Titu 1 - Etkwen New Testament

Bulu bi Titu fwa

¹ Afketa chí ena vǝ a zǝn m, Bulu, ya mochi mo Ehwya ngge etsonchi mo Yeso Kristi, evǝ mo chaebi mo be ya Ehwya è swa ara ngge eyim mo ebi nwone e du be be bwe mò a Ehwya dgyan anga.

² Kǝnggwa ba no ngge shwa enyim a chu nya e no a fwa efwam nwone a Ehwya, e fe ye fwafe anga ra, è senvǝ jan ga no be nobǝ sangǝ́ bè chà mmò zǝnchaje ángá.

³ Adi ekpengga edefǝfǝ ena, Ehwya fijan ara je fwa mo nya ena a tswa fwa mbwe. Ehwya nwene e tivǝ́ je anga, è no ara m fwa ena me e ti e jan be nobǝ.

⁴ M bá mò ena no o anga Titu, nwen m adi ebi, a chu chaebi nwone a je binbin nyishwa mo je no a chu mo nó ángá. M bgó Ehwya nwene e no Ate je ngge Yeso Kristi nwene è tivǝ́ je ángá, jan be e bwe o esese ngge be e no o tsuruku adgye.

Mochi a Bulu è du Titu ge e bwe a ebin etù a Kiriti ángá

⁵ Mò è bwe m̀ gwa o a ebin etù a Kiriti ángá, a evǝa we bwe e kǝ̀n mochi è chà danshi ángá, adi efwa esese, ngge we swa be echikǝ̀n mo be àtá aduwa a tswa binbin mo be eten abu m̀ jan o ángá.

⁶ Ge no kenm jan echikǝ̀n ge e ben ye mò a ba tso ye efya a chu mo nó ra, ge e no nobǝ ebi chafya mo gwa ye, ende a mbǝgya mbwe no be ya ekǝ̀n-etsǝ́m a chu Ehwya, ngge be nobǝ a jan be jan ba ya e bwe mò esera ngge ba ya chu echam ra.

⁷ Adia chu mo àtá aduwa, a ende e fu be ya aduwa no a bu mbwe ángá, ge no kenm ga no zǝno a ende akan a jan ye jan ge bwe ara mò e no esera ra. Ge no kenm ga no ye ya fǝ́ esem eno e ra ende e fku san tsuruku anga ra. Ge no kenm ga no ye ende e ngǝfǝ́ tson anga eno e ra ende e tkyá etkya anga ra. Ge no kenm ga no ye ende e chifǝ anga evǝa ge e ben etubim amme a chu be mò jwa mbwe ra.

⁸ Tea, ge e no ende e cha be ya echan bu fà fà anga. Ge no kenm ga no ende e dgyan mò e no esese anga, ngge ende e fu chu ye anga. Ge no kenm ga no ende e bweshwa ye mò anga ra, ga no nobǝ echanwenwen, ngge ge tubge ara chu ye.

⁹ Ge no kenm ge e fu e seshi fwa ebi abu bè tú ye nó, evǝa ge e jan e bon be nobǝ ya ehwyà ekǝ̀n ngge moetum ebi ena. Ge e tkyá be ya e twa efyan mo fwa ebi ena anga, etkya.

Abu wa tkyá be nobǝ ya e bwe mò esera anga etkya

¹⁰ Adia be ya chu echam no àywá, be ya e tku vǝ kukwa anga ngge be ya e nggade be nobǝ anga, chìchì mo nó, a be ya e chifǝ jan ne no kenm be e tsen nobǝ tkyà sangǝ́ ge chà a ben etivǝm ángá.

¹¹ Ge no kenm be e twa e pe be kpevǝ adia be no bwezhin be nobǝ tón ken anga kpenmu kpenmu ngge be moetum amme mo be. Be bwe e nò anga evǝa be e ben tse a zǝn be nobǝ.

¹² Èé akan mo be efojan mo be, e no ya a Kiriti gaten ángá è jan, “Be ya a Kiriti no kpwa be ya fwafe, be no abu be gwe ebgen, be ya ekǝ̀n etwam, ya e de mode twafǝ̀ chu.”

¹³ Fwa ejantum ena jan na, no ebi. No enona, we tkyá be etkya echakpokpo evǝa be e nga be nobǝ ya a no ngge shwa enyim echakpokpo a chu Ehwya,

¹⁴ na nyi be tsuruku mo be a chu be moefì mo be ya a Yahuda ra, eno e ra moetum mo be ya e twa efyan anga a chu fwa ebi.

¹⁵ A zǝn be nobǝ ya e no enachacha a tsuruku ángá, mogwa mogwa no enachacha. Tea a zǝn be ya e fwa be enachacha n tsǝ́ be ekǝ̀n ra, mò akan fwa ye enachacha ra, adia be mò esera a be bwe anga, bwetko ara shwa ekam esese mo be.

¹⁶ Be tú jan be yi Ehwya, tea be mò a be bwe anga tson etson mbwe anga. Ba be ya mò ambǝgo, be ya chu echam n kǝn be be e kpu be e bwe mò esese ra.