1 AƆ́CƐ́ 1 - Ubáyíbu kú Idɔma

Eko ókplícī kú Udéfīdi

¹ Udéfīdi le hīla, kwú gbo ókplíli nɛ̄hi. É gē kpó aáto-oklíiyē alɛwa klá anú iyē, nááná ofū gē ŋmó ɔ̄ kpɔ́.

² Anɔ́ɔ ācocɛ̄hɔ̄ kú nū da ɔ́ ka, Ágábáidu, aá kóō lɛ ɔ́yípɔ̄ncɛ́nyā éyi tíne lɛ ɔ́, cɛ́ɛ́ kóō leyīkwu ɔ́, klla bēē gbo pī ɔ̄, cɛ́ɛ́ kóō lɛ ɔ́ iyē hɔ́lá.

³ Anɔ́ɔ é tíne ɔyípɔ̄nɔ̄nyā nōo jɔ̄ɔnyā klla lɔhi fíyɛ́ dúú, odúúdú ajɛ kú Ísrɛ̄lu, anɔ́ɔ é gaá lɛ Abíssāgi, nōo ŋmá ajɛ kú Ussúnɛm ā má á. Anɔ́ɔ é kwú ɔ̄ ú bī gé lɛ ɔcɛ́ á.

⁴ Ɔyípɔ̄nɔ̄nyā ā jɔ̄ɔnyā klla lɔhi nɛ̄hi. Anɔ́ɔ ó gbɔɔ́ ō leyīkwu ɔcɛ́ klla í gwutá pī ɔ̄ kóō lɛ ɔ́ iyē kwɔ́lá á. Amáŋ ɔcɛ́ í cikpó nū ŋ́.

Adónīja kwú ɔcɛ́ ú lɛ īyī nū

⁵ Ɛpléeko ɔ́ɔmā, abɔ̄ Ábsālɔm nōo wɛ ɔ́kplá ā í yɔ̄ gɛ ŋ́ mā, Adónīja nɛ̄ ɛ́nɛ́ nū wɛ Uhágiti ā, kwú pīya ɔ́kplá kú Udéfīdi nōo í lé ɔcɛ́ kwɛyí Udéfīdi mɛ́ɛ̄ á. Ɛ̄cī éyi, ó gaá le úgbɔ́ɔnya mɛ́mla aɔ́nya mɛ́mla ācɛ o ce ɔnya mɛ́mla ācɛ nōo ī gbō ɔ̄ ɛyí ofɛpa cigwó plla lɛ īyī nū.

⁶ Ádā nū Udéfīdi, ɔcɛ́ í cɔ̄nū dɛ̄gba tū ɔ̄ kú ucē obɔ̄bí ɛ̄cī ékpónú jéjée ɛ́ɛ́ ŋ́. Ó kē jē oklóbīya nɛ̄hi. Anú wɛ ɔmace kú Ábsālɔm á.

⁷ Ó le ɛlā kú ɔcɛ́ nōó dɔɔ̄kā kóō lé ā miya mla Ujówābu, ɔyí kú Ussɛruya, mɛ́mla Abíyāta, ɔ̄cogwɛ́ɛya ā. É cɛ̄ klla le yɛce ɔ́.

⁸ Amáŋ Usádɔ̄ku, ɔ̄cogwɛ́ɛya ā, mɛ́mla Ubenaya, ɔyí kú Ujɛhóyāda, mɛ́mla Unátan ɔ̄comɛ́ɛbɛ mɛ́mla Ussíméyi, Uréyi, mɛ́mla ācɛ nēe gē gbō Udéfīdi ɛyí ā í yɛce Adónīja ŋ́.

⁹ Ɛ̄cī éyi, Adónīja bī aálá, omlede, ɛna lɛ ɛya gwó ɛyí ápátɛ́cɔ̄ kú ɛgwā nōo kwu Unrōgɛlu ajaajɛ ā. Ó lɛ odúúdú ayí kú Udéfīdi ɔhá ā mɛ́mla aígabɔ̄ kú Udéfīdi nēe ŋmá Ujúda ā kpó hīgwú wā ɔnū ucɛ ā.

¹⁰ Amáŋ ó hī ɔyí ádā nū, Usólōmɔn ámaŋ ka Unátan, ɔ̄comɛ́ɛbɛ ā, ámaŋ ka Ubenáya ámaŋ ka aígabɔ̄ kú Udéfīdi ohile ā igwú wā ɔnū ucɛ kú ɛya nōó gwó ā ŋ́.

É kwú Usólōmɔn í cɔcɛ́

¹¹ Anɔ́ɔ Unátan le tá ɛgiyí Ubatisséba, ɛ́nɛ́ kú Usólōmɔn gaá da ɔ́ ka ɔ́ɔ pó ka Adónīja, ɔyí kú Uhágiti kwú pīya ɔcɛ́ kwɛyí ádā nū, amáŋ ádā nū ɔ́ɔ kē jé ɛ́ɛ ŋ́ mā ā.

¹² Unátan da ɔ́ ka ɔ́dāŋ ka ɔ́ɔ tíne kóō lɛ oyēeyī kú anú mɛ́mla ákú ɔyí nū Usólōmɔn nyatá, ayíka ɔ́ɔ wā ká anúɔ lɛ ɛlā nwū ɔ̄.

¹³ Anɔ́ɔ ó da ɔ́ kóō nyɔ̄ ga ɛgiyí Udéfīdi bōōbū gaá da ɔ́ kahíníī, “Ágábáidu ɔcɛ́, á cokónu klla gbɛka ga um ka, Usólōmɔn, ɔyí um ɔ́ɔ géē wɛ ɔcɛ́ kwɛyí uwɔ ŋ́ nɛɛ? Ɔdí yá nɛ̄ Adónīja je pīya ɔcɛ́ mɛ́ɛ̄ ā?”

¹⁴ Unátan klla da ɔ́ ka eko nɛ̄ ɔ́ɔ bī ɛlā okónu yɔ̄ ī ka lɛ ɔcɛ́ kpɔ́ ɛ́ɛ́ mā, anúɔ géē bēhé wā í kɛlā ékpó ɔ́ɔmā dúú.

¹⁵ Anɔ́ɔ Ubatisséba le tá ipú inu eyīpú ɛgiyí ɔcɛ́ á. Udéfīdi le hīla nɛ̄hi eko nyā ɛɛ́. Abíssāgi nēe ŋmá Ussúnɛm ā, yɔ̄ í leyīkwu ɔ́ mɛ́ɛ̄ á.

¹⁶ Ubatisséba túkpɛɛ́ lɛ okónu hɛ́ tū ɔcɛ́, anɔ́ɔ ɔcɛ́ da ɔ́ ɔ̄kā ka ɔdí nɛ̄ ɔ́ɔ tíne ka anúɔ yá lɛ ɔ́ āa?

¹⁷ Anɔ́ɔ ó tá Udéfīdi, ɔcɛ́ ā, ohi kahíníī, “Óndú um, a bī iyē kú Óndú ā, nōo wɛ Ɔwɔicō kú uwɔ ā, le cokónu gā um ka, Usólōmɔn, ɔyí um, ɔ́ɔ géē wɛ ɔcɛ́ kwɛyí úwɔ á.

¹⁸ Amáŋ abālɔbányā, Adónīja kwú pīya ɔcɛ́ ɛɛ́, nááná nɛ̄ Ágábáidu í kē jé ɔdā dóódu lɛyíkwu ɔ́ ɛ́ɛ́ ŋ́ mā.

¹⁹ Ó bī aálá, aɔ́bɛ́ɛna, aómlede mɛ́mla ayí ɛna o tīije le ɛya gwó. Ó kōō le Abíyāta, ɔ̄cogwɛ́ɛya ā, mɛ́mla Ujówābu, otrɛ̄yí kú aícɔ́ɔja kú uwɔ mɛ́mla ayínɔ̄nyīlɔ kú ɔlɛ̄ uwɔ kpó hīgwú ga ɔnū ucɛ ā. Amáŋ ó hī ɔyínɔ̄nyīlɔ kú uwɔ, Usólómɔ̄n igwú ŋ́.”

²⁰ Ubatsséba klla da ɔ́ ka Ágábáidu, odúúdú ācɛ Ísrɛ̄lu ɛ́ɛ le eyī kpó klá anú eko ɔ́ɔmā ka ɔ́ɔ̄ da uwá, ɔ̄cɛ nōo géē wɛ ɔcɛ́ kwɛyí nū ā.

²¹ Ubatisséba da Ágábáidu, ɔcɛ́ ā ka ɔ́dāŋ ka ɔ́ɔ lɛ ā, eko nɛ̄ ɛjɛ le tá ɔtɛ́, ɛ́ɛ géē je anúɔ mɛ́mla ɔyí anúɔ, Usólómɔ̄n bɛ̄ɛka ācoyíbīyājɛ ā.

²² Abɔ̄ Ubatsséba yɔ̄ í kɛlā mla ɔcɛ́ kpɔ́ ɛ́ɛ́ mā, Unátan, ɔ̄comɛ́ɛbɛ ā gā inu.

²³ Anɔ́ɔ é da ɔcɛ́ ka Unátan, ɔ̄comɛ́ɛbɛ ā yɔ̄ abɔ́ɔ, anɔ́ɔ Unátan le bēhé ga ipú inu gaá túkpɛɛ́ iyɔ̄bū ɔcɛ́ ā á.

²⁴ Anɔ́ɔ Unátan da ɔcɛ́ kahíníī, “Ágábáidu, a le ka tɛ́ɛcɛ ka Adónīja kwú pīya ɔcɛ́ kwɛyí uwɔ ɛɛ́ nɛɛ?”

²⁵ Ó klla da Udéfīdi, ɔcɛ́ ā, ka īcíícɛ ɔ́ɔmā piíí ā, Adónīja ɔ́ɔ le yɛ gaá le aɔ́bɛ́ɛna, aálá, mɛ́mla ayí ɛna o tījē kpó gwɛ́ɛya. Ó klla da ɔcɛ́ ka Adónīja ɔ́ɔ le odúúdú ayínɔ̄nyīlɔ kú ɔlɛ́ ɔcɛ́, Ujówābu, otrɛ̄yí kú aícɔ́ɔja kú ɔlɛ́ ɔcɛ́, mɛ́mla Abíyāta, ɔ̄cogwɛ́ɛya, kpó hīgwú ga ɔnū ucɛ ā. Ó klla da Udéfīdi, ɔcɛ́ ka ɔkwɔɔkwu ɔ́ɔmā, ɛ́ɛ bá ī lé ucɛ mla anú klla bá ī tá ɔ̄ ɔ́gbá ka ‘Ágábáidu, Adónīja, ɔcɛ́ kóō yēeyī piyóó’.

²⁶ Ó klla da ɔcɛ́ kéē hī anúɔ mɛ́mla Usádɔ̄ku, ɔ̄cogwɛ́ɛya ámāŋ ka Ubenáya, ɔyí kú Ujɛhóyāda ámāŋ ka Usólōmɔn igwú ŋ́.

²⁷ Anɔ́ɔ ó da ɔcɛ́ ka ɔ́ɔ le ɔdā ɛ́gɛ́nyā yá, anɔ́ɔ ɔ́ɔ ka lɛ aígabɔ̄ kú ɔlɛ́ nū, ɔ̄cɛ nōo géē wɛ ɔcɛ́ kwɛyí nū ŋ́ máā?

²⁸ Anɔ́ɔ Udéfīdi tá uwá ohi kahíníī, “Áá lɛ Ubatisséba hīgwú ga um.” Anɔ́ɔ ó gā ipú inu gaá háyi iyɔ̄bū ɔcɛ́ á.

²⁹ Anɔ́ɔ ɔcɛ́ ā le ɛka gbo lɛ ɔ́ kahíníī, “Ɛ́gɛ́nɛ̄ Óndú ā nya odo kú um tá ŋmá abɔ̄ kú aólɛlā kú um dóódu ā,

³⁰ n géē lɛ ɛka nɛ̄ n gbo gā uwɔ iyɔ̄bū kú Ɔwɔicō kú Ísrɛ̄lu ā, ka Usólómɔ̄n, ɔyínɔ̄nyīlɔ kú uwɔ, géē wɛ ɔcɛ́ kwɛyí um ā tū.”

³¹ Anɔ́ɔ Ubatisséba túkpɛɛ́ wāajɛ lɛ ɔ́gbá tá ɔcɛ́ kahíníī, “Ágábáidu ɔcɛ́, abɔ̄ nōo lɛ ajɛ, yēeyī piyóó.”

³² Anɔ́ɔ Udéfīdi, ɔcɛ́ ā, le ɛhɔ̄ tū fu Usádɔ̄ku mɛ́mla Unátan mɛ́mla Ubenáya kéē lɛ uwá kpó hīgwú wā. Eko nēé le pɛ́ wā ipú inu ā,

³³ ó da uwá kahíníī, “Lɛ aígabɔ̄ kú um kpó tɔ̄ɔkwu, cɛ́ɛ́ aá kwú Usólómɔ̄n ú ce ɛyí ɔnya kú ɔcɛ́ kú um ga njɔlɔ kú Ugíhɔn.

³⁴ Cɛ́ɛ́ kú Usádɔ̄ku ɔ̄cogwɛ́ɛya ā, mɛ́mla Unátan, ɔ̄comɛ́ɛbɛ ā kéē lɛ anɔ̄ tū ɔ̄ ɛyí, cɛ́ɛ́ kóō kwú pīya ɔcɛ́ kú Ísrɛ̄lu. Ó klla da ɔ́ ká ɔ̄ lɛ opo tá ka, ‘Usólōmɔn, nōo wɛ ɔcɛ́ ā kóō yēeyī piyóó’.”

³⁵ Udéfīdi, ɔcɛ́ da uwá kéē tá ɔ̄ ɔkwu wā agblɔ̄cɛ́ kú anúɔ eko nɛ̄ Usólómɔ̄n ɔ́ɔ í wā í cīce akpa kú ɔcɛ́ kú anúɔ ā. Ó ka anú ɔ́ɔ gáā lé ɔcɛ́ kú Ísrɛ̄lu kwɛyí anúɔ á. Ó ka ohígbū ka Usólómɔ̄n nɛ̄ anúɔ fu kóō wɛ ɔcɛ́ kú ācɛ Ísrɛ̄lu mɛ́mla ákú ācɛ Ujúda á.

³⁶ Anɔ́ɔ Ubenáya, ɔyí kú Ujɛhóyāda tá ɔcɛ́ ohi kahíníī, “Alɔ géē yá lɛ a! Ká Óndú ā, nōo wɛ Ɔwɔicō kú Ágábáidu, ɔcɛ́ ā, kóō cɛ̄ lɛ ɔ́ le yá lɛ ā dúú.”

³⁷ Ubenáya klla ka ka ɛ́gɛ́nɛ̄ Óndú ā humáyī yɔ̄ mla Ágábáidu ā, kóō yɔ̄ mɛ́mla Usólōmɔn lɛ ā dúú, kóō lɛ ofu lé fíyɛ́ ádā nū, Udéfīdi, ɔcɛ́ ā.”

³⁸ Anɔ́ɔ Usádɔ̄ku, Unátan, Ubenáya mɛ́mla ācogbɔ̄ɔ̄cɛ́ kú ɔlɛ́ Udéfīdi ā, gaá kwú Usólōmɔn ú ce ɔnya kú ɔcɛ́ ā, anɔ́ɔ ó le ɔ́ bī ga Ugíhɔn á.

³⁹ Usádɔ̄ku ɔ̄cogwɛ́ɛya ā gaá kwú ajī kú anɔ̄-ō-tɛ̄yí ā ú ŋmá ipú Agblīihɔ ā, anɔ́ɔ ó lɛ anɔ̄ ā tū Usólōmɔn ɛyí. Anɔ́ɔ é lɛ opo tá, anɔ́ɔ odúúdú ācɛ ā kahíníī, “Oyēeyī kú Usólómɔ̄n, ɔcɛ́ ā, kóō yɔ̄ gbojī ajɛ.”

⁴⁰ Anɔ́ɔ odúúdú ācɛ gbɔɔ́ ō tá ɔ̄ ɔkwu, bá ī gwō uba, bá ī tá opo, bá ī gwō ɛ̄ngwū, bá ī jīijē bá ī yúuya, klla bá gē gwéeyē nɛ̄hi. Uya kú uwā ā le ajɛ hɛ́ɛpa.

⁴¹ Abɔ̄ Adónīja mɛ́mla aúgbɔga kú ɔlɛ́ nū ā bá í lé ucɛ ā kwɛyí ā, anɔ́ɔ é pó uya kú éeyī ō gwó á. Eko nɛ̄ Ujówābu le ɔkɔ kú opo ā pó ā, ó le ɔ̄kā da ka uya kú ɔdí nyá háyi ipú igelī kwūūū āa?

⁴² Abɔ̄ ó bī ɛlā okónu yɔ̄ í ka kpɔ́ ɛ́ɛ́ ā, Ujonátan, ɔyí kú Abíyāta ɔ̄cogwɛ́ɛya ā faajɛ. Anɔ́ɔ Adónīja da ɔ́ ka ɔ́ɔ le bēhé, ohígbū ka ɔ́ɔ kē wɛ ɔ̄cɛ olɔhi nɛ, ɔ́ɔ klla bī ɔ̄kā olɔhi wā nɛ.

⁴³ Anɔ́ɔ Ujonátan tá ɔ̄ ohi ka ehée, Udéfīdi, ɔcɛ́ ā ɔ́ɔ kwú Usólōmɔn ú cɔcɛ́ ɛɛ́.

⁴⁴ Ó klla da ɔ́ ka Ágábáidu ɔ́ɔ kōō le Usádɔ̄ku, ɔ̄cogwɛ́ɛya ā, mɛ́mla Unátan, ɔ̄comɛ́ɛbɛ ā, mɛ́mla Ubenáya, ɔyí kú Ujɛhóyāda mɛ́mla ācɛ nēe gē gbō ɔcɛ́ ɛyí ā kpó tɛ̄hɔ̄ kéē lɛ ɔ́ bíiyē. É kwú ɔ̄ ú ce ɔnya kú ɔcɛ́ dúú.

⁴⁵ Anɔ́ɔ Usádɔ̄ku mɛ́mla Unátan kwú anɔ̄ ú tū ɔ̄ ɛyí, anɔ́ɔ é kwú ɔ̄ ú pīya ɔcɛ́ njɔɔlɔ kú ga Ugíhɔn á.

⁴⁶ Usólōmɔn kē cīce akpa kú ɔcɛ́ ā mɛ́ɛ̄ á.

⁴⁷ Ofíyɛ̄ dúú ā, aígabɔ̄ ā gē pɛ́ ipú inu ɛga nɛ̄ Ágábáidu, Udéfīdi yɔ̄ ā ī tá ɔ̄ ɔ́gbá, gē kahíníī, “Ɔwɔicō kú uwɔ kóō le yá cɛ́ɛ́ kú Usólōmɔn kóō lɛ ofu lé fíyɛ́ uwɔ. Ká Usólómɔ̄n kóō gbagbénú nɛ̄hi fíyɛ́ ákú uwɔ. Anɔ́ɔ Udéfīdi, ɔcɛ́ ā tú ɛyí kpɛɛ́ ɛyí agōdō kú nū le ɛ̄gbā gbā Ɔwɔicō á.

⁴⁸ Anɔ́ɔ Udéfīdi, ɔcɛ́ le ɔkɔ gbā lɛ Óndú ā kahíníī, “N hɔ́hā ce Óndú ā, Ɔwɔicō kú ācɛ Ísrɛ̄lu, nōo yá ka ɔyí um éyi kóō mīyɛ ɔkwu ɔcɛ́ kú um ícɛ nyā, ipéyī um ā.”

⁴⁹ Anɔ́ɔ ufi nɛ̄ɛ̄nɛ̄hi le odúúdú aúgbɔga kú ɔlɛ́ Adónīja kwú, anɔ́ɔ ɔnyɔɔnyɛ kú uwa nyāŋjɛ le tá ɔlɛ́ nū á.

⁵⁰ Anɔ́ɔ ufi kú Usólómɔ̄n gbɔɔ́ ō yá Adónīja nɛ̄ɛ̄nɛ̄hi á. Ó le kwu ga Agblīihɔ ā gaá bī aájī kú ede ā.

⁵¹ É gaá le da Usólōmɔn ka Adónīja ɔ́ɔ yɔ̄ í yúúfi nū anɔ́ɔ ɔ́ nyɔ̄ í kwú abɔ̄ ú fúlá tū aájī kú ede ā, yɔ̄ ī ka ka anúɔ tíne kú Usólómɔ̄n, ɔcɛ́ ā kóō lɛ ɛka gbo lɛ anúɔ kóō gaá ŋmó anúɔ ŋ́.

⁵² Anɔ́ɔ Usólómɔ̄n le ohi tá ɔ̄ ka ɔ́dāŋ ká ɔ́ɔ lɛyítáajɛ lɛ anúɔ, ɔ̄cɛ dúúmā í gáā lɛ abɔ̄ kwu ɔ́ ŋ́. Amáŋ ɔ́dāŋ ka ɔ́ lɛ ā ŋ́, ɔ́ɔ géē kwú piíí.

⁵³ Anɔ́ɔ Usólōmɔn, ɔcɛ́ le ɛhɔ̄ tū, anɔ́ɔ é gaá le Adónīja bī ŋmá ɛgiyí ede ā. Anɔ́ɔ ó le tá ɛgiyí ɔcɛ́ ā gaá tūkpɛɛ́ iyɔ̄bū nū, lɛ ɔ́gbá tá ɔ̄ á. Anɔ́ɔ Usólōmɔn, ɔcɛ́ ā da ɔ́ ká ɔ̄ nyɔ̄ ɔlɛ́ nū mɛ́ɛnɛ.