IJobu 1 - IBAYỊBỤỤ NYA OHE OLUHYE

¹ Ụka ọhẹ, ọlẹng ọhẹ juwa ọ-ọpyị nya Uusi ká ẹnyị nyamwụ ri iJobu. Ọlẹng ọọwa la kpẹẹkpẹẹ bala o-ri ọngịnyị ọnyịịla. Ọ ju ihi nya Ohe Oluhye bala ocheji ba ang onyobyi ọhọhọ.

² Ọ ma anyị alẹng irwiye bala anyị anyang angị ịta.

³ Ọ la ịmwụ ụnọ irwiye (7,000) bala anyịrẹ ịkamẹlụ ụnọ ịta bala ịna ụno ookpokpo bala ibyiyó ohu ịrụ. Ọ la iru nya anchẹ lụmẹ-lụmẹ ịnyịnyị. Ọwa-à kpụ ụdụ gụ alọmwẹnụ-ụtụrụ wuu lẹlẹ.

⁴ Ụka ọọwa, anyị alẹng nya iJobu kaa la ọhụhụ nya ang oriri ẹ-ẹpwa nya ọngọngọọng nyaa hi ha awụlẹ. Ị kaa wụrụ anyịnaa anyang angị ịta ịwẹ ka ọhụhụ ịịwa.

⁵ Ụka ká ọhụhụ ọnyọnyọọnyị-ị́ cheju, iJobu kaa du kaka wụrụ anyị nyamwụ lẹ, ọ kaa họ ọhọhọ nya ọcharị-charị ọlala nyaa lẹlẹ. Ọ kaa chahị lụtụrụ gbegbegbe kịla iya wọnụ nya ọnyị nyamwụ ọnyọnyọọnyị ju. IJobu kaa họ ịnyị chajị irya nyamwụ ri yẹkẹẹ, “Ọhẹka ọngọhẹ nya anyị nyọwa nyị ka họ ang onyobyi bwula o-do Ohe Oluhye ẹ-ẹpwụ-ẹpwụ myị.” Ịịwẹ iJobu à kaa họ pyịyọọ lẹ.

Ohe Onyobyi Ma IJobu Yẹ

⁶ Ẹnụtụrụ ọhẹ juwa ká alegu-ẹrụ kele ka tuguru ẹ-ẹga nya Amkpaa. Ọọwa, Ohe Onyobyi à kele ịnyịnyị lẹlẹ.

⁷ Ọọwa, Amkpaa-à tọ Ohe Onyobyi wo yẹkẹẹ, “Ale ā tị́ị̀ bwu?” Ohe Onyobyi wẹ byoo yẹkẹẹ, “Ọ-ga bwu uhye wẹ eji tụ odehe-odehe da ọwẹ mẹ ịnyị.”

⁸ Ọọwa, Amkpaa-à tọọ wo yẹkẹẹ, “À yẹ iJobu ọnchẹ nyam ọwẹ-ẹ̀ wẹ-ẹ́? Ọngọngọhẹ-ẹ́ la kpẹẹkpẹẹ bala o-ri ọngịnyị ọnyịịla lala ọwa odehe kaka. Ọọ ju ihi nyam bala ocheji ba ang onyobyi ọhọhọ.”

⁹ Ọọwa, Ohe Onyobyi à wẹ Amkpaa yẹkẹẹ, “À me irya ká iJobu ju ihi nyang ododu-ú?

¹⁰ À tị́ chẹwụ koo bala alugbiyegu nyamwụ bala ang myị ang ịlẹ kọ la. À wahị kụrụ ang myị ang ọlẹ kọọ họ du ká iyo ileji nyamwụ pyẹ yịrị ẹga myị ẹga wuu.

¹¹ Kpa ụbwọ ka uhye nyamwụ, ká ta ang ịlẹ kọ la wuu ayịreji ká yẹ mẹ-ẹ̀! Ọ tị ka dong chahị jung.”

¹² Ọọwa, Amkpaa-à wẹ Ohe Onyobyi yẹkẹẹ, “Ọ hiigu. M̀ ya iwe da hang ká ka họ ang ọlẹ kọ hang ẹ-ẹga nya ang ịlẹ kọ la wuu lẹ. Ma, ā yụbwọ gwoo ọwa ayịdang koo.” Ọọwa, Ohe Onyobyi à yegiri rụ bwu ẹga nya Amkpaa lẹlẹ.

Anyị bala Ụdụ nya IJobu Ta Ayịreji

¹³ Ẹnụtụrụ ookpokpo ọhẹ, ká anyị nya iJobu juwa la ọhụhụ nya ang oriri ẹ-ẹpwa nya ọnyịnaa ọlẹng ọgbahị lẹ,

¹⁴ ọngọhẹ à wẹ ẹga nya iJobu lụnyẹ-lụnyẹ kaka byoo yẹkẹẹ, “Ụka kahị wẹẹ kpa ịna nyang wu ẹrụ, ibyiyó nyang wẹẹ ga ri amẹ baahị ba.

¹⁵ Ọọwa, alagbụrụ i-bwu ịSẹba ịhyẹ à gba mịlaahị, go ịna bala ibyiyó nyang kpa rụ bala ọ-nwụ anchẹ nyang ịkịla wuu lẹlẹ. Am kẹnẹ-kẹnẹ à be nyà myị lẹẹ kaka ya jeng lẹẹ lẹ!”

¹⁶ Ene ká ọnchẹ ọwẹ ka ya ẹla nyamwụ cheju kpá, ọnchẹ ọkịla pwụ eji kaka byi iJobu yẹkẹẹ, “Ila nya ịkpala bwu uhye-ọgba warị kaka rụ ịmwụ bala anchẹ nyang wuu lẹ. Am kẹnẹ-kẹnẹ à be nyà myị lẹẹ kaka ya jeng lẹlẹ!”

¹⁷ Ene ká ọnchẹ ọwẹ ka ya ẹla nyamwụ cheju kpá, ọnchẹ ọkịla pwụ eji warị kaka byoo yẹkẹẹ, “Ebwo ịta nya ala ịKalụdiya gba mịlaahị, nuhi anyịrẹ ịkamẹlụ nyang bala ọ-nwụ anchẹ nyang ịkịla wuu. Am kẹnẹ-kẹnẹ à be nyà myị lẹẹ kaka ya jeng lẹẹ lẹ!”

¹⁸ Ene ká ọnchẹ ọwẹ ka ya ẹla nyamwụ cheju kpá, ọnchẹ ọkịla pwụ eji warị kaka byoo yẹkẹẹ, “Ụka ká anyị nyang juwa la ọhụhụ ẹ-ẹpwa nya ọnyị ọlẹng nyang ọgbahị lẹ,

¹⁹ igbachịwụ ọtụka ọhẹ à da bwu ugbileji warị ka mịla ẹpwang ọlẹ kị hụ nmooo lẹlẹ. Ẹpwang ọọwa tụrụ nwaa ịwa wuu. Am kẹnẹ-kẹnẹ à be nyà myị lẹẹ kaka ya jeng lẹẹ lẹ!”

²⁰ Ụka ká iJobu wo ẹla nya ọlẹrụ ohyẹẹkpẹ kpá, ọ wuleji lẹ, ọ gu awụrụ nyamwụ ene ẹ-ẹpwụ nya ọjụjụ lẹlẹ. Ọ pwọ inyi hi ẹtẹ-ẹtẹ lẹ, ọ hị nọnọ yahị kụrụ eji juwa gbịgba ha Ohe Oluhye yẹkẹẹ,

²¹ “M̀ wẹ labwabwọ bwu ẹpwụ nya ịnam, M̀ ka jẹ labwabwọ rụ ịnyịnyị. Amkpaa-à ya ang wuu ham lẹ, Ọwa-ọwa à tị ye-è wẹ lẹ. Ogbo ogwogwo ā juwa ha ẹnyị nyamwụ mẹ.”

²² Ẹ-ẹpwụ nya ang myị ang ịwẹ kị họ ẹ-ẹga nya iJobu wuu, ọ́ họ ang ọtịpyọ ọhẹ bwula ọ-kpụ Ohe Oluhye abyị kpong-kpong ka.