Juda 1 - Etkwen New Testament

Juda bi be nobǝ hon fwa

¹ A me Juda, ya mochi mo Yeso Kristi, nwenjin Yakubo, m bá afketa chí ena, ken a zǝn be ya Àtà Ehwya hon è fǝ́ ara be dwa, ngge gè dgyan ara be, nè kpu be nyi ara evǝ mo Yeso Kristi ángá.

² M bgó Ehwya jan ge e di ashi mo nye, ge e bwe nye, nye e no ngge adgye a tsuruku, ngge ge e tú nye edgyan àywá.

Juda è twa be ya ekǝ̀n-etsǝ́m echa a chu be etumo fwafe

³ Be shushwa m, ya m dgyan anga àywá, bi adia m̀ dgyan anga me e bá mò e no nye a chu ega nwone a binbin mo je no ngge nó na, tea m di jan ge no kenm me e bá mò e no nye ngge me e twa nye echa jan, nye e chifǝ a chu chaebi a Ehwya è ti du ara be nobǝ echanwenwen mbwe kè akan a bu ángá.

⁴ Adia be nobǝ ya ehwyà, ya a bè kpèn ara be kǝ́nfǝ ekpe ekpe ángá, è ngǝ̀ kwashi ara a tswa engga mo nye. Ba be ya e tse be Ehwya ra, ya e ti esese mo Ehwya abu efwa mo mò ekacha ebwem, n segwa Yeso Kristi, nwene a ge tete no tì mo je ngge Etsodwe je ángá.

⁵ Bi adia nyè yi ara binbin mo be mò ena ángá, m dgyan anga me e ka e ben nye jan Ehwya adi ekpengga akan, è tivǝ́ be nobǝ mbwe a tswa sǝnsen mo Masa, tea beti bishi chashin, gè tkò be ya ehwyà mo be, ya è tsǝ́ be ekǝ̀n ra.

⁶ Efwe, nye e ka e ben be maleka, ya è dipin emwentì a Ehwya è no ara be nè twagwa zǝn a bè ti no ara be, be e no ángá. Ehwya ndifǝn ara be ngge awya a be kǝn tén a ti be ra, n kpu be du ara a tswa zǝn è twafǝ no àywá, ti ken a ngga nò echa nwone a ga kpèn be kǝ́n ángá.

⁷ Ba anona, nye e mngo e da nye mò è bwe ngge be nobǝ a tswa be eten efifi a Sodoma ngge Gomora, tangge eten è no tenten ngge be ángá ra. Be nobǝ hon ena è no dwashwa edwa-ngo efki efki, ngge bè dgyan be mò esera a ekǝnjuju dgyan anga. Bè tkòn be ngge fǝ̀ e din ye anga ra abu echa etwam a zǝn binbin mo be nobǝ.

⁸ Eno gaten, be nobǝ ena ya è fǝn dá nwone e du be bè bwe mbǝgo ekǝnjuju mo be adi zǝno ekacha enom, è segwa emwentì mo Ehwya hon nè jan ebgen àywá a chu be mò e dwa ngge emwentì e no a zǝkpe ángá.

⁹ Èé Mikayilu, chu mo be maleka e chu ye, è san ye ge e jan e bgen Shetan, atan a gè twa efyan anga ngge Shetan a chu ende a ti kǝn mo Mosa ángá ra. Gè jan kpwà, “Ehwya a kpèn o kǝ́n.”

¹⁰ Tea be nobǝ ena no jan ebgen anga a chu be mogwa mogwa a be hwayi be engà mo nó ra. Be no abu be gwemo e ka be shwa anga ra, n bwe egwa egwa mo mò e bwa ara be a tsuruku ángá, enona be vǝ etkò a bwa a chu be.

¹¹ Ebwe no a chu mo be, adia bè ba ara fukèn mo Kayino. A chu edgyanfim mo tse, be bwe ara mò esera a Balama è bwe ángá. Be cha ara chu, abu Kora è bwe ángá, ngge bè tkò be abu bè tkò Kora ángá.

¹² Be ya ena a be ya mofǝ̀ ya e ngǝ̀ton dwa a engga mo nye, ya e bwebgen esǝ mo edgyan mo nye. Be de mode anga abibi ngge nye, n fu didi be ebgenju mo mò ebgenju a be bwe anga ra. Be no abu be ya efyomo e fyo kpwà chu be, n ká be be efyomo e no a bu mo be ra ángá. Be no abu be edwe e fwa be ngge mbǝ chù a tswa mo be ra, a fyo bwa kpo be nya anga. Be no abu be tumo ya e fwa be ngge be ga adi ekpengga mo moebǝm ra, ya a be vǝkpú ara be ngge be kpwà, ngge be bwe a ti be mò esese akan ra.

¹³ Be nobǝ ena be fupe a ti be be ra, abu dgyén mbǝ a sǝn, e no ngge echafǝju àywá ángá. Be séfǝ́ anga a chu efǝ́n mò ebgenju mo be. Be no abu be ngǝkpe e ken enò ken enó anga a zǝkpe. Ehwya bwe zǝn e twa ti ara fǝ, e no a fwa efwam ángá, nyi nobà be no.

¹⁴ Ekpe ekpe Enochi, éè no ekǝn adi e chwen a fà ángá, tke a chu Adamo, è jan ara fwa a chu be mò a bwe a chu be nobǝ ena. Gè jan, “Di, Etsodwe nyabwa ngge be ya echanwenwen mbwe embo embo, a be ka a ti be efim mo be ra,

¹⁵ evǝa ge e kpèn egwa egwa mo be kǝ́n. Ga sen kǝ́n a chu binbin mo be, a chu be mò esera a bè bwe ángá. Ga sen kǝ́n a chu be fwa esera a be ya e ba be Ehwya ra è jan a chu ye ángá.”

¹⁶ Be nobǝ hon ena a be ya e to dwawi anga a chu Ehwya, ngge be tkunda kpwà ebgen mo be nobǝ. Be bwe be mò esera a tsuruku mo be dgyan anga. Be séfǝ́ anga a chu mò be, ngge be nggade be nobǝ ngge fwa etkwatkwa evǝa be e ben be mò a zǝn be.

Juda jan be nobǝ be e bon-ekǝ̀n

¹⁷ Be shushwa m ya a m dgyan anga, nye e ka e ben fwa a be etsonchi mo Etsodwe je Yeso Kristi è jan ángá.

¹⁸ Bè jan nye jan, “Adi be ekpengga ekǝn-etkyen, ba ben be nobǝ ya akenchi ejanm, ba bwe be mò esera ya e fwa be adi efwa mo Ehwya ra, a tsuruku mo be dgyan anga.”

¹⁹ Ba be nobǝ hon ya e vǝ enggakwam bwa anga a tswa engga mo be nobǝ. Be bwe be mò a be dgyan be e bwe anga. Be fwa be ngge Engǝ́ mo Ehwya ra.

²⁰ Tea adi ḿ mo nye, be shushwa m ya m dgyan anga, nye e chu e ngǝ́shi a chu embwem mo chaebi mo so, nwone a nye no ngge nó a chu Ehwya ángá. Nye e bgó ebgo tswa ebwejwam mo Engǝ́ mo Ehwya.

²¹ Nye e ndnya e no kpwà a tswa edgyan mo Ehwya a chu nye, abu nye no nobà Etsodwe mo je Yeso Kristi anga. A ge hon nwene e dwafǝ nye anga, ga vǝ nya e no a fwa efwam ángá, a bwa nye.

²² Nye e dwafǝ be ya e no ngge tsuruku fà ángá.

²³ Nye e ti e vǝ́ be ya ehwyà adi efkwacham mo be a tswa fǝ̀. Adi ḿ mo be ya ehwyà, nye e bgeshi fǝzǝn abu nye dwafǝ be anga. Nye e se e gwa èé be mokàn mo be, a be bwe mbǝgo ara ngge mò ebgen mo be ángá.

Ebgó mo etàn

²⁴ Etàn ge e no ḿ mo Ehwya nwene e kǝn ara ge e fu e pe nye adi kpì ekpom, ne kpu nye abu be nobǝ echanwenwen e bwa no chafya mbwe, ngge nye no a shánju anga àywá.

²⁵ No a fwa efwam, a zǝn Ehwya akan tete hon, e no Etivǝ́ mo je adi efka mo Yeso Kristi Etsodwe mo je ángá, binbin mo egǝ̀n, edgwatì, echakpo ngge emwentì, a ḿ mbwe tke binbin mo be ekǝn ekpe ekpe, asuswana ngge adi ekpengga e nyabwa ángá. Ge e no enò.