UDÁNĪYƐ̄LU 1 - Ubáyíbu kú Idɔma

Ɔ̄kā kú Udánīyɛ̄lu mɛ́mla aóklóbīya nū

¹ Ipú iháyí ɔ́mɛtá nɛ̄ Ujehóyākim lé ɔcɛ́ kú Ujúda ā, Unebúkádinēsa ɔcɛ́ kú Ubálīlɔn wā gaá le ɛfú kpó tú Ujerúsālɛm, le íbɔm cē tá ɔ̄

² Anɔ́ɔ Óndū ā le yá kóō lɛ Ujehóyākim, ɔcɛ́ kú Ujúda ā yálé á. Unɛbúkádinēsa le Ujehóyākim kwú, klla le aíkókwū ohi mɛ́mla aócíbú otīihɔ kú Agblīihɔ-nɛ̄hi ā kpó. Ó klla le ācɛ ōhī kpó kwú nyɔ̄ agbá kú ɛfú. Anɔ́ɔ ó lɛ uwá kpó ga ajɛ kú Ubábīlɔn í kpó bá ipú inu kú ɛcí kú nū á. Ó klla kwú agbénú kú Agblīihɔ-nɛ̄hi kú Óndú ā í kpó bá inu o kpó iyó tū kú ɔlɛ́ nū.

³ Ɔcɛ́ ā lɛ ɔ́da je lɛ Asspɛ́nāsi nōo wɛ éyi kú aígabɔ̄ kú ɔlɛ́ nū ā kóō lɛ ōhī kú ayípōklóbīya kú ācɛ kú Ísrɛ̄lu, nēe ŋmá ipɔ́nū kú ɔcɛ́ mɛ́mla ācɛ ojīlīmā.

⁴ Ayípōklóbīya ā cíkā ō jōklóbīya, í gáā lɛ ɔ́nyí dúúmā iyē ŋ́. É cíkā ō jɔ́ɔ́dā nɛ̄hi, í wɛ ācɛ o lɛ ucē olɔhi, é klla cíkā ō wɛ ācɛ o jɔ́ɔ́dā fíyaa. Cɛ́ɛ́ kéē le cíkā ō wā í yúklɔ́ ipɔ́nū kú ɔlɛ́ ɔcɛ́. Asspɛ́nāsi wɛ ɔ̄cɛ nōo gáā nwū uwā ucē mɛ́mla ɔdā nēé tá okónu ucē kú ācɛ Ubábīlɔn á.

⁵ Ɔcɛ́ ā klla le ɔ́da je kéē bēē je āyā kú ɔdōlé olɔhi nɛ̄ ɔcɛ́ abɔ̄yī nū gē lé mɛ́mla ejé nɛ̄ ɔcɛ́ gē gwá ā lɛ uwá ɛ̄cī dóódu. É géē nwū uwā ɔkpá iháyí ɛtá. Igbīhi iháyí ɛtá nyā, cɛ́ɛ́ é géē kpó uwā wā í mafú lɛ ɔcɛ́.

⁶ Ipú ayípōklóbīya nēé fú ŋmá Ujúda ā wɛ Udánīyɛlu, Uhananíya, Umíssɛ̄lu mɛ́mla Asárīya.

⁷ Asspɛ́nāsi, otrɛ̄yí kú ācɛ nēé búdá ā, le iyē ɔhá kpó ce uwá. Ó hī Udánīyɛlu ka Ubeltessása, ó hī Uhananíya ka Ussádīrāki, ó hī Umíssɛ̄lu ka Umɛ́ssaki, ó klla hī Asárīya ka Abɛ́dinēgo.

⁸ Udánīyɛlu le ka gwó ipú ɔtū kú nū ka anúɔ í gáā je īyī anúɔ iye nyílá mla ɔdōlé mɛ́mla ejé nɛ̄ ɔcɛ́ ī gwá ā ŋ́. Anɔ́ɔ ó le da Asspɛ́nāsi ka ɔ́ɔ̄ tá anúɔ abɔ̄, cɛ́ɛ́ kóō híī pi anúɔ abɔfú kú anúɔ lé ɔdōlé, klla gwá ejé nēe í je anúɔ iyē nyílá ŋ́.

⁹ Anɔ́ɔ Ɔwɔicō cɛ̄ lɛ Asspɛ́nāsi le eyīnyinyi kú Udánīyɛlu má klla le ɛlā kú nū pó á.

¹⁰ Anɔ́ɔ Aspɛ́nāsi da Udánīyɛlu kahíníī, “Ɔcɛ́ ā je ɛdɔ kú ɔdōlé mɛ́mla ejé nɛ̄ aá gē gwá ā ŋmá ɔlɛ́ nū wā á. Ɔ́dāŋ koó le má ka á lɔfú iyē klla jɔ̄kwū bɛ̄ɛka ācɛ ohile ā ŋ́, ó géē je um ŋmó.”

¹¹ Anɔ́ɔ Udánīyɛlu le tá ɛgiyī otrɛ̄yí kú ɔ̄cɛ nōo gē je ɔdōlé lɛ uwá nɛ̄ Asspɛ́nāsi fu kóō leyīkwu uwá ā, gāa da ɔ́ kahíníī,

¹² “Aá je ēpū lɛ alɔ kú ālɔ̄ lé mɛ́mla éŋkpɔ̄ nɛ̄ alɔ í gwá ōfōōfūnū. Ká ā lɛ alɔ jámá ɛ̄cī igwó ōfōōfūnū, cɛ́ɛ́ kú aá má ɔ̄.

¹³ Cɛ́ɛ́ igbīhi ɛ̄cī igwó ā, kú aá lɛ alɔ mɛ́mla ayípōklóbīya nōo gē lé ɔdōlé olɔhi kú ɔlɛ́ ɔcɛ́ ā kpó í miya ɔhá. Cɛ́ɛ́ ɛ́gɛ́nɛ̄ a géē má lɛ ɛ̄cī ɔ́ɔmā ā, ɛ́gɔ́ɔmā nɛ̄ a géē yá mla alɔ piyóó á.”

¹⁴ Anɔ́ɔ ɔ̄cɛ ā cɛ̄ ɛlā kú uwá nyā, le uwá jámá ɛ̄cī igwó á.

¹⁵ Eko nɛ̄ ɛ̄cī igwó ā gaá le glá ā, ó má ka Udánīyɛlu mɛ́mla aɔ́mpa kú nū ɛtá ɔhá ā, kwú jɔ̄kwū klla lɔhi iyē fíyɛ́ odúúdú ayípōklóbīya ohile ɔhá nēe gē lé ɔdōlé olɔhi kú ɔlɛ́ ɔcɛ́ klla ī gwá ejé kú ɔlɛ́ ɔcɛ́ ā dúú ā.

¹⁶ Anɔ́ɔ ɔ̄cɛ nōo gē je ɔdōlé lɛ uwá ā, lɛ ɔdōlé olɔhi kú ɔlɛ́ ɔcɛ́ mɛ́mla ejé kú ɔcɛ́ ā kpó ŋmá ɛgiyī Udánīyɛlu mɛ́mla aɔ́mpa nū ā. Anɔ́ɔ ó gbɔɔ́ ō je ēpū mɛ́mla éŋkpɔ̄ ōfōōfūnū lɛ uwá á.

¹⁷ Ɔwɔicō le íjééyī, ɔdōōjé, ohílīpú, mɛ́mla ɔkpá ō jé nɛ̄hi kpó lɛ uwá. Ɔwɔicō klla kwú ɛbɛ oōmá, mɛ́mla ɛyí kú ɔna ō jé ú kpó blla anú lɛ Udánīyɛlu.

¹⁸ Eko nɛ̄ eko le yá nēé gáā kpó uwā wā iyɔ̄bū ɔcɛ́ ā, anɔ́ɔ Asspɛ́nāsi le uwá kpó wā iyɔ̄bū Unebúkádinēsa á.

¹⁹ Ɔcɛ́ ā le ɛlā ka lɛ uwá, anɔ́ɔ ɔcɛ́ ā le má ka ɔ̄cɛ dúúmā kú ācɛ ohile ā í lɛbɛ̄ɛka Udánīyɛlu, Uhananíya, Umíssɛ̄lu mɛ́mla Asárīya ā ŋ́. Anɔ́ɔ é kwú uwā í kpó bá kéē wɛ ācɛ nēe í tá ohi ɛlā kú ɔlɛ́ ɔcɛ́ á.

²⁰ Ipú ɛlā kú íjééyī mɛ́mla ɔdōōjé mɛ́mla ɔdā ɔhá dúúmā nɛ̄ ɔcɛ́ gē da uwá ɔ̄kā lɛyíkwu ɔ́ ā, ɔcɛ́ ā le má kéē jé ɔdā, é jééyī, klla ī tóohi ɛlā lɔhi, ɛga igwó fíyɛ́ ācoyímabɔ̄, aógwɛ́bā mɛ́mla odúúdú ācojɔ́dā ohile nēe bá Ubábīlɔn dúúdú ā.

²¹ Udánīyɛlu yɔ̄ āhɔ̄ kú úklɔ́ kú nū nyā jāā gaá kwu iháyí aflɛ́yí nɛ̄ Usáyírɔ̄s je pīya ɔcɛ́nɛ̄hi ā.