Mateyo 1 - Ibbaibele 1963

Bamawisi Jesu

¹ Ibbuku lyabansiku ba-Jesu Kristo, Mwanaakwe Davida, mwanaakwe Abrahamu.

² Abrahamu wakazyala Izaka, alakwe Izaka wakazyala Jakobo, alakwe Jakobo wakazyala Juda ababunyina bakwe,

³ alakwe Juda wakazyala Faresi a-Zara kuli-Tama, alakwe Faresi wakazyala Hezromi, alakwe Hezromi wakazyala Aramu,

⁴ alakwe Aramu wakazyala Aminadaba, alakwe Aminadaba wakazyala Naasoni, alakwe Naasoni wakazyala Salmoni,

⁵ alakwe Salmoni wakazyala Boazi kuli-Rahabe, alakwe Boazi wakazyala Obede kuli­-Rute, alakwe Obede wakazyala Jese,

⁶ alakwe Jese wakazyala mwami Davida. Alakwe Davida wakazyala Solomoni kulimuka-Uriya,

⁷ alakwe Solomoni wakazyala Roboamu, alakwe Roboamu wakazyala Abiya, alakwe Abiya wakazyala Asa,

⁸ alakwe Asa wakazyala Josafata, alakwe Josafata wakazyala Joramu, alakwe Joramu wakazyala Uziya,

⁹ alakwe Uziya wakazyala Jotama, alakwe Jotama wakazyala Ahaze; alakwe Ahaze wakazyala Hezekiya,

¹⁰ alakwe Hezekiya wakazyala Manasi, alakwe Manasi wakazyala Amosi, alakwe Amosi wakazyala Josiya,

¹¹ alakwe Josiya wakazyala Jekoniya ababunyina bakwe kuciindi cakulonzegwa ku-Babuloni.

¹² Musule lyakulonzegwa ku-Babuloni Jekoniya wakazyala Salatiele, alakwe Salatiele wakazyala Zerobabele,

¹³ alakwe Zerobabele wakazyala Abiyudi, alakwe Abiyudi wakazyala Eliyakimu, alakwe Eliyakimu wakazyala Azoro,

¹⁴ alakwe Azoro wakazyala Sadoki, alakwe Sadoki wakazyala Akimu, alakwe Akimu wakazyala Eliyudi,

¹⁵ alakwe Eliyudi wakazyala Eleazara, alakwe Eleazara wakazyala Matani, alakwe Matani wakazyala Jakobo,

¹⁶ alakwe Jakobo wakazyala Josefa, mulumaakwe Maliya, nguwe wakazyala Jesu uutegwa Kristo.

¹⁷ Aboobo mazyalani oonse kuzwida kuli-Abrahamu kusikila kuli-Davida akali mazyalani aali ikumi mwaane, akuzwida kuli-Davida akusikila kukulonzegwa ku-Babuloni mazyalani aya aalo ali ikumi mwaane, akuzwida kukulonzegwa ku-Babuloni akusikila kuli-Kristo mazyalani aya aalo ali ikumi mwaane.

Jesu Kristo mbwaakazyalwa

¹⁸ Lino mbuboobu mbwaakazyalwa Jesu Kristo. Maliya banyina katangidwe kuli-Josefa, lino kabatana kuswanaana wakabonwa kuti ulimitide kuli-Muuya Uusalala.

¹⁹ Lino Josefa mulumaakwe mbaakali muntu uululeme, takwakayanda kumuusya insoni, wakayeeya kuti nkamuleke kumbali.

²⁰ Nkabela naakali kuyeeya miyeeyo eyi kwakamubonekela angelo wa-Jehova muciloto, wakati, Josefa mwanaakwe Davida, utayoowi kulitambwida mwanakazi wako, nkaambo kakuti eco cimitidwe mulinguwe nca-Muuya Uusalala.

²¹ Nkabela uzootumbuka mwana mulombe ngozooulika izina lya-Jesu, nkaambo nguwe uuzoofutula bantu bakwe kuzwa kuzibi zyabo.

²² Lino aya oonse akaba kuti acitwe ngaakaamba Jehova kumusinsimi kuti:

²³ Amubone. Oyu musimbi uzoomita, uzootumbuka mwana mulombe. Nkabela bazoomuulika izina lya-Emanuele, nkukwaamba kuti, Leza uli aswe.

²⁴ Lino Josefa naakabuka kuŋonzi wakacita mbuli mbwaakamulailila angelo wa-Jehova, wakalitambwida mwanakazi,

²⁵ nekubaboobo katamuzi mane do wakatumbuka mwana mulombe, elyo wakamuulika izina lya-Jesu.