Filimo 1 - Etkwen New Testament

Fwa ebim

¹ Afketa chí ena vǝ a zǝn m, Bulu, ende e no a tswa àtá ehwyatu adia m̀ du edgon a chu Yeso Kristi ángá. Timoti, nwenjin je bi o fwa anga. M bá no o anga, Filimo, ya emekèn mo je, a je dgyan àywá.

² We bi Afiya nwenjin je ndegwa adi Kristi fwa, ngge Akibu ende a je chifǝ anga abibi ngge ge, tangge be ya aduwa ya e fǝnchu anga a mbwe o ángá.

³ M bgó ebgo anga jan nye e ben esese ngge adgye a zǝn Ehwya, Ate je ngge Yeso Kristi Etsodwe je.

Chaebi ngge edgyan a Filimo no ngge nó ángá

⁴ Filimo, abu atan engǝ ra a m bgó ebgo anga a zǝn Ehwya, m fǝ́ ti mbo ngge m chwano Ehwya mam anga a chu o.

⁵ Adia m no fo bwi fwa anga a chu edgyan a o no ngge nó a chu binbin mo be ya ekǝ̀n-etsǝ́m ngge chaebi mbo a chu Yeso Etsodwe ángá.

⁶ M bgó ebgo anga jan chuefǝnm mo je ngge bo adi chaebi ge e no ngge echakpo evǝa we hwa e seshi binbin mo be mò e no esese, e no ḿ mo je, a je ya e no ḿ mo Kristi ángá.

⁷ Shushwa m, edgyan mbo a chu be nobǝ, e bwe bwi be nobǝ mo Ehwya no ngge vǝtsen ángá, bwe m, m no ara ngge vǝtsen tangge ekǝ̀n-ebonm àywá gaten.

Bulu bgó Filimo ge e cha Onisimo

⁸ Adia o no ngge yishwa edgyan ena ángá, a me etsonchi mo Kristi, bi adia m no ngge echakpo me e du o we bwe mò e no ara kenm we bwe ángá,

⁹ m dgyan fí àa, me e bgó o a tswa edgyan. M bwe mò ena enò anga, bi adia a me Bulu, ehwacho, ende eno a àtá ehwyatu asuswana a chu Kristi Yeso.

¹⁰ M bgó anga a chu Onisimo, nwene e no nwen m, m̀ nga ate ye atan a m̀ no a àtá ehwyatu na.

¹¹ Ekpekpe, gè fwa ye ngge ebwejwa a zǝn o ra, tea asuswana ge no ngge ebwejwa a zǝn m ngge a zǝn o gaten.

¹² Asuswana, m du ye, twabǝ nyabwa a zǝn o, ngge ge no abu m tson tén tsuruku mam nyabwa a zǝn o.

¹³ Má dgyan fí àa, me e fu e pe ye ge e no ngge me, evǝa ge e bwe e jwa m efwe-echi mbo atan a m no a àtá ehwyatu adia m du edgon a chu Fwa Esese anga a chu Kristi Yeso.

¹⁴ Tea m dgyan m me e bwe m mò akan e fwa ye adi dwa echam mbo ra ra. M dgyan anga we bwe e jwa, adia o dgyan anga, fwa ye jan be fa o efam ra.

¹⁵ Ehwyà, mò è bwe ye gè kwaju ngge bo mo ekpengga nwofyan ángá, è no evǝa ge e twabǝ e bwa e no e fwa efwam ngge bo.

¹⁶ Asuswana ge twabǝ nyabwa a zǝn o, fwa ye abu fí efwe ra, tea ende e twafǝ̀ fí ángá. Ga no abu nwenjwa a tswa Yeso Kristi. M dgyan ye àywá. Ga bwe o mò esese àywá gaten, abu nwenjwa adi ekǝnjuju ngge nwenjwa a tswa Etsodwe.

¹⁷ Enona, ano o ti m abu ende e bwe Kristi mochi anga abu bo, cha ye ngge vǝtsen abu wé cha m ángá.

¹⁸ Ano gè bwe o mò esera, eno e ra o ba ye kpo mo mò akan anga, ti ye abu ma ende a o ba ye kpo hon anga.

¹⁹ A me Bulu, m bá mò ena anga ngge bu mam jan, “A me Bulu ma kpwa o mò hon a me.” (Ge no ye kenm jan me e ka e ben o ra, adia adi efka mam a ò ben ega.)

²⁰ Ee, nwenjwa, m dònvǝ anga jan we cha Onisimo abu nwenjwa a tswa Etsodwe. Bwe m me fo etkwa adi chaebi a je no ngge nó a chu Kristi ángá.

²¹ Abu m bá no o mò ena anga na, m tsen m tsuruku, jan wa bwe m mò a m bgó jan we bwe ángá ra ra, ngge jan wa bwe twa a fǝ̀ enò.

²² Mò efki e chà danno ángá, a we bwe e se m tswa àtá zǝn a ma no ángá. Adia m nyishwa jan, Ehwya a fo ebgo mo nye a chu m ngge be fki a gwa m efwa evǝa me e twabǝ e bwa a zǝn nye.

Fwa ebim ngge kèn edwam

²³ Abafara, a je no a àtá ehwyatu ngge ge a chu edgon a chu Yeso Kristi edum ángá, bi o fwa anga.

²⁴ Enò gaten, Marku, Aristaku, Dima ngge Luka be ya e bwe mochi anga ana ngge me, bi o fwa anga.

²⁵ M bgó ebgo anga jan, esese mo Yeso Kristi Etsodwe je, ge e no ngge nye.