2 ÚKLƆ́ KÚ AƆ́CƐ́ 1 - Ubáyíbu kú Idɔma

Usólōmɔn gbɔkɔ kú íjéeyī

¹ Usólōmɔn, ɔyí kú Udéfīdi, ɔcɛ́ ā kwú abɔ̄ ú yá ajɔ̄ɔ̄cɛ́ kú Ísrɛ̄lu ā gbaala. Óndú ā le ɔhā hɛ́ ce ɔ́, anɔ́ɔ ó klla kwú ɔfú nɛ̄ɛ̄nɛ̄hi ú le ɔ́ á.

² Usólōmɔn le ɔ́da je lɛ odúúdú aótrɛ̄yí kú aícɔ́ɔja ígwíígwu kú úlúúlā mɛ́mla ofuɛhɔ̄ ofuɛhɔ̄ ā, mɛ́mla aígabɔ̄ kú ajɔ̄ɔ̄cɛ́ kú nū, mɛ́mla odúúdú aótrɛ̄yí kú ipú iniinu o hile kú Ísrɛ̄lu ā ka

³ ɛ́ɛ̄ nyɔ̄ mla anúɔ ga ɛga nɛ̄ áklɔ̄kpīihɔ ɛga nɛ̄ Óndú ā yɔ̄ ā ipú ajɛ kú Ugíbēyɔn ā. É le pɛ́ ga abɔ́ɔ ohígbū ka abɔ́ɔ nɛ̄ áklɔ̄kpīihɔ nɛ̄ Umósīsi gwó lɛ Ɔwɔicō kú nū, ipú ígbíli ā yɔ̄ á.

⁴ Amáŋ ikpati kú ɛka kú Óndú ā yɔ̄ Ujerúsālɛm kpɔ́. Ó yɔ̄ ipú áklɔ̄kpɛ nɛ̄ Udéfīdi gwó lɛ ɔ́ eko nɛ̄ ó je ɔ́ ŋmá Ukiriyati Ujeyarím ā.

⁵ O fíyɛ́ dúú ā, ede kú oje udɔ nɛ̄ Ubɛsálelu, ɔyí kú Úri, ɔyí kú ɔyí kú Uhɔ́ɔ ma ā yɔ̄ Ugíbēyɔn abɔ́ɔ iyɔ̄bū kú áklɔ̄kpīihɔ kú ɛga nɛ̄ Óndú ā yɔ̄ ā. Usólōmɔn mɛ́mla odúúdú ācɛ nēe wā mla anú ā le ɛ̄gbā gbā Óndú ā,

⁶ Ɔcɛ́ Usólōmɔn le ɛ̄gbā gbā Óndú ā abɔ́ɔ o ŋmá lɛ ogwɛ́ɛya ɛyí ede kú udɔ ā. Aɛ́bɛ́ úlā ɛpa ce ofu igwó (1,000) nɛ̄ ó kpó gwɛ́ɛya o yɔlá dúúdú lɛ Óndú ā ɛyí ede ā.

⁷ Anɔ́ɔ otú kú nū ā Óndú ā gā ɛgiyí Usólōmɔn abɔ́ɔ ipú ɔ̄na gaá da ɔ́ ɔ̄kā kahíníī, “Ɔdí nāa tíne ká n̄ je ga uwɔ ā?”

⁸ Anɔ́ɔ Usólōmɔn tá ɔ̄ ohi kahíníī, “A gē ma ihɔtū nɛ̄ ó ī mɛ ŋ́ kú uwɔ ā fú lɛ ádā um, Udéfīdi eko dóódu, anɔ́ɔ abālɔbányā, a kwú um ú lé ɔcɛ́ kwɛyí nū ɛɛ́.

⁹ Óndú, lɛ okónu nāa ce lɛ ádā um ā yá jīla. A kwú um ú lé ɔcɛ́ kú ācɛ nɛ̄ ɛwa kú uwá í tōō gba áluka ŋ́.

¹⁰ Lɛ íjééyī mɛ́mla ɔdā ō jé mɛ́mla ohílīpú je gā um, nɛ̄ n géē bī le gbō ɛwa nāa kpó gā um nyā. Ámāŋ abɔ̄ n í yá lɛ ɛ́ɛ́ nɛ̄ n géē gbō ɛwa nɛ̄hi kú ācɛ ɔlɛ́ uwɔ nāa kpó ga um nyā glá ā?”

¹¹ Anɔ́ɔ Ɔwɔicō tá ɔ̄ ohi kahíníī, “Abɔ̄ ɛ̄nyā kē wɛ ɔdā nōo kwu uwɔ ɔtū ā, nɛ̄ ikɔkɔ nāa í ba ije, agbénú, olóófu, oyēeyī olīkpō, amáŋ ikwū kú aólɛlā kú uwɔ, a lɛ íjééyī mɛ́mla ɔdōjé ba, cɛ́ɛ́ kú ā géē lɔfú gbō ācɛ ɔlɛ́ um nɛ̄ n je uwɔ pīya ɔcɛ́ kú uwā ā.

¹² N géē je íjééyī mɛ́mla ɔdōjé ā gā uwɔ. N klla í je agbénú, nɛ̄ɛ̄nɛ̄hi nɛ̄ ɔcɛ́ dúúmā í lɛ jéjée ɛɛ́ ŋ́, nɛ̄ ɔ̄cɛ dúúmā í klla gáā lɛ gɛ ŋ́ mā gā uwɔ.”

Ɔfú mɛ́mla agbénú kú Usólōmɔn

¹³ Anɔ́ɔ Usólōmɔn nyɛ̄ɛ̄ ŋmá Ugíbiyɔn ɛga nɛ̄ Áklɔ̄kpīihɔ yɔ̄ ā, anɔ́ɔ ó gā Ujerúsālɛm, ɛga nɛ̄ ó gē gbō ācɛ kú Ísrɛ̄lu ŋmá ā.

¹⁴ Usólōmɔn lɛ aúgbɔ́ɔnya mɛ́mla ācɛ okpɛ́fú ɔnya alɛwa. Aúgbɔ́nya kú nū wɛ úlā ɛtá ce ofu igwó (12,800), ācɛ okpɛ́fú ɔnya kú nū kē wɛ úlā ofu ce igwó (12,000). Ó le aóhī kú uwā kpó bá Ujerúsālɛm. Ó kē le aóhile ā kpó bá aígelī nɛ̄hi ɔhá

¹⁵ Eko kú ɔcɛ́ kú nū ā, ó le ugóolu (oje ɔdɔ) mɛ́mla oje nɛ̄hɛ́ ā tīkwū bá ajɛ gónóó láyíí bɛ̄ɛka ɛcɔ̄. Ó klla le yá kú ɔcí nēé hī ka usɛ́da ā kóō bá ɛga dóódu bɛ̄ɛka ɔcí nēé hī ka usikāmɔ nēe gē jɛ̄ bá ɔkwu ɛfu ɛga dóódu ā.

¹⁶ Ācɛ kú ɔlɛ́ ɔcɛ́ gē mīyɛ aɔ́nya nēé gē kpó ŋmá Umúsiri mla Usílísiya ā kpó lá lɛ ācɛ ɔhá á.

¹⁷ É gē lá aúgbɔ́nya ŋmá jīpiti wā, īkpīje nēé hī usɛ́kɛlu úlā éyi ce ofu igwó kú oje nɛ̄hɛ́. É kē ī lá ɔnya éyi mla usɛ́kɛlu ofahāapa ce igwó. Iyē kú uwā nēé gē yɛ ŋmá ga ɛgiyí aɔ́cɛ́ kú ācɛ Uhɛ́ti mɛ́mla aɔ́cɛ́ kú ācɛ Usiríya á.