Tusimpi 1 - Ibbaibele 1963

Matalikilo: milimo yatusimpi

¹ Ntootu tusimpi twa-Solomoni mwana wa-Davida mwami wa-Israyeli:

² Kuti bantu bazibe busongo alulayo, Baswiilile majwi aakumvwisya,

³ Batambule lulayo lwakucenjeia, Bululami, ambeta, aboololoki;

⁴ Kuti babombumyoyo bapegwe maanu, Abalombe bajane luzibo alumvwisyo;

⁵ Kuti musongo aswiilile akuliyungizizya lwiiyo, Asimaanu alijanine lulayo;

⁶ Bantu bamvwisye tusimpi azikozyano, Majwi aabasongo atulabi twabo.

Lucenjezyo lwanzila zibi

⁷ Kuyoowa Jehova matalikilo aaluzibo, Pele bafubafuba balasampaula busongo alulayo.

⁸ Swiilila, mwanaangu, lulayo lwauso, Alimwi utataalazyi mulao wabanyoko,

⁹ Nkaambo zila ba ingala kumutwe wako, Aluwenje munsingo yako.

¹⁰ Mwanaangu, na basizibi bakoongelezya, Utazumini,

¹¹ Na baamba kuti, Katuya ayebo, tulindile bulowa, Tujane bantu batakwe mulandu,

¹² Tubamene baciputa mbuli kwacimvumwe, Tubamenenene mbuli abo baselukila mukabanda;

¹³ Lino tuyoojana zintu ziyandika, Akuzuzya maanda esu imbono;

¹⁴ Waala ciselo cako munkamu yesu, Toonse tube acikwama comwe buyo—

¹⁵ Mwanaangu, uteendi abo munzila, Kasya maulu aako kunzila zyabo;

¹⁶ Nkaambo maulu aabo alacijaanina bubi, Balafwambaanina kutila bulowa.

¹⁷ Ncobeni taakwe milimo kuteya kakole Mumeso aamuyuni,

¹⁸ Pele bantu aba balalindila bulowa bwabo beni, Basi jate buumi bwabo beni.

¹⁹ Mbuzibede inzila zyaboonse bajana impindu yabubi; Ilanyanzya buumi bwabasikwiivuba,

Busongo mbobucenjezya bantu

²⁰ Busongo bulaita mumigwagwa, Buloongolola mumasambalilo.

²¹ Atala amalambo bulaita, Akumanjililo aamilyango yamunzi bulaamba kuti,

²² Inywe nomutezi, mulaleka lili kuyandisya kutaziba? Anywebo nobasikasampusampu, kusampaula kulaleka lili kumubotezya? Nobafubafuba mulaleka lili kusula luzibo?

²³ Amucenjele kutapatila kwangu. Njoomutilila muuya wangu, Njoomuzibya majwi aangu.

²⁴ Ndakaita, pele mwakakaka; Ndakatandabika maanza aangu, pele teemwakaswiilila;

²⁵ Mwakasampaula lulayo lwangu loonse, Akutabika myoyo yanu kukucenjezya kwangu.

²⁶ Nkaambo kako ambebo njooseka kumapenzi aanu, Njoomusampaula kuciindi cakuyoowa kwanu,

²⁷ Buyoofu nibuyoomusikila mbuli iguwo, Amapenzi aanu mbuli kambizi, Nimuyoopenga akuciswa mumyoyo yanu.

²⁸ Lino bayoondiita, pele nsikooyoovuwa; Bayoondiyandaula, pele tabakooyoondijana.

²⁹ Bakasula luzibo, Teebakasala kuyoowa Jehova;

³⁰ Bakakaka kuswiilila lulayo lwangu, Bakasampaula kucenjezya kwangu;

³¹ Nkaambo kako bayoolya micelo yanzila yabo, Bayookuta makanze aabo.

³² Nkaambo batezi kuleyauka kwabo kulabajaya, Akuliiba kwabafubafuba kulabanyonyoona,

³³ Pele abo baswiilila ndime bayookala kabotu, Bayooba aluumuno cakutayoowa bubi.