1 Timoti 1 - Etkwen New Testament

Bulu bi Timoti fwa

¹ Afketa chí ena vǝ a zǝn m, Bulu, etsonchi mo Yeso Kristi, a chu edon etwam mo Ehwya nwene e tivǝ́ je anga, ngge Yeso Kristi a je nyishwa mo je no a chu ye ángá.

² M bá no o anga Timoti, nwen m ebi adi chaebi. Esese, edishim ngge adgye mo Ehwya nwene e no Ate je ngge Etsodwe je Yeso Kristi, be e no ngge bo.

Bulu è twa Timoti echa a chu be etumo fwafe

³ Abu m̀ bgó o atan a m̀ nyaken a Makidoniya ángá, jan we no a Afisa, evǝa we twa be ya ehwyà echa jan, be e tú be be nobǝ be mò fwafe efwe ra.

⁴ Be e chu e ngǝ be a chu be hú ekpenwim ngge ekawim mo be ti mo ebǝ ata mo be ra. Be mò yishwa ena vǝ efyan etwam bwa anga ngge be bwejwa be je, adi e kenm mo fwa mo Ehwya e no a chu chaebi ángá, chafya ra.

⁵ Mò e du je je twa echa ena anga, a edgyan nwone e vǝ a tsuruku e ben ye mofǝ̀ ra, n gwa anga a je mo tsuruku enachacha, n fwa ye ngge fwa ekam a chu ebgen ebwem ra, n no ngge chaebi ebi ángá.

⁶ Be ya ehwyà twagwa ara be mò e dwana, n kwa ara be fwa ejanm abu be hwen.

⁷ Be nda anga be e no be etumo mo edon mo Ehwya, tea be yi be mò a be jan fwa anga a chu mo nó ra, bi adia be jan fwa anga abu be yise be mò ena àywá.

⁸ Je yi jan edon hon a mò esese, ano ende akan bwe mochi ngge nó adi efwa e no edefǝfǝ.

⁹ Je yi jan bè twa be edon hon a chu be ya e bwe mò esese anga ra, tea ge nó a chu mo be: ya e ba be edon hon ra, ya e buton fo be echa etwam ra, ya e tse be Ehwya ra, ya ebgen, ya e bwe be mò ambǝgo anga, ya e fen be Ehwya anga ra, ya e gu be ya e mbwa be anga, ya e gu be nobǝ anga,

¹⁰ ya ekacha, ya e dwashwa edwa-ngo (a ndedon dwa ndedon, ndegwa dwa ndegwa anga), ya e jwa n jwade be fí anga, ya e kan be nobǝ anga, ya fwafe, ya e fan efan amme anga, ngge ya e tú egwa egwa mo mò e no efki ngge moetum ebi ena,

¹¹ e no mò akan ngge Fwa Esese egǝ̀ngǝ̀n mo Ehwya mo je, è ti du m a bu ángá.

Bulu tàn Ehwya a chu esese a Ehwya bwe ye ángá

¹² M chwano Yeso Kristi Etsodwe je nwene e no m echafǝju mo mochi a m bwe anga. M chwano ye anga gaten, adia gè di jan m kǝn ara, nè tsǝ̀pe ara m jan me e bwe ye mochi ángá.

¹³ Bi adia ekwafya, m̀ janpin ye, m̀ tswa be nobǝ mbwe fí ngge m̀ no ya etkekàn etkem ángá. Ehwya è di ashi mam adia m̀ yi m mò a m̀ bwe anga ra, ngge m̀ chà tsǝ́ m ekǝ̀n a chu ye ra.

¹⁴ Esese mo Ehwya Etsodwe è shwa m a ju abu bè nggwa nó gwa a je mo etsǝn. Esese hon ena du m tsǝ́ekǝ̀n a chu ye ngge m dgyan be ya e tsǝ́ekǝ̀n no a chu ye ángá gaten. Be mò ena a ḿ mo je, ya e nga ara mò akan ngge Yeso Kristi ángá.

¹⁵ Ena a fwa ebi hon e kǝ̀n ara a egwa egwa ge e tsǝ́ e tén ekǝ̀n a chu mo nó jan, “Yeso Kristi è bwa a tswa zǝnchaje evǝa ge ti e vǝ́ be nobǝ ya è bwe ara ebgen.” A me m no ende e twafǝ̀ ti ara egwa egwa a tswa zǝnchaje adi ebgen ebwem.

¹⁶ Tea a chu fwa ena, Ehwya è di ashi m, a me ende nwene è no ti ara ya ebgen ángá evǝa Kristi e tú ekǝ̀n-ebonm mbwe nwone e kǝn ye etkyen anga ra, a chu m, abu echi a zǝn binbin mo be ya a tsǝ́ekǝ̀n a chu ye na cha nya e no a fwa efwam ángá.

¹⁷ No a fwa efwam, je e no Ehwya edgwa ngge etàn, a ge e no Tì a chu binbin mo be nobǝ e no a tswa be ekǝn efki efki ángá. Ehwya nwene e fǝ ye anga ra ngge nwene a ba di be ye ngge fǝzǝn ra gaten. A ge ga Ehwya akan hon tete. Ge e no enò.

¹⁸ Nwen m Timoti, edon ena a m twa o anga, no mò akan ngge fwa a be efojan è jan ekpe ekpe a chu o anga. Ano o fuse ara ye wa butsǝ hon esese,

¹⁹ a tswa chaebi mbo ngge tashwa ekam enggasansan. Be nobǝ ya ehwyà adia be segwa ara mò ena ángá, be bwetko ara chaebi mo be.

²⁰ A tswa engga mo be, a Himanayu ngge Alezanda, ya m kpu be du ara a bu mo Shetan, evǝa ge e tú be kpǝ, evǝa be e jan e pin be Ehwya efwe ra.