2 USÁMUWƐ̄LU 1 - Ubáyíbu kú Idɔma

Udéfīdi lɛ ɔ̄kā ikwū kú Usɔ́ɔlu pó

¹ Eko éyi, Usɔ́ɔlu, ɔcɛ́ aflɛ́yí kú Ísrɛ̄lu gekwú. Eko ɔ́ɔmā Udéfīdi nyɔ̄ í le ācɛ kú Ámālɛ̄ki yálé kē kwúcē wā Usíkilāgi, ɛga nōó lā eko ɔ́ɔmā ā. Ó klá ɔlɛ́ ɛ̄cī ɛpa.

² Ɛ̄cī ɔ́mɛɛtá ā, ɔ̄cɛ éyi ŋmá ipú aícɔ́ɔja kú Usɔ́ɔlu gā ŋmá ɔgbɛ́fú. Ó lɛ īlī kú nū híla, klla lɛ ewo kpó klá ɛyí kóō mafú ka anúɔ yɔ̄ ī yá ɔtūnōbí. Eko nōó ga ɛgiyí Udéfīdi ā, ó gaá wúla klá ajɛ iyɔ̄bū nū lɛ okónu hɛ́ tū ɔ̄.

³ Anɔ́ɔ Udéfīdi da ɔ́ ɔ̄kā kahíníī, “Iní nɛ̄ a ŋmá?” Anɔ́ɔ ó tá ɔ̄ ohi kahíníī, “N kwu ŋmá ɛga nɛ̄ aícɔ́ɔja kú Ísrɛ̄lu kwu aáklɔ̄kpɛ kú ɛfú ā.”

⁴ Anɔ́ɔ Udéfīdi klla da ɔ́ ɔ̄kā kahíníī, “Abɔ̄ ɛfú á kpó lɛ? Ka ga um.” Anɔ́ɔ ɔ̄cɛ ā tóohi kahíníī, “Ācɛ kú Ísrɛ̄lu lɛ inya kwu ŋmá ɔgbɛ́fú ā. Ɛfú klla le ācɛ alɛwa kú uwá lé. Usɔ́ɔlu mɛ́mla ɔyī nū Ujonátan le pɛ́ gekwú dúú.”

⁵ Anɔ́ɔ Udéfīdi da ɔ́ ɔ̄kā kahíníī, “Abɔ̄ ó yá lɛ ɛɛ́ nɛ̄ a jé ka Usɔ́ɔlu mɛ́mla ɔyí nū, Ujonátan ɛ́ɛ le pɛ́ kwú ā?”

⁶ Anɔ́ɔ ó tá ɔ̄ ohi kahíníī, “N yɔ̄ ɛyí ɛfú kú Ugílibōwa eko ɔ́ɔmā, anɔ́ɔ n má Usɔ́ɔlu le óbō kwu ajɛ kóō bī īyī nū hayiicō. N kē má ka aúgbɔ́ɔnya kú ɛfú mɛ́mla ācɛ o cɔnya ɛfú kú aólɛlā ā le kwu ɔ́ ajaajɛ gáā kwú ɔ̄.

⁷ Ó pīyeyī má igbīhi lɛ um má. Ó lɛ um hīīgwú, anɔ́ɔ n le tá ɛgiyí nū á.

⁸ Anɔ́ɔ ó da um ɔ̄kā ka ɔ̄nyɛ nɛ̄ amíyɔ wɛ ā. N kē da ɔ́ ka n wɛ ɔ̄cɛ kú Ámālɛ̄ki.

⁹ Anɔ́ɔ ó da um ka amíɔɔ wā ɛgiyí anúɔ ká amíyɔ lɛ anúɔ ŋmó. Ó ka ohígbū keé lɛ ágbe yá anúɔ nɛ̄hi, anúɔ yɔ̄ ī jé ɔnɔ nɛ̄hi, ka amáŋ anúɔ í kē kwú ŋ́.

¹⁰ Anɔ́ɔ n le yɛ tá ɛgiyí nū lɛ ɔ́ ŋmó á. Ohígbū ka n jé koó géē kwú piií ohígbū ágbe nēé yá ɔ̄ ā. Anɔ́ɔ n kwú ɔfulā kú ɔcɛ́ ú ŋmá ɛyí kú nū mɛ́mla ɔká kú ɔcɛ́ nōó le wu abɔ̄ ā. Aɔ́dā ɔ́ɔmā nɛ̄ n kpó wā gé lɛ uwɔ yɔ̄ á.”

¹¹ Udéfīdi mɛ́mla odúúdú ācɛ ɔlɛ́ nū lɛ ílī kú uwá híla kéē ma ɔtūnōbí kú uwā fú.

¹² É yékwu klla jikwú, í lé ɔdōlé ŋ́ jāā gbó ɔ̄nɔ̄ɔ̄nɛ̄ ohígbū Usɔ́ɔlu mɛ́mla ɔyínɔ̄nyīlɔ kú nū, Ujonátan, mɛ́mla ohígbū ācɛ Ísrɛ̄lu, nēe wɛ ācɛ ɔlɛ́ Óndú ā, alɛwa nēé ŋmó ɔgbɛ́fú ā.

¹³ Anɔ́ɔ Udéfīdi da ɔyípōklóbīya nōo bī ɔ̄kā nyā gē lɛ ɔ́ ā kahíníī, “Iní nɛ̄ a ŋmá āa?” Anɔ́ɔ ɔ̄cɛ ā tá ɔ̄ ohi kahíníī, “N wɛ ɔ̄cɛ kú Ámālɛ̄ki, amáŋ n lā ipú ajɛ ɔlɛ́ aá.”

¹⁴ Anɔ́ɔ Udéfīdi da ɔ́ kahíníī, “Ɔdí yá nɛ̄ á yúúfi ō bī abɔ̄ kú uwɔ le ŋmó ɔ̄cɛ nɛ̄ Óndú ā fu, lɛ anɔ̄ tū ɔ̄ ɛyí kóō wɛ ɔcɛ́ ā ŋ́ mā?”

¹⁵ Anɔ́ɔ Udéfīdi lɛ ɔyípōklóbīya kú ɔlɛ́ nū éyi hīīgwú, da ɔ́ kóō lɛ ɔ̄cɛ ā ŋmó á.” Anɔ́ɔ ɔyípōklóbīya ɔ́ɔmā le ɛ̄wā gɔ̄ ɔ̄cɛ kú Ámālɛ̄ki ā, lɛ ɔ́ ŋmó á.

¹⁶ Anɔ́ɔ Udéfīdi da ɔ̄cɛ Ámālɛ̄ki ā kahíníī, “Oyī kú uwɔ kóō ce uwɔ ɛyí, ohígbū ka okónu kú uwɔ abɔ̄yī uwɔ cījáalí tū uwɔ ka anúɔ lɛ ɔcɛ́ nɛ̄ Óndú fu lɛ anɔ̄ tū ɔ̄ ɛyí ā ŋmó.”

Udéfīdi jikwū ayidɔ ohígbū Usɔ́ɔlu mɛ́mla Ujonátan

¹⁷ Udéfīdi jikwū ayidɔ nyā ohígbū Usɔ́ɔlu mɛ́mla Ujonátan.

¹⁸ Anɔ́ɔ ó klla je ɔ́da kéē lɛ ɔ́ nwū ācɛ kú Ujúda á. (É kē tá tū ɔ̄ ɔkpá kú Ujássa dúú). Ó jikwū kahíníī,

¹⁹ “Woó Ísrɛ̄lu, é lɛ ācɛ nēe wɛ ɛgahi mɛ́mla ojīlīmā kú aá ŋmó ɛyí ɛfu kú ajɛ ɔlɛ́ aá ɛɛ́. Ācokpɛ́fú kú ɔlɛ́ aá nēe lɔfú nɛ̄hi ā le pɛ́ gekwú ɛɛ́!

²⁰ Aá ka tɛ́ɛcɛ Ugáti nóó, ɛ́ɛ́ nɛ̄ aá gē ka ɔ́ tɛ́ɛcɛ úláyi kú Ásskɛ̄lɔn ŋ́! Ohígbū nɛ̄ ayínɔ̄nyā kú Ufílīstiya géē gwéeyē. Ohígbū nɛ̄ ayínɔ̄nyā kú ācɛ opɛ̄cí ā géē gwéeyē!

²¹ Kpáyi! Ɔwɔ kóō yā klá aɛ́fu kú Ugílibōwa ŋ́, ébú kóō kōō híī cē klá uwá ŋ́. Aájɛ ɛhɔ̄ kú abɔ́ɔ kóō híī yá ɔdɛ̄hɔ̄ nēé ī je ɛhi lɛ Ɔwɔicō gɛ ŋ́. Ohígbū ka abɔ́ɔ ā nɛ̄ ɔkplɛ́fú kú ɔ̄cɛ o lɔfú táajɛ le blínyī, nɛ̄ ɔ̄cɛ dúú í kē yɔ̄ ō nya ɔkplɛ́fú kú Usɔ́ɔlu ā gɛ ŋ́ má.

²² Ɔyī kú Ujonátan í ge táamblē ō ŋmó ācokpɛ́fú nɛ̄hi kú aólɛlā ā ŋ́. Ɔkpacaŋ́gelī kú Usɔ́ɔlu í kē í tá abɔ̄ áncā ŋmá aólɛlā ō ŋmó ɔgbɛ́fú ŋ́.

²³ Ɛlā Usɔ́ɔlu mɛ́mla Ujonátan ī he ācɛ ɔtū gbógbó! É bá tɔ̄ɔhá eko nēé yēeyī ā, é kē bá tɔ̄ɔhá eko nēé kē kwú ā. É le fíyafíya fíyɛ́ idu, é klla lɔfú fíyɛ́ aágábá.

²⁴ Ayínɔ̄nyā kú Ísrɛ̄lu, aá jikwú kú Usɔ́ɔlu, anú nōo gē kpó īlī nɔ̄wá ohéyīfuú nɛ̄hi lɛ aá, klla í kpó aɔ́dā o bī le yíifa kú ugóolu gé lɛ aá á.

²⁵ Ācokpɛ́fú kú ɔlɛ́ aá nēe lɔfú nɛ̄hi ā le pɛ́ gekwú ɔgbɛ́fú ɛɛ́! Ujonátan gekwú tá ɛyí aɛ́fu kú ajɛ ɔlɛ́ aá.

²⁶ N yɔ̄ ī jikwū kú uwɔ, Ujonátan, ohígbū ka a he um ɔtū bɛ̄ɛka ɔyínɛ̄ um ā. A he um ɔtū nɛ̄ɛ̄nɛ̄hi. Ihɔtū nɛ̄ a yá tū um ā lɔhi ŋmá ipíípú fíyɛ́ ihɔtū nɛ̄ ɔ̄cɛnyā ī yá tū ɔ̄cɛnyīlɔ ā á.

²⁷ Ācokpɛ́fú kú ɔlɛ́ aá nēe lɔfú nɛ̄hi ā le pɛ́ gekwú ɛɛ́! Aíyɛ́fú ā kwú kpó yíífi áncā ɛɛ́.”