1 ĀCƐ UKƆ́RĪNTI 1 - Ubáyíbu kú Idɔma

Upɔ́lu hókónu klla tá ahínyá

¹ Ami, Upɔ́lu, nɛ̄ Ɔwɔicō abɔ̄yīnū fu kú n wɛ ɔ̄cotɛ̄hɔ̄ kú Ujísɔ̄si, Ohɛɔ́nyɛtá ā, mɛ́mla ɔyínɛ alɔ, Usostɛ́nes tá ɔkpá nyā ā.

² N tá ɔkpá nyā gé lɛ ācɛ icɔ́ɔci kú Ɔwɔicō nōo yɔ̄ ipú Ukɔ́rīnti ā, mɛ́mla odúúdú ācɛ nɛ̄ Ɔwɔicō abɔ̄yīnū fu kéē wɛ ācɛ otīihɔ kú ɔlɛ́ nū, mɛ́mla ācɛ nēe wɛ ákú Ɔwɔicō, ohígbū keé le pīyatɔ̄há mla Ujísɔ̄si, Ohɛɔ́nyɛtá ā, mɛ́mla odúúdu ācɛ nēe bá ɛga dóódu nēe gē gbā Óndú Ujísɔ̄si, Ohɔ́nyɛtá, nōo wɛ Óndú uwā mɛ́mla Óndú alɔ dúú ā ɛ̄gbā.

³ N gē gbɔ̄ɔkɔ kú Ɔwɔicō, Ádā alɔ mɛ́mla Óndú ā Ujísɔ̄si, Ohɔ́nyɛtá ā kéē hɔ́hā ce aá, kéē yá kú aá lɛ ɛbɔ́.

Aɔ́dā olɔhi nɛ̄ Ɔwɔicō gē je lɛ alɔ oŋmá lɛ iyē kú Ujísɔ̄si, Ohɔ́nyɛtá ā.

⁴ N gē tá Ɔwɔicō kú um ahínyá ojigógó ohígbū ɔdā olɔhi nōó yá lɛ aá ohígbū Ujísɔ̄si, Ohɔ́nyɛtá ā.

⁵ Ohígbū ka abɔ̄ aá le pīyatɔ̄há mla Ujísɔ̄si, Ohɔ́nyɛtá ā, Ɔwɔicō lɛ agbénú kú ɔdā dóódu kpó lɛ aá, ɔdā nɛ̄ aá jé lɛyíkwu ɔ̄kōolɔhi ā mɛ́mla ɔwɛ nɛ̄ aá gē tɔ́ɔna nū tɛ́ɛcɛ dóódu glá ā wɛ dúú.

⁶ Aá mīyɛ ijáalí nɛ̄ ācɛ cɛ̄ lɛyíkwu, Ohɔ́nyɛtá ā dúúdú.

⁷ Anɔ́ɔ Ɔwɔicō lɛ ɛjɛ̄ɛ̄jī ɛhi kú alelékwū kpó lɛ aá abɔ̄ aá bá gē gbēyī Ɔwɔicō kóō lɛ ɔfú kú Ujísɔ̄si mafú āá.

⁸ Ó géē yá kú ɔtū nɛ̄ aá le ce ɔ́ ā kóō le lɔfú jāā gbó ɛ̄cī ámōōmɛ ā, cɛ́ɛ́ kú aá híīī lé ɛpɔ̄bí ɛ̄cī nɛ̄ Ohɔ́nyɛtá Ujísɔ̄si géē kwúcē wā ā ŋ́.

⁹ Alɔ lɔtūce Ɔwɔicō nōo hī aá igwú kú aá wā í pīyatɔ̄há mla ɔyínɔ̄nyīlɔ kú nū, Ujísɔ̄si, Ohɔ́nyɛtá ā, nōo wɛ Óndú alɔ ā.

Upɔ́lu ŋmó ācɛ nēe kɔ̄ iyī uwā ígwíígwu ipú icɔ́ɔci ā okónu

¹⁰ Óndu Ujísɔ̄si, Ohɔ́nyɛtá ā lɛ ɔfú je gā um ɛɛ́. Ohígbū ɔ́ɔmā n yɔ̄ gē gbɔ̄ɔkɔ lɛ aá, ayínɛ́ um, kú aá bēē cɛ̄ tɔ̄há mla iyī aá ipú ɛlā dúú nɛ̄ aá ka ā, cɛ́ɛ́ kú aá híīī kɔ̄ ígwíígwu ŋ́. Aá cɛ̄ tɔ̄há dúúdú, ipú ɔdā nɛ̄ aá í gbɛlá mɛ́mla ɔdā nɛ̄ aá ī dɔɔ̄kā.

¹¹ Ohígbū ka, ācɛ ōhī ŋmá ipɔ́ɔnū kú Uklóye wā í da um ka ikpɛ́la ɔ́ɔ yɔ̄ ɔtāhɛ̄ aá.

¹² Ɔdā nɛ̄ n ka ā wɛ ɛ̄nyā ā. Ɔnyɔ̄ɔnyɛ kú aá í ka ɔdā ɛyɛ́ɛyɛ́yí. Ɔ̄cɛ ōhī ī ka kahíníī, “N gē yɛce Upɔ́lu.” Ācɛ ɔhá kē ī ka kahíníī, “N gē yɛce Apólɔsi.” Ācɛ ɔhá gē ka kahíníī, “N gē yɛce Upíta.” Ācɛ ɔhá klla gē ka kahíníī, “N gē yɛce Ohɔ́nyɛtá ā.”

¹³ Aá gē yá odée bɔ̄ɔdā nēé le Ohɔ́nyɛtá ā kɔ̄ ɛga alɛwa nōó, wɛ ɔ̄cɛ ékpónú ŋ́ mā. Upɔ́lu wɛ ɔ̄cɛ nēé hɛ́ bá ɔcóōnyɔ́kpá á nɛɛ? É kpó ɛka Ɔwɔicō tū aá ɛyí ká aá le pīya ācɛ o yɛce Upɔ́lu nɛɛ?

¹⁴ N tá Ɔwɔicō ahínyá ɛ́gɛ́nɛ̄ ń kpó ɛka Ɔwɔicō tū ɔ̄cɛ dúúmā kú aá ɛyí ŋ́ mā, ń táafú ŋ́ ayíka Ukrispɔ́si mɛ́mla Ugáyɔ̄si ōfōōfūuwā.

¹⁵ Ɔ̄cɛ dúúmā í gáā ka kéē kpó ɛka Ɔwɔicō tū aá ɛyí cɛ́ɛ́ kú aá le pīya ayíkpó kú um ŋ́.

¹⁶ Īī gbóó, n kpó ɛka Ɔwɔicō tū Usitefánasi mɛ́mla aíkonó kú nū ɛyí. Amáŋ ń gbɛlá ka n kpó ɛka Ɔwɔicō tū ɔ̄cɛ ɔhá dúú ɛyí gɛ ŋ́.

¹⁷ Ohɔ́nyɛtá ā í tū um ɛhɔ̄ ka n kpó ɛka Ɔwɔicō tū ācɛ ɛyí ŋ́. Ó tū um ɛhɔ̄ ka n tɔ́ɔna kú ɔ̄kōolɔhi ā tɛ́ɛcɛ. Abɔ̄ n yɔ̄ ī tɔ́ɔna kú ɔ̄kōolɔhi ā, ń bī íjééyī kú okónu ojé kú alɛɛcɛ ŋ́. Ɔ́dāŋ ka n le yá lɛ ā nɛɛ, ɔfú géē yɛ í yɔ̄ ipú olɛhɔ̄ nɛ̄ n cɛ̄ lɛyíkwu ikwu kú Ohɔ́nyɛtá ā ɛyí ɔcóōnyɔ́kpá ŋ́.

Alɔ má ɔfú mɛ́mla íjééyī kú Ɔwɔicō ipú Ohɔ́nyɛtá ā

¹⁸ Ohígbū ka olɛhɔ̄ lɛyíkwu ikwū kú Ohɔ́nyɛtá ā ɛyí ɔcóōnyɔ́kpá ā wɛ ɔdāhá tū ācɛ nēe yɔ̄ ī yíífi tāajɛ ā. Amáŋ ó wɛ ɔfú kú Ɔwɔicō lɛ alɔ nēé yɔ̄ ī nyatá ā.

¹⁹ Ɔkpíihɔ ā kahíníī, “N géē je íjééyī kú ācojéeyī gbliífi. N kē í tá ɔdā nɛ̄ ācɛ ojɔ́ɔda jé ā.”

²⁰ Abɔ̄ ó lɛ ā, iní nɛ̄ ācojéeyī mɛ́mla ācɛ ojɔ́kpá nɛ̄hi mɛ́mla ācɛ o jé ō táafú ā bá ā? Ɔwɔicō le mafú ka íjééyī kú ɛcɛ nyā wɛ íla nɛ̄ɛ̄nɛ̄hi.

²¹ Abɔ̄ Ɔwɔicō jééyī nɛ̄hi ā, ó lɛ ɔ́ ya kóō híīī tɔ́ɔtɛ lɛ ācɛ kéē bī íjééyī kú uwā le jé anú nōo wɛ Ɔwɔicō ā glá ŋ́. Ikɔkɔ ɔ́ɔmā, oŋmá olɛhɔ̄ nɛ̄ alɔ tɔ́ɔna nū, nɛ̄ ācɛ je ɔ́ ka ɔdāhá ā nɛ̄ Ɔwɔicō bī le nya ācɛ nēe cɛ̄ ā tá á.

²² Ācɛ Ujíyu gē dɔɔ̄kā úklɔ́ ō hídáagó kóō wɛ ɔdōcābɔ̄ lɛ uwá ka olɛhɔ̄ ā ŋmá ɛgiyí Ɔwɔicō. Anɔ́ɔ ācɛ Ugríisi gē dɔɔ̄kā ɔdā ijéeyi nōo í cɛ̄ tɔ̄há mla ákú uwā.

²³ Ákú alɔ ā, alɔ gē kɛlā tɛ́ɛcɛ lɛyíkwu Ohɔ́nyɛtá nēé nyɔ́kpá ā. Olɛhɔ̄ ɔ́ɔmā wɛ ɔdā ō ŋmó ɔwɛ tū ācɛ Ujíyu, ó kē wɛ ɔdīcííci tū aílɔ́wá ā.

²⁴ Amáŋ ákú ācɛ nēé fu ā, ācɛ Ujíyu mɛ́mla aílɔ́wá, olɛhɔ̄ nyā lɛyíkwu Ohɔ́nyɛtá ā, nōo wɛ ɔfú mɛ́mla íjééyī kú Ɔwɔicō ā.

²⁵ Ohígbū ka ɔdā nōo lɛbɛ̄ɛka íla kú Ɔwɔicō ā jéeyī fíyɛ́ íjééyī kú ɔlɛɛcɛ á. Ɔdā nōo lɛbɛ̄ɛka ahi kú Ɔwɔicō ā lɔfú fíyɛ́ ɔfú kú ɔlɛɛcɛ á.

²⁶ Aá gbɛlá kwu ɔdā nɛ̄ aá wɛ gbɔbū ɛ́ɛ́ nɛ̄ Ɔwɔicō nya aá tá ā, ayínɛ́ um. Oŋmá ɛ́gɛ́nɛ̄ ɔlɛɛcɛ gē miya ɔdā kú uwā lɛ ā, ācɛ alɛwa kú áa í jééyī ámāŋ lɔfú nɛ̄hi ámāŋ ma tū ipɔ́ɔnū kú olɔdu ŋ́.

²⁷ Ɔwɔicō jégēdē lɛ ɔdā nɛ̄ ɔlɛɛcɛ je koó wɛ ɔdīcííci ā fu, o yá ɛ́ɛ́ kóō lɛ uwēyī je lɛ ācojéeyī ā. Ó kē fu ɔdā nɛ̄ alɛɛcɛ je koó lɔfú ŋ́ mā, o yá ɛ́ɛ́ kóō lɛ uwēyī je lɛ olɔfú nɛ̄hi ā.

²⁸ Ācɛ nɛ̄ alɛɛcɛ gē leyī gwō uwā bónū í klla je uwá kéē wɛ ɔdā dúú ŋ́ mā, wɛ ācɛ piíí nɛ̄ Ɔwɔicō fu á. Ó yá ɛ̄nyā o yá ɛ́ɛ́ kóō lɛ ācɛ nēe ka aá wɛ odée ā pīya ācɛ nēé wɛ ɔdā dúú ŋ́.

²⁹ Ohígbū ɛnya ɔ̄cɛ dúú í yɔ̄ nōo lɔfú gwō iyɔ̄bū Ɔwɔicō glá ŋ́.

³⁰ Amáŋ Ɔwɔicō le yá kú aá le pīyatɔ̄há mla Ujísɔ̄si, Ohɔ́nyɛtá ā. Anú yá ɛ́ɛ́ nɛ̄ alɔ wɛ ācojéeyi ɔkwɔ̄ɔ̄kwɛ̄yi á. Anú wɛ ɔ̄cɛ nōo bī alɔ wā ipú ɛma okpaakpa mla Ɔwɔicō, anɔ́ɔ ō lɛ alɔ fūla, kwú alɔ pīya ācɛ nēe wɛ ákú Ɔwɔicō abāābɔ̄yīnū á.

³¹ Ohígbū ɔ́ɔmā, ɛ́gɛ́nɛ̄ é tá tū Ɔkpíihɔ ka lɛ ā ā, “Ɔ̄cɛ dúú nōo tíne ō gwo, kóō bī ɔdā nɛ̄ Óndú ā yá ā le gwō.”