2 AƆ́CƐ́ 1 - Ubáyíbu kú Idɔma

Ɛláyíja mɛ́mla ɔcɛ́ Ahasíya

¹ Igbīhi nɛ̄ Áhābu, ɔcɛ́ kú Ísrɛ̄lu gekwú ā, éwo kú Umówābu tá ka aá bá ɛháajɛ kú Ísrɛ̄lu ɛ́ɛ́ gɛ ŋ́. É klla kwɛ́yí ú bū kwu Ísrɛ̄lu.

² Ɔcɛ́, Ahasíya kú Ísrɛ̄lu má gwōnū ŋmá agbalú kú ɛyíinu kú agblɔ̄cɛ́ kú nū nōo yɔ̄ Usamérīya ā. Ágbe kē le yá ɔ̄ nɛ̄ɛ̄nɛ̄hi. Ó lɛ ɛhɔ̄ tū gaá da Ubáalsébubu, ɔwɔ kú Ékrɔn, igelī nɛ̄hi kú Ufilístiya ɔ̄kā, ɔ́dāŋ koó géē yēeyī ámāŋ ka ó géē kwú. Ohígbū ágbe nōo yá ɔ̄ ŋmá ogwōnū kū nū ā.

³ Amáŋ alelékwū-ōtɛ̄hɔ̄ kú Óndú ā wā ɛgiyí Ɛláyíja nōo ŋmá Utíssibe gaá da ɔ́ kahíníī, “Cāŋjɛ ká ā nyɔ̄ gaá jīla acɛ nɛ̄ ɔcɛ́ kú Usamérīya tɛ̄hɔ̄ ā, cɛ́ɛ́ a lɛ ɔ̄kā da ɔ́ kahíníī, “Ɔwɔicō í yɔ̄ Ísrɛ̄lu ŋ́ nɛ, nāa gē tɛ̄hɔ̄ gaá da Ubáalsébubu, ɛcí kú Ékrɔn ɔ̄kā ā mɛ́ɛ̄ ā ŋ́?

⁴ Nyɔ̄ í da ɔcɛ́ ā ka, Óndú ā ɔ́ɔ ka anú ɔcɛ́ ā ɔ́ɔ gáā wā ajɛ ŋmá ɛyí agōdō ɛ́ɛ́ gɛ ŋ́. Ó ka ɔ́ɔ géē kwú ɛyí agōdō ɔ́ɔmā piíí.” Anɔ́ɔ Ɛláyíja nyɛ̄ɛ̄ á.

⁵ Ācɛ nɛ̄ ɔcɛ́ tɛ̄hɔ̄ ā pīyɛyí, anɔ́ɔ ɔcɛ́ ā da uwá ɔ̄kā kahíníī, “Ɔdíyá nɛ̄ aá kwúcē fíyɛ ā?”

⁶ Anɔ́ɔ é tá ɔ̄ ohi kahíníī, “Alɔ jīla ɔ̄cɛ éyi ɔwɛ, nōo da alɔ ka ālɔ̄ ɔ́ɔ̄ kwúcē gaá lɛ ɛlā nɛ̄ Ɔwɔicō ɔ́ɔ ka ā da uwɔ. Ó ka ɔ́ɔ kahíníī, Ɔwɔicō ɔ́ɔ́ yɔ̄ Ísrɛ̄lu gɛ ŋ́ nɛɛ, nɛ̄ awɔ gē tɛ̄hɔ̄ gaá da Ubáalsébubu, ɛcí mɛ́mla ɔwɔ kú Ékrɔn ɔ̄kā á mɛ́ɛ̄ ā ŋ́? Ó ka Óndú ā ɔ́ɔ ka ohígbū ɔ́ɔmā, awɔ ɔ́ɔ̄ gáā wā ajɛ ŋmá ɛyí agōdō ōcē kú uwɔ ā ɛ́ɛ́ gɛ ŋ́, ka awɔ ɔ́ɔ géē kwú piíí!”

⁷ Anɔ́ɔ ɔcɛ́ ā da uwá ɔ̄kā kahíníī, “Ɛdɔ ɔ̄cɛ nyá wā í kɛlā ɛ́gɛ́nyā lɛ aá ā?”

⁸ Anɔ́ɔ é da ɔ́ kahíníī, “Ó le īlī kú ɔwnū kú ɛwū wu iyē. Klla le ɔkpɛ́bɛ́ gbō ɛ́nyɔ́.” Anɔ́ɔ ó da uwá ka, “Ɛláyíja, ɔ̄comɛ́ɛbɛ kú Ɔwɔicō ā nɛ.”

⁹ Anɔ́ɔ ó lɛ otrɛ̄yí éyi kú aícɔ́ɔja mɛ́mla aícɔ́ɔja ofɛpa ce igwó tɛ̄hɔ̄ kéē gaá lɛ Ɛláyíja hīgwú wā. É le yɛ, anɔ́ɔ é má Ɛláyíja cīce ɛyí ɛfu, anɔ́ɔ é da ɔ́ kahíníī, “Ɔ̄comɛ́ɛbɛ kú Ɔwɔicō, ɔcɛ́ ka awɔ ɔ́ɔ̄ gā.”

¹⁰ Amáŋ, Ɛláyíja tá otrɛ̄yí kú uwá ā ohi kahíníī, “Ɔ́dāŋ́ ka n wɛ ɔ̄comɛ́ɛbɛ kú Ɔwɔicō ɔkwɛ̄yi, ɔlá kóō ŋmá ɔkpáncō wā í kwú awɔ mɛ́mla ācɛ ɔlɛ́ uwɔ ā ú kpó yi.” Anɔ́ɔ ɔlā ŋmá ɔkpáncō wāajɛ, í kwú anú mɛ́mla aícɔ́ɔja ofɛpa ce igwó ā ú kpó yi á.

¹¹ Anɔ́ɔ ɔcɛ́ ā klla le otrɛ̄yí kú aícɔ́ɔja ɔhá mɛ́mla aícɔ́ɔja ofɛpa ce igwó ɔhá tɛ̄hɔ̄ nyɔ̄ gaá da Ɛláyíja kahíníī, “Ɔ̄comɛ́ɛbɛ kú Ɔwɔicō, ɔcɛ́ ka awɔ ɔ́ɔ̄ gā.”

¹² Anɔ́ɔ Ɛláyíja tá uwá ohi kahíníī, “Ɔ́dāŋ́ ka n wɛ ɔ̄comɛ́ɛbɛ kú Ɔwɔicō ɔkwɛ̄yi, ayíka ɔlá kóō ŋmá ɔkpáncō wāajɛ, gaá kwú awɔ mɛ́mla ācɛ ɔlɛ́ uwɔ ā ú kpó yi.” Anɔ́ɔ obōōbū ɔlá ŋmá ɔkpáncō wā ajɛ gaá kwú uwá ú kpó yi ŋmá ajɛ.

¹³ Igbɛ ɔmɛtá kpɔ́, ɔcɛ́ ā klla le ɛdɔ ígwu kú ācɛ ékpónú ɔ́ɔmā tɛ̄hɔ̄ nyɔ̄ kpɔ́. Anɔ́ɔ otrɛ̄yí kú aícɔ́ɔja ɔ́ɔmā gaá le okwúkwu kwaajɛ iyɔ̄bū Ɛláyíja, anɔ́ɔ ó da ɔ́ kahíníī, “Ɔ̄comɛ́ɛbɛ kú Ɔwɔicō, kócōō méyīnyinyi alɔ ká ā je alɔ kpó ŋmó ɛ́ɛ́ gɛ ŋ́.

¹⁴ Ɔlá ŋmá ɔkpáncō gaá kwú aótrɛ̄yí ɛpa ā mɛ́mla aícɔ́ɔja kú uwá ú kpó ŋmó ɛɛ́. Amáŋ, kócōō méyinyinyi alɔ.”

¹⁵ Anɔ́ɔ alelékwū-ōtɛ̄hɔ̄ kú Ɔwɔicō da Ɛláyíja kahíníī, “Nyɔ̄ mla uwá ga ɛgiyí ɔcɛ́ ā.” Anɔ́ɔ Ɛláyíja cáŋjɛ le yɛ mla uwá ga ɛgiyí ɔcɛ́ ā.

¹⁶ Anɔ́ɔ Ɛláyíja da ɔcɛ́ ā kahíníī, “Ɛ̄nyā wɛ ɛlā nɛ̄ Óndú ā ka á, “Abɔ̄ Ɔwɔicō í yɔ̄ Ísrɛ̄lu ŋ́ mā, nāa gē tɛhɔ̄ gaá da Ubáalsébubu, ɔwɔ kú ācɛ Ékrɔn ɔ̄kā bɛ̄ɛka ɔdā nɛ̄ Ɔwɔicō í yɔ̄ Ísrɛ̄lu ŋ́ mā. Ohígbū ɔ́ɔmā, á gaá wā ajɛ ŋmá agōdō ōcē kú uwɔ nyā ŋ́, amáŋ a géē kwú.”

¹⁷ Ahasíya gekwú ɛ́gɛ́nɛ̄ Óndú ā ka lɛ ɔ́, bū okónu kú Ɛláyíja lɛ ā. Abɔ̄ Ahasíya í lɛ ɔyí dúúmā ŋ́ mā, Ujóram, ɔyínɛ́ nū lɛ ɔcɛ́ lé kwɛyí nū. Ujóram lé ɔcɛ́ nyā ipú iháyí ɔ́mpa nɛ̄ Ujɛhóssāfati lé ɔcɛ́ kú Ujúda ā.

¹⁸ Ɔdā ohile ɔhá dóódu nɛ̄ Ahasíya yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.