ỊMAYỊKA 1 - IBAYỊBỤỤ NYA OHE OLUHYE

¹ Lụka nya adịrahụ oriri nya iJotam bala Ehasị bala iHesekaya anyị hi ụbwọ ha awụlẹ ọ-ọpyị nya iJuda Amkpaa-à ya ẹla ọlẹ du ịMayịka ọla ịMọrẹchẹtị ẹrụ lẹ. Ọ wụrụ mẹjẹ ịMayịka ẹla chajị nya epweji nya ịSameriya bala iJerusalẹm.

Akama Ọyẹyẹ nya ỊSameriya bala IJerusalẹm

² Anụ wo oo! Angịnyị ehe wuu; anụ ke ụrụ wo ẹla ọlẹ, odehe bala alẹpwụ nyamwụ ká Ọngọlahị Amkpaa-à gbe ẹla junu. Ọngọlahị juwa ya ẹla bwu ẹpwa olepwoohe nyamwụ.

³ Anụ yẹ mẹ, Amkpaa juwa kpehe bwu ẹga kọ kụ lẹ! Ọ wẹẹ hireji, jẹdịyẹ bwu achinege nya ịgbọdọ.

⁴ Ịgbọdọ wulo hụrụ hi ekpeleji nya ata nyamwụ, lala ida-à wulo ẹ-ẹga nya ila, ị mwụ ju ka ẹpwụ nya ikpokpo, lala enyi à mwụ bwu ọgbọdọ hireji.

⁵ Ajị nya egbeju-ọngịrị ọlala nya anyị nya iJekọbụ bala ang onyobyi ọhọhọ nya ala Isirẹlụ ịnyị. Oowo tị́ ju ọmwụ nya egbeju-ọngịrị ọlala nya anyị nya iJekọb ene-è? Ala ịSameriya tị́! Oowo tị́ ju ọmwụ nya ijiga ịkpụkpụ i-iJuda ene-è? Ala iJerusalẹm tị́!

⁶ Lẹẹlẹ, Amkpaa yẹkẹẹ, M ka yẹ epweji nya ịSameriya la ọtẹwụụ nya egu nya ang, ị ka kpa wu ẹrụ nya alakọnụ, chajị m̀ ka tụ ẹpwa ịlụwa wuu kẹnị-kẹnị ju ka ikpokpo wurum, bala o-wu itiwe nyaa hụrwa-hụrwa chị odehe.

⁷ Ị ka du ijiga nyaa abwọ yịgẹ-yịgẹ, ang-ụdụ ịlẹ kịị tụ tuu ha alakpara ilube nya ijiga nyaa ka rụ ila; ekpeku nya ijiga nyaa wuu ka ri ang ịlọtẹwụụ. Jaabwọ ká ala ịSameriya ye ang ịwẹ bwu uri oyeye nya akpara ọhọhọ, ịnyịnyị ị ka ye kpa ka nwụ alakpara uri lẹ.

⁸ Ajị nya ọọwa lẹ, m̀ ka jida, juwa bida; m̀ ka jẹ tụ gaa lọhị-lọhị, la o-ju ugbẹtẹ ka. M ka be ẹkọ ida ngịrọrọọrọ lala ebwu, m̀ ka jida lala ògugu.

⁹ Abẹ nya ịSameriya-á ri abẹ ịmyịmyị kaka, ẹla ọlịnyịnyị jam ka la iJuda lẹ. Ayịreji ọtata pwụ alụma nyam eji, ọ pwụ ọnụ nya iJerusalẹm ayịdang lẹ.

Aluji Jẹ ju IJerusalẹm chwẹẹ

¹⁰ Anụ ja alepweji nya ịGaatị oja ọwẹ koo, anụ dọmwụ jida je kpong-kpong ka. Anụ rị ebilo e-ekuruwa mẹ, ánụ alepweji nya ịBẹtịlẹ-afụra.

¹¹ Anụ jẹ kam lọhị-lọhị, loyi mọmbọọ mẹ, anụ angị kụ epweji nya ịChafẹẹ. Angị kụ epweji nya ịSaanan tị bẹ-ẹ̀? Ị́ ka byẹjẹ gba kpehe myị ka. Ala ịBẹtẹsẹlụ juwa bida, ị́ ka jẹ-ẹ danụ ụbwọ kaka.

¹² Alepweji nya ịMarotu kụ pịlẹẹẹ tata gbe okpunyi, Ma, Amkpaa du akama wẹ ogirigba nya iJerusalẹm.

¹³ Ya ori nya anyịrẹ ju ang ịrụnyẹ mẹ, anụ alepweji nya ịLakichi, ang onyobyi ọhọhọ nya ala iJerusalẹm dọmwụ bwu ẹga nyanụ, chajị anụ họ ang onyobyi gbịla ala Isirẹlụ.

¹⁴ Anụ ya ang-ahị nya awụlẹ ọ-da ọkpahị ha ala ịMọrẹchẹtị-ịGaatị. Alepweji nya Akisiibu ka da ịdịrịhụ nya ala Isirẹlụ lụgbaa.

¹⁵ Amkpaa yẹkẹẹ: M̀ ka kpa oluji ọkụrụụnụ kụrụ jahị danụ, anụ ala ịMarẹcha. Alegbeju ịlẹ ká ala Isirẹlụ kaa kpa chị ọgọm, ka rụ ka kpịbaa ụgbụ nya Adulam.

¹⁶ Anụ pwọ inyi hi ẹtẹ-ẹtẹ, juwa bida nya anyị nyanụ ịlẹ kị hanụ lụmẹ. Anụ da ịlọnụ ọrụ kpọng-kpọng lala upwu, chajị ị ka wu anyị nyanụ kpa rụ ka ri anyịhị.