɛ ojīlīma ce ɔbá nū ɔwɛ dóódu. Ɔ́dáŋ ka ɔbá nū kōō wɛ olɔdu ámāŋ olɛɛhá.”

²¹ Ɛlā nōó ka nyā le he ɔcɛ́ mɛ́mla aígabɔ̄ kú nū ā ɔtú. Anɔ́ɔ é le ɔdā nōó ka nyā yá á.

²² Ɛga dóódu kú ipú ajɛ ā, ó lɛ ɛhɔ̄ ā tū fu uwá, klla lɛ ɔ́ tá okónu ucē dóódu kahíníī, “Ɔbá dóódu géē wɛ otrɛ̄yí kú ɔlɛ́ nū, anú klla í lɛ íkwu ō ŋmɛ́lā dóódu ɛyí ipɔ́ɔnū ɔlɛ́ nū á.”