ĀCƐ Ɛ́FĒSƆSI 1 - Ubáyíbu kú Idɔma

Okónu ō hɛ́

¹ Ami Upɔ́lu, ɔ̄cotɛ̄hɔ̄ kú Ujísɔ̄si Ohɔ́nyɛtá gē tɔ́kpá nyā gē lɛ ācɔ̄lóhɔ́nyɛtá nēe bá Ɛ́fēsɔsi, nɛ̄ ɔtū kú uwā háyi kpaakpa ipú opīyatɔ̄há mla Ohɔ́nyɛtá Ujísɔ̄si ā.

² N gē gbɔ̄ɔkɔ ká Ɔwɔicō, Ádā alɔ mɛ́mla Óndú Ujísɔ̄si Ohɔ́nyɛtá kéē yá ɔdā olɔhi nɛ̄hi lɛ aá, kéē yá kú aá bá ɛbɔ́.

³ Alɔ cɛ̄tra Ɔwɔicō ā nōo wɛ Ádā kú Óndú alɔ Ujísɔ̄si Ohɔ́nyɛtá. Abɔ̄ alɔ le pīyatɔ̄há mla Ohɔ́nyɛtá ā, Ɔwɔicō lɛ ɛjɛ̄ɛ̄jī ɛdɔ ɔhā kú alelékwū dóódu nōo ŋmá ɔkpáncō ā hɛ́ ce alɔ.

⁴ Gbɔbū ɛ́ɛ́ kú Ɔwɔicō kóō yá ɛcɛ ā, ó lɛ alɔ fu kú ālɔ̄ wɛ ācɛ ɔlɛ́ nū, ohígbū ka alɔ le pīyatɔ̄há mla Ohɔ́nyɛtá o yá ɛ́ɛ́ kú ālɔ̄ le yēŋēē, kú ālɔ̄ lɛ ɛnyá dúú iyɔ̄bū nū ŋ́.

⁵ Ohígbū ka abɔ̄ alɔ he Ɔwɔicō ɔtū ā, ó le miya táajɛ gbɔbū ka alɔ í wɛ ayí anúɔ ohígbū ɔdā nɛ̄ Ujísɔ̄si Ohɔ́nyɛtá yá ā. Ɛ̄nyā kē wɛ ɔdā ɔtū nɛ̄hɛ́ lɛ ɔ́.

⁶ Ālɔ̄ cɛ̄tra Ɔwɔicō ohígbū ɛhi nɛ̄hi kú nū nōó je lɛ alɔ icííci, ohígbū ɔdā olɔhi nɛ̄ ɔyínɔ̄nyīlɔ kú nū nōo he ɔ́ ɔtū yá ā.

⁷ Ohígbū ka abɔ̄ é kwu Ohɔ́nyɛtá í gwɛ́ɛya ā, Ɔwɔicō lɛ alɔ hɛ́tá. Ɔ́ɔmā lé ka ó kwú íne nɛ̄ alɔ bīya ā ú yá alɔ ɛhi. Ɔwɔicō yá ɔdā olɔhi lɛ alɔ íbí.

⁸ Ó klla lɛ ɛhi kú nū cēenyi nɛ̄ɛ̄nɛ̄hi klá alɔ. Abɔ̄ Ɔwɔicō jé ɛjɛ̄ɛ̄jī ɔ́dā dóódu ā,

⁹ ó lɛ ɔdā nōó húmáyī ī dɔɔ̄kā ō yá ā yá, anɔ́ɔ ó le yá kú ālɔ̄ lɛ ɔdōtayínū nōó tɛtɛ miya táajɛ ka anúɔ géē yá kwɛyí nɛ̄ alɔ í jé gbɔbū ŋ́ mā mafú lɛ alɔ ohígbū Ohɔ́nyɛtá ɛɛ́.

¹⁰ Ɔwɔicō géē yá ɔdā nōó bī ɔtū ā kwɛyí eko nɛ̄ eko okpaakpa ā le yá, cɛ́ɛ́ ó lɛ ɛjɛ̄ɛ̄jī aɔ́dā nōó yá nēe bá ipú ɔkpáncō mɛ́mla aɛ́nɛ̄ e bá ipú ɛcɛ ā kpótɔ̄há kú Ohɔ́nyɛtá kóō kwú pīya otrɛ̄yí kú uwā.

¹¹ É yá odúúdú ɔdā dóódu ŋmá ɛ́gɛ́nɛ̄ Ɔwɔicō miya ɔ́ táajɛ gbɔbū ɛ́ɛ́ kóō géē yá ā. Ɔwɔicō le alɔ fu ká ālɔ̄ wɛ ācɛ ɔlɛ́ nū ohígbū ka alɔ le pīyatɔ̄há mla Ohɔ́nyɛtá. Ó yá ɛ̄nyā oŋmá ɛ́gɛ́nɛ̄ ɔdā nōó cɛ̄ ka anúɔ ī yá ŋmá ajaajɛ ā lɛ ā.

¹² Ó yá ɛ̄nyā o yá ká alɔ nēe wɛ ācɛ aflɛ́yí nēe le eyīyōce ipú Ohɔ́nyɛtá ā ká ālɔ̄ cɛ̄tra ɛ́gɛ́nɛ̄ Ɔwɔicō nwuné lɛ ā.

¹³ Anɔ́ɔ Ɔwɔicō lɛ aá pīya ācɛ ɔlɛ́ nū eko nɛ̄ aá lɛ olɛhɔ̄ ɔkwɛ̄yi lɛyíkwu ɔ́ pó ā, ɔ̄kōolɔhi nōo yá kéē lɛ aá nyatá ā. Aá cɛ̄ɛ̄lā kú Ohɔ́nyɛtá anɔ́ɔ Ɔwɔicō lɛ Alelékwū Ihɔ nōó cokónu ō je lɛ aá nōo cābɔ̄ ka aá wɛ ákú nū ā kpó lɛ aá bɛ̄ɛka ɛ́gɛ́nɛ̄ ɔ̄cɛ gē fu odée kú nū ukɔ́ ā.

¹⁴ Abɔ̄ alɔ mīyɛ Alelékwū kú Ɔwɔicō ā, alɔ jé péee ka alɔ géē mīyɛ ɔdā nɛ̄ Ɔwɔicō cokónu ka anúɔ í je lɛ ācɛ ɔlɛ́ nū ā. Ohígbū ɛ̄nyā ā alɔ jé lɔfú péee ka Ɔwɔicō géē yá ká ālɔ̄ wɛ ɔfiyɛ kú ɔdā dóódu gɛ ŋ́.

Upɔ́lu gbɔ̄ɔkɔ ohígbū ācɛ nōó tɔ́kpá fú uwá ā

¹⁵ Ohígbū ɛjɛ̄ɛ̄jī ɔdā nɛ̄ Ɔwɔicō yá nēe bá nyā, ŋmífī nɛ̄ n pó ɛ́gɛ́nɛ̄ aá lɔtūce Óndú Ujísɔ̄si lɛ ā mɛ́mla ɛ́gɛ́nɛ̄ odúúdú ācɔ̄lóhɔ́nyɛtá he aá ɔtū lɛ ā,

¹⁶ n yɔ̄ gē tá Ɔwɔicō ahínyá ojigógó ohígbū aá. Eko dúúmā nɛ̄ n gē gbɔ̄ɔkɔ lɛ Ɔwɔicō n gē kɛlā lɛ ɔ́ ohígbū aá.

¹⁷ N gē ba Ɔwɔicō kú Óndú alɔ Ujísɔ̄si Ohɔ́nyɛtá,nōo wɛ Ádā nēé ī cɛ̄tra anú ā kóō lɛ alelékwū nōo géē cɛ̄ lɛ aá jééyī ipú aɔ́dā kú Ɔwɔicō, nōo géē yá kú aá lɛ ɛdɔ ɔ̄cɛ nɛ̄ Ɔwɔicō wɛ abāābɔ̄yī nū ā jé ā je lɛ aá.

¹⁸ N gē gbɔ̄ɔkɔ kú ɔtū kú aá kóō le mu mla ɔlá ofíyajɛ cɛ́ɛ́ kú aá géē má aɔ́dā nɛ̄ aá leyīce nōo wɛ ɔdā nɛ̄ Ɔwɔicō hī aá igwú nū, aɔ́dā nōó cokónu ō je lɛ ācɛ ɔlɛ́ nū ā. É wɛ aɔ́dā otīile nēe géē hɛ́ ācɛ idáagó.

¹⁹ Ɛ́gɛ́nɛ̄ ɔfú kú nū nōó géē je lɛ alɔ nēe cɛ̄ɛ̄lā nū ā géē nwuné lɛ ā í tōō ka ŋ́. Ɔfú nyā nōó géē je lɛ alɔ ā wɛ ɛdɔ ɔfú nɛ̄hi

²⁰ ékpó nōó bī le hé Ujísɔ̄si eyī ŋmá ɔlékwū klla kwú ɔ̄ ú cīce abɔ̄lɔ́ná kú nū ajɔ̄ɔ̄cɛ́ ā.

²¹ Ohɔ́nyɛtá yɔ̄ abɔ́ɔ bī íkwu nɛ̄hi nōo fíyɛ́ íkwu kú ɔ̄cɛ ɔhá dóódu nōo lɔfú gbāājɛ ɔkpáncō glá ā gē le gbāājɛ. Iyē nɛ̄ Ohɔ́nyɛtá lé kú úklɔ́ nɛ̄hi kú nū ā nwuné nɛ̄hi fíyɛ́ ɛdɔ kú iyē ɔhá dóódu nōo yɔ̄ abālɔbányā ámāŋ ka eko ɔhá kú ɛ̄cɔ̄bū.

²² Ɔwɔicō le yá kú Ohɔ́nyɛtá kóō le íkwu īkpɛ̄yí kú odúúdú aɔ́dā dóódu, ó klla kwú ɔ̄ ú yá otrɛ̄yí kú icɔ́ɔci, mɛ́mla Óndú kú odúúdú ɔdā dóódu.

²³ Icɔ́ɔ́ci ā lɛbɛ̄ɛka ɔkpíyē kú Ohɔ́nyɛtá ā. Icɔ́ɔ́ci ā wɛ Ohɔ́nyɛtá ā dúúdú, Ohɔ́nyɛtá abɔ̄yī nū mīyɛ ɔdā dóódu tābɔ̄ abɔ̄ dóódu ɛga dóodu.