2 ĀCƐ UTESALONÍKA 1 - Ubáyíbu kú Idɔma

¹ Ami, Upɔ́lu, Usáyílāsi mɛ́mla Utímōti tɔ́kpá nyá gé lɛ ācɔ̄lóhɔ́nyɛtá nēe bá ipú icɔ́ɔci kú Utesaloníka nēe wɛ ákú Ɔwɔicō Ádā alɔ mɛ́mla Óndú Ujísɔ̄si Ohɔ́nyɛtá.

² Ɔwɔicō Ádā ā mɛ́mla Óndú Ujísɔ̄si kéē ményinyi aá, kéē yá kú aá bá ɛbɔ́.

Ɛpɔ̄ nēé í ka eko nɛ̄ Ohɔ́nyɛtá í wā ā

³ Ayínɛ́, ó cɛgbá kú ālɔ̄ tá Ɔwɔicō ahínyá ohígbū aá eko dóódu. Ahínyá nɛ̄ alɔ tá aá nyā le kpaakpa, ohígbū ka aá yɔ̄ ī lɔtūce Ohɔ́nyɛtá tōōtɔ̄ɔ̄, ɔwɛ nɛ̄ aá gē yíhɔtū tá iyī aá ā klla yɔ̄ ī lɔfú nɛ̄hi.

⁴ Ɛnyā yá ɛ́ɛ́ nɛ̄ alɔ gē bī aá gwō ipú aícɔ́ɔci ɔhá kú Ɔwɔicō á. Alɔ gē bī aá gwō ohígbū ɛ́gɛ́nɛ̄ aá háyi kpaakpa klla yɔ̄ ī cɛ̄ɛlā Ɔwɔicō gɔbɔ̄ɔ̄bū kpɔ́ ɛpléeko nēé bá yɔ̄ ī junwalu lɛ aá, bá gē yá aá ōwē nɛ̄hi āa.

⁵ Odúúdú aɔ́dā nēe bá nyā wɛ ɔdōcābɔ̄ lɛ aá ka Ɔwɔicō í kɛpɔ̄ tū ācɛ ɔwɛ nōo cíkā ā. Ohígbū ɔdā nɛ̄ aá bū ipú nū ā, aá nēe cíkā ō ga ajɔ̄ɔ̄cɛ́ kú Ɔwɔicō, nɛ̄ ohígbū nū nɛ̄ aá bá gē móōwē ā.

⁶ Ɔwɔicō géē yá ɔdā nōo le kpaakpa ā. Ó géē yá ācɛ nēe yá aá ōwē ā italā.

⁷ Anɔ́ɔ ó géē je omlɛ́nyɔ̄́ lɛ aá nēe yɔ̄ ī móōwē abālɔbányā mɛ́mla alɔ dúú. Ó géē yá ɛ̄nyā eko nɛ̄ Óndú Ujísɔ̄si géē wāajɛ ŋmá ɔkpáncō í ma iyī fú ā. Aálelékwū-ōtɛ̄hɔ̄ olɔfú nɛ̄hi ā í wā mla anú.

⁸ Ó géē bī ɔlá nōo yɔ̄ ī cɛ̄ le yá ācɛ nēé jé Ɔwɔicō ŋ́, nēe klla tá ka aá lɛyítáajɛ lɛ ɔ̄kōolɔhi kú Óndú alɔ Ujísɔ̄si ŋ́ mā ōwē.

⁹ É géē kpó ācɛ ɛ́gɔ́ɔmā yíífi piyóó, é géē lɛ uwá fō gɛcɛ ŋmá ɛgiyí Óndú ā cɛ́ɛ́ kéē híīī jé ɛ́gɛ́nɛ̄ ɛgahi kú nū lɛ ā ŋ́.

¹⁰ Ɛjɛ̄ɛ̄jī ɔdā nēe bá nyā géē yá eko nɛ̄ ɛ̄cī nɛ̄hi ɔ́ɔma gā, odúúdú ācɛ nēe cɛ̄ɛ̄lā nū ā géē je iyē nū gicō, é klla géē kɛlā olɔhi nɛ̄hi lɛyíkwu ɔ́. Aá géē yɔ̄ abɔ́ɔ dúú, ohígbū ka aá cɛ̄ olɛhɔ̄ nɛ̄ alɔ cɛ̄ lɛ aá ā.

¹¹ Ɔ́ɔmā yá ɛ́ɛ́ nɛ̄ alɔ ī gbɔ̄ɔkɔ lɛ Ɔwɔicō ohígbū aá á. Alɔ gē gbɔ̄ɔkɔ lɛ Ɔwɔicō kú alɔ kóō lɛ aá yá ɛdɔ ācɛ nēe cíkā lɛ ɛdɔ kú oyēeyī nōó dɔɔ̄kā kú aá lā ā. Alɔ gē gbɔ̄ɔkɔ lɛ Ɔwɔicō kpɔ́ kóō lɛ ɔ́ yá tɔ́ɔtɛ́ lɛ aá kú aá yá odúúdú ɔdā olɔhi nɛ̄ aá tíne ó yá ā.

¹² Abɔ̄ aá gē yá ɛnyā ā, odúúdú ācɛ géē cɛ̄tra iyē kú Óndú alɔ Ujísɔ̄si ohígbū aá. Ó kē ī je ojīlīmā lɛ aá ŋmá lɛ ɛhi nɛ̄ Ɔwɔicō kú alɔ mɛ́mla Óndú Ujísɔ̄si Ohɔ́nyɛtá ge je ŋmá eyīnyinyi ā.