2 Timoti 1 - Etkwen New Testament

Bulu bi Timoti fwa

¹ Afketa chí ena vǝ a zǝn m, Bulu, etsonchi mo Kristi, a bè swa adi edgyan mo Ehwya evǝa me e jan be nobǝ fwa a chu nya a gè senvǝ jan ga no be nobǝ adi efka mo Yeso Kristi ángá.

² M bá no o Timoti, nwen m a m dgyan àywá. M bgó jan Ehwya Ate je ngge Yeso Kristi Etsodwe je be e bwe o esese, be e di ashi mbo ne no o adgye.

Bulu è janbon Timoti ekǝ̀n

³ M chwano Ehwya a m bwe ye mochi anga ngge binbin mo tsuruku mam abu be ebǝ ata mam è bwe ángá. M chwano no ye ènò ngge etsǝ abu m no kaben anga ngge bo adi be ebgo mam ángá.

⁴ Atan a m kaben engǝ a fǝzǝn mbo, m dgyan anga me e di o, evǝa me e mbo ngge vǝtsen àywá.

⁵ M chà mngoda m chaebi echakpokpo a chu Ehwya a o no ngge ge, nwone è kwafya no a tsuruku mo abi o, Loyi ngge ayi o Afiniki ra. M di jan yishwa chaebi ena no a tsuruku mbo gaten.

⁶ No enona, m kaben o anga jan we pǝn e jwa fǝ̀ mo edwe mo Ehwya, nwone a ò ben atan a m̀ tú o bu mam a chu ángá.

⁷ Adia engǝ́ a Ehwya è no je ángá fwa ye nwone a du je je e tsen etsentsen ángá ra, tea ge e no je echafǝju a je ti ywa a ti etkyen ngge echakpo, je e dgyan be nobǝ ngge je e ti e fu chu mo je gaten.

⁸ Enona, we fu mbo ebgenju mo edgon edum a chu Etsodwe je Yeso, eno e ra a chu m adia be twa m no a àtá ehwyatu a chu Kristi ángá ra. Tea we no ngge edgyan jan wa engǝ ekan ngge me a chu Fwa Esese hon, adi echakpo a Ehwya no o anga.

⁹ Ehwya a ende nwene è tivǝ́ je nè fǝ́ je dwa evǝa je e no zǝno echanwenwen ángá. Dwa efǝ́m hon fwa ye a chu mò akan a jè bwe ángá ra, tea a chu mò a ge no ngge nó a tsuruku ngge esese mbwe. Esese hon ena, Ehwya è no je nó adi efka mo Yeso Kristi, sangǝ́ bè chà mmò zǝnchaje.

¹⁰ Asuswana, gè fi tú ara je esese hon ena adi embwibwam mo Etsodwe je Yeso Kristi, nwene è tivǝ́ je nè bukpo echakpo mo fǝ ángá. Enona, Yeso è ti nya ngge no a fwa efwam bwa adi enggasansan adi efka mo Fwa Esese mo Ehwya.

¹¹ Ehwya è swa m, me e no etsonchi mo Yeso ngge me e no etumo, evǝa me e jan ngge me e tú be nobǝ Fwa Esese mo Ehwya.

¹² Ena a mò e bwe m ngǝ ekan anga na. Bi adi enò, m fu m ebgenju ra, adia m yi ende a m tsǝ́ekǝ̀n no a chu ye ngge m cha ara dwa a tsuruku mam jan ga dgon mò a m ti du ye no a bu, ti ken a ngga nò eni.

¹³ Ba seshi efwa mo zǝno enom nwone a m̀ tú o ángá. Bwe mò ena a tswa chaebi ngge edgyan adi efka mo Yeso Kristi.

¹⁴ Dgon seshi ebi hon nwone a Ehwya è no o ángá. Dgon ye a tswa echakpo mo Engǝ́ mo Ehwya nwene e no anga a ju je ángá.

¹⁵ O yi jan binbin mo be ya ekǝ̀n-etsǝ́m ya e no a sǝnsen mo Eshiya ángá, twanga chashin no ara m, tangge Fajilu ngge Amajina.

¹⁶ Ehwya e di ashi mo be nobǝ e no a mu Onisifaru ángá, gè bwejwa bwi m anga. Gè no ende e bwebon m ekǝ̀n anga nè fu ye ebgenju mam adia m̀ no a àtá ehwyatu ángá ra.

¹⁷ Atan a gè bwa a Roma ángá, gè nne tén ennem evǝa ge e ben m, ekǝn-etkyen ge ben tén m ebenm.

¹⁸ Etsodwe je Yeso Kristi, e bwe Onesifaru esese, nò a ge twabǝ a bwa ángá. O yise gu abu gè bwejwa m adi efwa efki efki atan a m̀ no a Afisa ángá.