Maako 1 - Ibbaibele 1963

Johane Mubapatizi

¹ Matalikilo aa-Makani Mabotu aa-Jesu Kristo Mwana a-Leza.

² Mbubonya mbukulembedwe kumusinsimi Isaya kuti, Bona, ndatuma mutumwa wangu kunembo lyako, Nguuyookululamikila inzila yako.

³ Ijwi lyasikuompolola munkanda, Amubambe mugwagwa wa-Jehova, Amucincimike inzila zyakwe.

⁴ Kwakapompa Johane, wakali kubapatizya munkanda, akukambauka lubapatizyo lwakweempwa ulwakuti zilekelelwe zibi.

⁵ Nkabela kwakalundumuka nkwaakabede cisi coonse ca-Judaya, abalo boonse bamu-Jerusalemu, bakali kubapatizigwa nguwe mumulonga wa-Jordano akulyaamba zibi zyabo.

⁶ Oyo Johane wakali kusama boya bwankamele, akulitinga lutambo lwacikanda mucibunu cakwe, alimwi wakali kulya cikwikwi abuci bwamusokwe.

⁷ Nkabela wakakambauka kuti, Kunsi lyangu uciza oyo uundiinda inguzu ngwenteelede kukotamina akwaangununa indyasyo zyakwe.

⁸ Mebo ndamubapatizya amaanzi, walo uzoomubapatizya a-Muuya Uusalala.

Jesu mbwaakabapatizigwa akusunkwa

⁹ Lino kuciindi eco kwakasika Jesu kuzwa ku-Nazaleta mucisi ca-Galilaya, akubapatizigwa kuli-Johane mu-Jordano.

¹⁰ Ndilyonya naakazwa mumaanzi wakabona ijulu lyaba bukwazi, a-Muuya wamuselukila mbuli inziba.

¹¹ Lino kwakasika ijwi kuzwa kujulu, lyakati, Nduwe mwanaangu uuyandwa, ndakondwa loko kulinduwe.

¹² Ndilyonya Muuya wakamuyumbila kunkanda.

¹³ Nkabela wakali munkanda mazuba aali makumi one, kusunkwa kwa-Saatani, kali antoomwe abanyama, Nkabela baangelo bakali kumukutaukila.

Jesu mbwaakakanka kukambauka. Basikwiiya bataanzi

¹⁴ Lino Johane naakamana kwaabwa, Jesu wakasika mucisi caku-Galilaya, wakali kuya bukambauko Makani Mabotu aa-Leza,

¹⁵ akwaamba kuti, Casika ciindi, Bwami bwa-Leza buliswenede afwaafwi. Amweempwe, muzuminine Makani Mabotu.

¹⁶ Nkabela naakali kuya bweenda kumbali alwizi lwa-Galilaya, wakabona Simoni a-Andreya munyina Simoni, bakali mukuwaala lusabwe mumaanzi, nkaambo kabali bazubi.

¹⁷ Elyo Jesu wakabaambila kuti, Amuboole, mundicilile, nkamucitye basikuzuba bantu.

¹⁸ Ndilyonya bakasia insabwe zyabo, bamucilila.

¹⁹ Nkabela naakasika kunembo kaniini, wakajana Jakobo, mwanaakwe Zebedayo, a-Johane munyina, abalo bakali mubwaato, bakali mukusuma insabwe zyabo.

²⁰ Mpoonya wakabaita, abalo bakasia wisi, Zebedayo, mubwaato antoomwe abasimilimo bakwe, bamucilila.

Jesu mbwaakaiisya mu-Kapenaumu

²¹ Lino bakanjila mu-Kapenaumu, Mpawo kubuzuba bwa-Sabata wakanjila mucikombelo, wakatalika kwiisya.

²² Nkabela bakakankamana kukwiisya kwakwe, ikuti wakali kubaiisya mbuli sibwami, takakali mbuli balembi pe.

²³ Mpoonya mucikombelo mwakali muntu uunjilidwe daimona uusofweede, wakoonzomoka kuti,

²⁴ Ino makaninzi ngutujisi ayebo, Jesu omuna-Nazareta P Sa weza kuzootumanizya? Ndikuzi mbobede, nduwe Musalali wa-Leza.

²⁵ Lino Jesu wakamutapatila, wati, Umuna, uzwe mumuntu oyu.

²⁶ Mpoonya awo daimona wakamuzulunganya, woonzomoka ajwi ipati, wazwa.

²⁷ Lino bakagamba boonse, babuzyanya bati, Ino ncinzi eci? Oku kwiisya kupya, nkwabwami! Ulalailila abadaimona, abalo balamvwa.

²⁸ Mpoonya wakainka impuwo moonse mucisi caGalilaya cizingulukide.

Mbwaakaponya banyinazyala Petro abamwi

²⁹ Mpoonya awo nibakazwa mucikombelo, bakanjila muŋanda yabaSimoni a-Andreya, antoomwe a-Jakobo a-Johane.

³⁰ Nkabela banyinazyala Simoni bakalilede, balaciswa intuntumanzi, mpoonya bamwaambila mbabo.

³¹ Lino wakaswena, wabajata ijanza, wababusya, elyo intuntumanzi yakabaleka, bakatalika kubakutaukila.

³² Lino mangolezya, lube buyo luubeube, bakamuletela boonse baciswa, abalo basidaimona,

³³ nkabela munzi woonse wakayobolokela kumulyango.

³⁴ Nkabela wakaponya banji baciswa malwazi aamisyobo misyobo, alimwi wakatanda badaimona banji, pele takakali kuzumizya badaimona kwaamba, nkaambo kakuti kabamuzi.

³⁵ Lino buumbuluke buyo, wakafuma loko, wazwa, wainka kunkanda kuyookomba nkukonya.

³⁶ Nkabela Simoni ambobakali abo bakamutobela,

³⁷ Bamujane, bamwaambila kuti, Bantu boonse balayandaula nduwe.

³⁸ Wabaambila wati, Katuya kumbi kuminzi iiswaangene, kuti nkakambauke oko akwalo, nkaambo nciceeco ncendazida.

³⁹ Lino wakaya bukambauka muzikombelo zyabo mucisi coonse ca-Galilaya, akuya butanda badaimona.

Mbwaakaponya sicinsenda

⁴⁰ Lino kwakasika sicinsenda, weza bufugamina akukumbila kuti, Kuti koyanda, ulakonzya kundisalazya.

⁴¹ Mpawo wakamufwida luzyalo, watambika ijanza lyakwe, wamwaampa, wamwaambila kuti, Ndazumina, kosalazigwa.

⁴² Nkabela ndilyonya cinsenda cakwe cakamuleka, wasalazigwa.

⁴³ Lino wakamukonkomwenesya, wamutanda ndilyonya,

⁴⁴ wati, Bona, utaambili muntu naba omwe, pele koya, ukalitondezye kumupaizi, ukatuulile kusalazigwa kwako mbubonya mbwaakalailila Musa, kuti cibe citondezyo kulimbabo.

⁴⁵ Pele walo, naakazwa oko, waakutalika kuya bwaamba kwaamba, wakaduumya inkani eyi, ncaakakacilwa Jesu kunjila limbi mumunzi kubusyu bwabantu, pele wakali kukala anze munkanda, nkabela bantu bakali kuza nkwaakabede kuzwa mubunzi-bunzi.