Mika 1 - Ibbaibele 1963

Matalikilo

¹ Ngaaya majwi aa-Jehova aakasikila Mika waku-Morese muciindi caJotamu aca-Ahazi aca-Hezekiya bami ba-Juda, ngaakasinsima aa­ Samariya a-Jerusalemu.

Mika ulalilila zibi zyaba-Juda

² Amuswiilile numisyobo yoonse. Teelela, O nyika azyoonse zili mumo. Mwami Jehova abe simulandunyoko. Mwami aambe makani kuzwa kuntempele yakwe iisalala.

³ Nkaambo amubone! Jehova ulapola kuzwa kucikalilo cakwe, ulaseluka kuzoolyataula amasena aasumpukide aanyika.

⁴ Zilundu zilayaaya munsi lyakwe, amimpata ilaanduka, Zilaba mbuli bunzuka buumpwa amulilo, ambuli maanzi aatika ampwampwa.

⁵ Ezi zyoonse nkaambo kamilandu ya-Jakobo azibi zyaluzubo lwa-Israyeli. Ncinzi milandu ya-Jakobo? Sa teensi Samariya? Azipaililo zya-Juda nzinzi? Sa tazyeensi Jerusalemu.

⁶ Lino njoocita kuti Samariya ibe mbuli bulimo bwamumuunda mwabyalwa masaansa. Mabwe aawo njooakunkulisya mumumpata, antalisyo zyawo zilaboneka.

⁷ Nkabela zikozyano zyakwe ziyootyolaulwa, zikombelo zyawo ziyootentwa mumulilo, azituni zyawo zyoonse ziyoosaalwa, nkaambo zipo zyabuvuule nzezyakazyuuzya lino zipo ezyo nzizyonya zyabuvuule zilabweeda kulinzizyo.

⁸ Nkaambo kamakani aya njoomoka akulila, njooenda acinkuna akutasama insangu, njoomuka mbuli bamwaba akulila mbuzilila impo.

⁹ Nkaambo zilonda zyakwe tazisilikiki, Catana ku-Juda, casika akumulyango wabantu bangu ku-Jerusalemu.

¹⁰ Mutaambi makani mu-Gati. Kulila utalili pe. Ku-Beti-Afira (Munzi walusuko) kobumbuluka mulusuko,

¹¹ Uinke acinkuna abweeme nokede mu-Safira (Munzi wabweebesi). Utazwi nokede mu-Zanana (Munzi wakuzwa), Kulila kwa-Betezeli kuyoomunyanzya ciimikililo canu.

¹² Bakede mu-Maroti balalindila bubotu, nkaambo mapenzi aazwa kuli-Jehova asika akumulyango wa-Jerusalemu.

¹³ Anga imbizi kunkalaki, uwe nokede mu-Lakisi, Nduwe wakataangunina mwana musimbi wa-Zioni kubisya, Mulinduwe mwiijenwe milandu ya-Israyeli.

¹⁴ Nkaambo kako ulapa Moresati Gati cipo cakulazya. Maanda aa-Akizibi (Munzi walweeno) ayooleta lweeno kubami ba-Israyeli,

¹⁵ Njoomuletela sikumusaala, nomukede mu-Maresa. Bulemu bwaIsrayeli bulaletwa aku-Adulamu.

¹⁶ Kolikulula akuligela nkaambo kabana bako bayandisi. Kokemezya cinkulu cako mbuli sikube, nkaambo bakusia, banjila mubuzike.