Luka 1 - Etkwen New Testament

¹ Be nobǝ embo è chifǝ evǝa be e bá e gu fwa a chu mo be mò ya è bwe a tswa engga mo je ángá.

² Bè bá mò a jè fo a zǝn be ya è no a chin mo fwa hon ekwafya, ya è di nó a fǝzǝn mo be, nè jan fwa mo Ehwya, è jan be ángá.

³ Adia èé me, m̀ ba se ara fù mo fwa hon binbin, a chu mo be mò ya è bwe ekwafya ángá, m di jan ge se me e bá e no o akan akan, ya edgwa Tiyofilo,

⁴ evǝa we yi ebi mo be mò ya bè tú o ángá.

Bè jan abu ba mbwa Yohana ya Batisǝma ángá

⁵ Atan a Hiridu è dwatì no a sǝnsen mo Yahudiya ángá, ekǝ́n akan, a bè fǝ́ anga Zakariya, è no a zǝn. Gè no a engga mo etso mo be ekǝ́n mo Ehwya ya è no chá buetkwa mo Abija. Gwa ye a Alisabatu è no adi efi mo Aruna gaten.

⁶ A be fà hon, bè no ya ebitete a chafya mo Ehwya. Bè no ba se binbin mo be echa ngge edon mbwe anga nè fwa be ngge edan ra.

⁷ Bè fwa be ngge mbǝgya ra, adia Alisabatu è no ya efǝn, efwe a be fà hon, bè ke ara cho.

⁸ Nò kè akan, adi ekpengga mo mochi mo etso mo be abu ekǝ́n, Zakariya è no ende è bwe mochi anga a buetkwa mo be chafya mo Ehwya.

⁹ Abu be ekǝ́n è bwe bwi anga, bè swa ye adi mò etwadem ge e tkòn mò yoben a Àtá mo Ehwya.

¹⁰ Atan a ekpengga mo mò yoben hon etkonom è bwa ángá, binbin mo be ya è fǝnno abu be e fen Ehwya ángá, è bgó ebgo anga a je.

¹¹ Kǝnggwa maleka mo Ehwya è mbwibwa a zǝn ye, nè ywano chá budgo mo ten-ebgo a bè tkòn mò hon no Ehwya a chu mo nó ángá.

¹² Atan a Zakariya è di ye ángá, emme è bu ye, gè tsen etsentsen àywá.

¹³ Kǝnggwa maleka hon è jan ye jan, “We tsen mbo etsentsen ra Zakariya, Ehwya cha ara ebgo mbo. Gwa o Alisabatu a mbwa o nwen ndedon, wa tso ye ti Yohana.

¹⁴ Nwen hon a ti ju eshanm ngge vǝtsen a bwa o. Be nobǝ embo a shánju atan a ba mbwa ye ángá,

¹⁵ adia ga no nobǝ echa chafya mo Etsodwe. Ga ngǝ ye mbǝ enabi èé mò ebonbon ra, ga mbo ngge Engǝ́ Echanwenwen atan a ge chà no a dgyèn mo ayi ye ángá.

¹⁶ Ga bwe be ya a Esǝrela embo a twabǝ a ken a zǝn Ehwya Etsodwe mo be.

¹⁷ Ga kwafya a bwa sangǝ́ Etsodwe chà a bwa. Ehwya a no ye engǝ́ ngge echakpo mbwe abu ḿ mo efojan Eliya. Ga du be àtà be e dgyan mbǝgya mo be. Ga du be ya chu echam be e fo fwa mo Ehwya. Ga bwe a tsa be nobǝ nyi a bá Etsodwe.”

¹⁸ Zakariya è ká maleka hon eka jan, “Ma bwe engǝ me e yi jan be mò ena a bwe? A me m ke ara cho, gwa m ke ara cho gaten.”

¹⁹ Maleka hon è cha ye dwa jan, “A me ma Jibirilu, e ywa bwi anga chafya mo Ehwya ángá. Ge tson m a ge me e bwa e jan fwa ngge bo, mè jan o Fwa Esese ena.

²⁰ Adia o cha mbo dwa ngge be fwa mam, nwone e bwe a kǝ̀n adi ekpengga mo be ra na, o jan a yi mbo fwa ra ken a ngga nò a ba mbwa nwen hon ángá.”

²¹ Be nobǝ ya éè nobà Zakariya anga a je ángá, è kwa ara ekam jan ano bwe a ge, gè dgyenfon àywá a Àtá mo Ehwya hon ángá.

²² Atan a gè gwa a je ángá, gè jan yi ye fwa ngge be ra. Enona, bè yi ara jan mò è kan ye enggwà a fǝzǝn a Àtá mo Ehwya. Gè no jan be fwa anga adi bu etum, nè jan yi ye fwa ra.

²³ Atan a tsǝnò mo mochi mbwe è kǝ̀n ara ángá, gè twabǝ ken a mu.

²⁴ Chashin mo mò ena, è ti ye be tsǝnò embo ra, gwa ye Alisabatu è no dgyèn. Gè ngǝ̀ton ju ye bwe fka chwen.

²⁵ Gè jan, “Ehwya di ara ashi mam, n tivǝ́ ara m ebgenju a m̀ no ngge ge a chafya mo be nobǝ ángá.”

Bè jan abu ba mbwa Yeso ángá

²⁶ Adi fka e chwen a ngǝ mo dgyèn mo Alisabatu, Ehwya è tson maleka mbwe Jibirilu, ken a Nazarati, eten nwofyan è no a sǝnsen mo Galili ángá.

²⁷ Gè ken a zǝn enwen-endà akan, bè fǝ́ ye anga Meri, a bè tè ara fù mbwe jan ga ngǝ́ don ngge ndedon akan a bè fǝ́ anga Esufu adi efi mo Dawuda.

²⁸ Maleka hon è ken a zǝn ye nè jan, “Adgye no ḿ mbo, a bo nwene a Ehwya swa ara a engga mo be ndegwa ángá. Etsodwe no ngge bo.”

²⁹ Tea be fwa mbwe è kǝn Meri nya àywá, gè ka jan a fwa no, a be bi m anga na.

³⁰ Maleka hon è jan ye jan, “We tsen mbo etsentsen ra, Meri. Ehwya fo ara etkwa mbo.

³¹ Wa no dgyèn wa mbwa nwen ndedon, wa tso ye ti Yeso.

³² Ga no ngge edgwa, ba fǝ́ ye jan Nwen Ehwya e Gǝ̀n ti ara. Ehwya Etsodwe hon a no ye botì mo ebǝ ye Dawuda.

³³ No a fwa efwam, ga dwatì a chu hwya mo Yakubu, zǝnotì mbwe a kǝn ye etkyen ra.”

³⁴ Kǝnggwa, Meri è ká maleka hon eka jan, “Mò hon a bwe engǝ, adia m chà yi di m ndedon ra?”

³⁵ Maleka hon è cha ye dwa jan, “Engǝ́ Echanwenwen a shwa o a ju, echakpo mo Emwenbin a bwi a pe o. No enona, nwen hon a wa mbwa ángá, a no echanwenwen, ba fǝ́ ye Nwen Ehwya.

³⁶ Di, ya mbwe o Alisabatu, ndegwa nwene a bè fǝ́ anga ya efǝn ángá, no ara dgyèn adi cho mbwe, ena a fka e chwen a ngǝ mbwe.

³⁷ Mò nwone Ehwya bwe a ti ye ra ángá, fwa ye ra.”

³⁸ Meri è jan, “Ma fí mo Etsodwe, ge e no ngge me abu o jan ángá.” Ekǝnggwa Maleka hon è gwa ye, nè nya m̀ mbwe.

Meri è ken bandi Alisabatu

³⁹ Dgyen ye fon ra, Meri è té fuchin nè ken myan myan a eten akan, a efa hwì a sǝnsen mo Yahudiya.

⁴⁰ A zǝn, gè kwashi a mbwe Zakariya nè bi Alisabatu fwa.

⁴¹ Atan a Alisabatu è fo fwa ebim mo Meri ángá, nwen éè no a dgyèn mbwe ángá è chìju ngge echafǝju. Engǝ́ Echanwenwen è shwa Alisabatu a ju, nè du ye,

⁴² gè tandwa jan, “Esese a a bo a engga mo be ndegwa, esese a nwen a wa mbwa ángá.

⁴³ Bwe engǝ mò egǝ̀n ena bwe anga ngge me, a ayi Etsodwe mam bwa tén ge e ban e di m?

⁴⁴ Di, abu ḿ fo fwa ebim mbo ángá, nwen hon e no a dgyèn mam ángá chìju ngge ju eshanm.

⁴⁵ Esese a ende e tsǝ ara ekǝ̀n jan mò a Etsodwe è jan ara ángá, bwa a de a fǝ.”

Bón a Meri è twa ángá

⁴⁶ Kǝnggwa, Meri è jan, “Tsuruku mam tàn Etsodwe hon anga.

⁴⁷ Nya mam mbo ngge vǝtsen a chu Ehwya Etivǝ́ mam.

⁴⁸ Adia ge di ashi mam, fí mbwe e kǝn ye mò akan ra, ti asuswana ken chafya, binbin mo be ekǝn a fǝ́ m esese,

⁴⁹ adia Emwenbin bwe ara m be mò edgwa edgwa, ti mbwe no Echanwenwen.

⁵⁰ Ge di ashi mo ya e tsen ye anga, ti adi ekǝn ti ken adi ekǝn.

⁵¹ Ge bwe ara be mò edgwa edgwa ngge bu mbwe, ge bushan gu ara ya efin a tswa tashwa ekam mo be.

⁵² Ge ti be tì shwa ara a sen a chu be botì mo be, tea ge kan ara be ya chu engǝm a sen etkyen.

⁵³ Tea ge no ara ya a mbe fu be anga binbin mo be mò esese a be nda anga, tea ge du be yamo nya ara bu kukwa.

⁵⁴ Ge kaben ara vǝ-esenm a gè sen ngge be ebǝ ata mo je jan ga di ashi mo be fí mbwe, be ya a Esǝrela.

⁵⁵ Vǝ a gè sen jan na a no a fwa efwam ngge Ebrayi tangge mbǝgya mbwe ángá.”

⁵⁶ Meri è no ngge Alisabatu mo fka ta sangǝ́ gè chà twabǝ ken a mu.

Abu bè mbwa Yohana ya Batisǝma ángá

⁵⁷ A nò è kan ara nwone a Alisabatu a mbwa nwen ye ángá, gè mbwa nwen ndedon.

⁵⁸ Be needwe mbwe ngge be nwenjwa ye è fo jan Etsodwe dwa ara fǝ ye àywá. Binbin mo be è shánju ngge ge.

⁵⁹ A nwen hon è kengga ara tsǝnò chwen a ta ángá, bè bwa evǝa be e tsen ye tkyà, nè nda anga be e tso ye ti mo ate ye Zakariya.

⁶⁰ Tea ayi ye è jan, “É yé, ba fǝ́ ye Yohana.”

⁶¹ Bè jan ye, “Ende e no ngge ti ena a tswa mo be nwenjwa nye ángá fwa ye ra.”

⁶² Ekǝnggwa, be bi ate nwen hon, Zakariya adi bu etum, evǝa ge e jan be ti a ge dgyan be e fǝ́ nwen hon ángá.

⁶³ Gè nda, be e no ye afkaba a ga bá mò a ju nó, nè bá jan, “Ti mbwe a Yohana.”

⁶⁴ Kè akan vǝ mo Zakariya è fkigwa, gè kwa ara fwa ejanm nè no tàn Ehwya anga.

⁶⁵ Be needwe è tsen gu etsentsen. Binbin efa hwì a sǝnsen mo Yahudiya, be nobǝ è ti fwa mo mò ena ti jan ken anga.

⁶⁶ Binbin mo ya è fo fwa ena ángá, mò hon è kǝn be nya. Bè ká eka jan, “Mò a nwen ena bwa a no ángá, a ano?” Adia bè yi ara jan echakpo mo Etsodwe no a chu ye ángá.

Zakariya è chwano Ehwya

⁶⁷ Kǝnggwa Engǝ́ Echanwenwen è shwa a ju mo Zakariya, ate mo nwen hon, nè du ye gè jan be mò e bwa a bwe ángá,

⁶⁸ “Je e tàn Etsodwe, e no Ehwya mo ya a Esǝrela, adia ge bwa bwejwa ara be nobǝ mbwe n kpwacha ara be.

⁶⁹ Ge no ara je ende e no Etivǝ́ echa, e no adi hwya mo fí mbwe Dawuda ángá

⁷⁰ (abu gè jan chá kpevǝ mo be efojan mbwe echanwenwen ekpe ekpe jan),

⁷¹ ge ti a vǝ́ je a bu mo be ya eze mo je, ngge a bu mo ya e dgyan be je ra,

⁷² jan ga tú edishi a chu mo be ebǝ ata mo je, n ka a ben dwavǝ esenm mbwe echanwenwen.

⁷³ Efan echa hon a gè fan ngge ebǝ je Ebrayi ángá,

⁷⁴ gè jan ne ge ti a vǝ́ je a bu mo be ya eze mo je evǝa je e bwe je mochi mbwe a tswa etsentsen ra,

⁷⁵ je e bwe ye mochi a tswa echanwenwen ngge ebitete a tswa be tsǝnò mo nya mo je binbin.

⁷⁶ A bo, nwen m, ba fǝ́ o efojan mo Ehwya e Gǝ̀n ti ara ángá, wa kwafya mo Etsodwe abu wa bwe a se ye efǝ mbwe.

⁷⁷ Wa ende a tú be nobǝ mo Ehwya jan, Ehwya a gwa a no be ebgen a bè bwe ara ángá, ngge ga ti a vǝ be,

⁷⁸ adi ashi edim echa mo Ehwya, ga tson ende akan nwene e ti a vǝ́ je, ga no abu Nò e gwa anga a je akǝndon,

⁷⁹ ga no zǝn a nggazǝ, a zǝn be ya e no a tswafǝ, n no ka anga abu ba fǝ, evǝa ga du je ja no a tswa adgye ngge Ehwya.”

⁸⁰ Nwen hon è cha mbo adi ekǝnjuju, nè no ngge echafǝju adi engǝ́. Gè no kpwà a tswavǝ́n kengga nò a ge fu mochi mbwe a tswa engga mo be ya a Esǝrela ángá.