1 USÁMUWƐ̄LU 1 - Ubáyíbu kú Idɔma

Ɛlikána mɛ́mla aíkonó ɔlɛ́ nū

¹ Ɔ̄cɛ éyi yɔ̄ nɛ̄ iyē kú nū lé ka Ɛlkána. Ó ŋmá ipɔ́ɔma kú Ɛ́frem, ó kē lā ipú igelī nɛ̄hi kú Uráma, nōo yɔ̄ ɛfu kú Ɛ́frem ā. Ó wɛ ɔyí kú Ujérōham, nōo wɛ ɔyí kú Ɛlíhu ā, ɔyí kú Utóhi, ɔyí kú Usúfu.

² Ɛlkána lɛ anyā ɛpa, Uhána mɛ́mla Upɛnína. Upɛnína ma ayí alɛwa, amáŋ Uhána wɛ ɔdɔma.

³ Iháyí dóódu, Ɛlkána gē ŋmá ɔlɛ́ nū gē ga Ussílo, ɛga nɛ̄ ayí kú Ɛ́lāyi ɛpa, Uhófīni mɛ́mla Ufínīhasi, wɛ ācogwɛ́ɛya kú Óndú ā, gaá gbā Óndú ā nɛ̄ ɔwɔ ɔhá í yɔ̄ fíyɛ́ ɔ̄ ŋ́ mā ɛ̄gbā kóō klla gwɛ́ɛya o yɔlá dúúdú lɛ ɔ́.

⁴ Eko dúú nɛ̄ Ɛlkána le ɛya kú nū gwó lɛ Óndú ā nɛɛ, ó gē je āyā kú ɛbɛ́ kú ɛya kú nū éyi lɛ Upɛnína. Ó klla gē je āyā éyééye lɛ ayí nū dóódu, amáŋ ó gē je āyā ékpónú lɛ Uhána.

⁵ Nááná nɛ̄ Uhána he ɔ́ ɔtū nɛ̄hi ā, āyā ékpónú kú ɛbɛ́ ā nōó gē je lɛ ɔ́ á, ohígbū ka Óndú ā lɛ ɔ̄gɔ̄ɔma kú nū gwū.

⁶ Uhána móōwē ɔtūnōbí nɛ̄hi, o ŋmá lɛ okónu nɛ̄ opú nū gē yá ɔ̄ klla ī bīya anú ɔtū, ohígbū ka, Óndú ā lɛ ɔ̄gɔ̄ɔma kú nū gwū, nɛ̄ ó ma ɔyí dúúmā ŋ́ mā.

⁷ Ɛ̄nyā yɔ̄ gē yá lɛ ā, iháyí dóódu. Eko dúúmā nēé ga inu kú Óndú ā, gáā gbā ɔ̄ ɛ̄gbā nɛɛ, Upɛnína gē yá Uhána cɔ̄nū nɛ̄hi, nɛ̄ Uhána gē jikwū í gē lé ɔdōlé ŋ́.

⁸ Ɔbá nū, Ɛlkána da ɔ́ kahíníī, “Uhána, ɔdíya nāa gē jikwū ā? Ɔdíyá nɛ̄ á le ɔdōlé ŋ́ mā a? Ɔdíyá nɛ̄ ɔtū gē wū ɔ̄ ā? Ń fíyɛ́ ayí igwó gā uwɔ ŋ́ nɛɛ?”

Uhána mɛ́mla Ɛ́lāyi

⁹ Ɛ̄cī éyi, abɔ̄ é le ucɛ lé, klla le odée gwá Ussílo ā, Uhána cāŋjɛ. Eko ɔ́ɔmā, Ɛ́lāyi cīce okómpíinu kú Agblīihɔ kú Óndú ā.

¹⁰ Ɔtū yɔ̄ ī wú Uhána nɛ̄hi, anɔ́ɔ ó gbɔɔ́ ō gbɔ̄ɔkɔ yɔ̄ ī jikwū klá Óndú ā. Ó jikwū nɛ̄hi abɔ̄ ó yɔ̄ gē gbɔ̄ɔkɔ ā.

¹¹ Anɔ́ɔ ó lɛ okónu ce lɛ Óndú ā kahíníī, “Óndú nōo lɔfú fíyɛ́ dúú, ɔ́dāŋ ka a lɛ unwalu kú um má, nāa le blakwu um, nɛ̄ á tá ami nōo wɛ ɔ̄cocɛ̄hɔ̄ nɔ̄nyā kú uwɔ tónū ŋ́, nāa lɛ ɔyí nɔ̄nyīlɔ éyi je gā um, n géē je ɔyí ɔ́ɔmā lɛ awɔ nóo wɛ Óndú ā kóō wɛ ákú uwɔ piyóó, odúúdú oyēeyī kú nū. É gáā wá ɔ̄ ɛyí gbógbóō ŋ́.

¹² Abɔ́ɔ Uhána yɔ̄ ī gbɔ̄ɔkɔ gbojī ajɛ ā, Ɛ́lāyi leyīkwu okónu kú nū cíí.

¹³ Uhána yɔ̄ í kɛlā ipú ɔtū kú nū, okónu kú nū ofōōfūnū yɔ̄ í jíliyē á. Ɔ̄cɛ dúúmā í pó ɛlā nɛ̄ ó yɔ̄ í ka ā ŋ́. Anɔ́ɔ Ɛ́lāyi gbɛlá ipú ɔtū kú nū ka ejé ɔ́ɔ lɛ ɔ́ kwú.

¹⁴ Anɔ́ɔ Ɛ́lāyi da Uhána kahíníī, “Eko nyá nāa géē wīyējé nyā gāá kwu ā? Mā ejé ōwīyā tá, kú ā gbēyī gɔɔ.”

¹⁵ Amáŋ Uhána da ɔ́ kahíníī, “Ehée, óndú um, ń gwá ejé dúúmā ɛ́ɛ́ nɛ̄ n gē wīyā ejé ŋ́. Amáŋ, n wɛ ɔnyā nōo lɛ unwalu nɛ̄hi, n yɔ̄ ī gbɔ̄ɔkɔ yɔ̄ ī ka ákanya mɛ́mla unwalu kú odo kú um lɛ Óndú um nɛ.

¹⁶ Ā híī je um ka n wɛ ɔnyā ɛfulɛ́ɛfu ŋ́. Ohígbū ka n húmáyī gbɔ̄ɔkɔ lɛ ā ohígbū unwalu mɛ́mla ɔtūnōbí kú um ā lɛ Óndú ā.”

¹⁷ Anɔ́ɔ Ɛ́lāyi da ɔ́ kɔ́ɔ̄ nyɔ̄ ɛbɔ́ ka Ɔwɔicō kú Ísrɛ̄lu, ɔ́ɔ gē je ɔdā nɛ̄ ɔ́ɔ ba ā lɛ ɔ́.

¹⁸ Anɔ́ɔ Uhána da ɔ́ ka, kú anúɔ má eyī olɔhi kú nū eko dóódu mɛ́ɛnɛ. Anɔ́ɔ ó nyɛ̄ɛ̄ gaá le ɔdōlé lé. Anɔ́ɔ ó klla cɔ̄nū gɛ ŋ́ má.

É le Usámūwɛ̄lu ma

¹⁹ Anɔ́ɔ é cāŋjɛ ɔ̄cɔ̄ɔ̄cī le ɔkɔ gbā iyɔ̄bū Óndú ā, le cīgbīhi ga ɔlɛ uwá Uráma á. Ɛlkána le gwutá mla ɔnyā nū, Uhána, anɔ́ɔ Óndú ā le ɔkɔ nɛ̄ Uhána gbā ā pó á.

²⁰ Eko kpií ā, Uhána le ipú yɔ̄, anɔ́ɔ ó le ɔyínɔ̄nyīlɔ ma á. Ó kwú iyē ú ce ɔ́ kahíníī, “Usámūwɛ̄lu” ohígbū ka, ó ka anúɔ ba ɔyí ā ŋmá abɔ̄ kú Óndú ā.

²¹ Eko ga kpɔ́ nɛ̄ Ɛlkána mla odúúdú aíkonó kú nū gáā ga Ussílo gaá gbɔ̄ɔkɔ kéē klla gwɛ́ɛya lɛ Óndú ā, ɛ́gɛ́nɛ̄ é gē yá iháyí dóódu ɛ́gɛ́nɛ̄ o cokónu lɛ ā.

²² Amáŋ, eko nyā, Uhána í nyɔ̄ ŋ́. Ó da ɔbá nū ka eko dúú nɛ̄ ɔyí ā ɔ́ɔ lɛ amɛ̄ hɛ́, ɛ́ɛ́ nɛ̄ anúɔ gáā bī ɔ̄ ga iyɔ̄bū Óndú ā, cɛ́ɛ́ kú ɔ̄ í yɔ̄ agbla kú Óndú ā piyóó odúúdú oyēeyī kú nū, nɔ́ɔ klla gáā cīgbīhi wā ɔlɛ́ mla anúɔ gɛ ŋ́.

²³ Ɛlkána tá Uhána ohi ka ɔ́ɔ̄ yá ɔdā dóódu nɔ́ɔ gbɛlá ka ɔ́ɔ lɔhi ā. Ó da ɔ́ ká ɔ̄ klá ɔlɛ́ jāā gbéeko nɛ̄ ɔyí ā ɔ́ɔ lɛ amɛ̄ hɛ́. Ó klla da ɔ́ ka Óndú ā ká ɔ̄ tá abɔ̄ kú ɔ̄ lɛ okónu nɔ́ɔ ce ā yá jīla. Anɔ́ɔ Uhána má klá ɔlɛ́ yɔ̄ gē bī ɔyí a jɛ̄ á.

²⁴ Eko nɛ̄ ó lɛ Usámūwɛ̄lu amɛ̄ hɛ́, nɛ̄ ó lɛ ɔ́ bī jɛ̄ yɛɛ ā, ó kwú ɔ̄ ú ga Ussílo. Ó bī ɔbá ɛna kú iháyí ɛtá éyi, mla Okoolo kú umu kú īkpɔ̄dā igwó, mla ɔjá ɔkpɛ́bɛ́ kú ejé éyi. Anɔ́ɔ ó kwú Usámūwɛ̄lu, ɔyí nū ā ú ga agbla kú Ɔwɔicō Ussílo á.

²⁵ Eko nēé le ɔbá ɛna ā ŋmó ā, é kwú ɔyí ā ú gé lɛ Ɛ́lāyi.

²⁶ Anɔ́ɔ Uhána da Ɛ́lāyi ka ɔkpani ɔ́ɔ blakwu anúɔ ɛ́ɛ̄? Ó da ɔ́ ka anúɔ wɛ ɔnyā nɔ́ɔ má abɔ́ɔ yɔ̄ í gbɔ̄ɔkɔ lɛ Óndú á.

²⁷ Ó ka anúɔ ba ɔyí ā ŋmá abɔ̄ nū, ɔdā nɛ̄ anúɔ ba ŋmá abɔ̄ nū ā, ɔ́ɔ kē kwú lɛ anúɔ.

²⁸ Ohígbū ɔ́ɔmā a, anúɔ géē je ɔ́ tū Óndú ā abɔ̄. O ŋmá eko ɔ́ɔmā jāa gɔbū, eko nɛ̄ oyēeyī kú ɔyí ā, ɔ́ɔ géē yɔ̄ gāá kwu ā, ɔ́ɔ géē wɛ ákú Óndú Ɔwɔicō. Anɔ́ɔ é le ɔkɔ gbā lɛ Óndú ā abɔ́ɔ á.