Lute 1 - Ibbaibele 1963

Rute mbwaakakakatila banyinazyala mumapenzi aabo

¹ Lino mumazuba alya babetesi nebakali kubeteka kwakaba inzala munyika, nkabela umwi muntu waku-Betelehemu mucisi ca-Juda wakainka kuyoo­ kala-kala munyika ya-Moabu, kali amwanakazi wakwe abana bakwe balombe bobile.

² Izina lyamuntu oyo kali Elimeleki, amwanakazi wakwe kali Naomi, abana bakwe bobile bakali Maloni a-Kilioni. Bakali ba-Efrata bakuBetelehemu mucisi ca-Juda. Lino bakasika kunyika ya-Moabu akukalakala nkuko.

³ Nbabela Elimeleki mulumi wa-Naomi wakafwa, aboobo wakasyaala alike abana bakwe balombe bobile.

⁴ Lino bakakwata banakazi bakucisi ca-Moabu. Izina lyaumwi kali Olipa, awabili kali Rute. Nkabela bakalikede nkukonya oko myaka iili mbuli ikumi.

⁵ Elyo Maloni a-Kilioni bakafwa boonse bobile. Mwanakazi wakafwidwa mulumaakwe abana bakwe boonse bobile.

⁶ Lino wakanyamuka abamukabana bakwe kuti akapiluke kuzwa kunyika ya-Moabu, nkaambo kamvwide kale omo mucisi ca-Moabu kuti Jehova kabaswayide bantu bakwe akubapa zilyo.

⁷ Aboobo wakazwa omo mwakabede, wakanyamuka abamukabana bakwe bobile, nkabela bakali kuya bweenda munzila kuti apiluke kucisi ca-Juda.

⁸ Pele Naomi wakaambila bamukabana bakwe bobile kuti, Kamuya, mukapiluke umwi aumwi kuŋanda yabanyina, Jehova amufwide luzyalo, mbubonya mbumwakacitila bafwide ambumwandicitila ambebo.

⁹ Jehova amupe coolwe kuti mujane cilyokezezyo umwi aumwi muŋanda yamulumaakwe, Mpawo wakabamyonta, nkabela bakatalika kulila.

¹⁰ Bakamwaambila kuti, Nee! Katuya toonse kubantu bako.

¹¹ Lino Naomi wakati, Pe, bana bangu, amupiluke, Nkaambonzi nomuyanda kwiinka ambe? Sa ncijisi bana balombe mwida lyangu bakonzya kuyoomukwata?

¹² Amupiluke, nobana bangu, kulindinywe, nkaambo mebo ndacembaala, nsikonzyi kukwatwa pe. Na ndaamba kuti cicikonzeka kukwatwa, na ndajana mulumi masiku ano ngaonya akuzyala bana balombe,

¹³ sa mulakonzya kulindila mane bakakomene? Sa mulakonzya kulikasya kukwatwa kumbi nkaambo kambabo? Nee, nobana bangu! Moyo wangu ulausa loko nkaambo kanu, nkaambo kakuti ijanza lya-Jehova lyandiletela mapenzi.

¹⁴ Bamvwe obo bakalilisya alimwi. Lino Olipa wakamyonta banyinazyala, wapiluka, pele Rute nguwakakakatila mbabo.

¹⁵ Lino bakati, Bona! Mukwatwanyoko wapiluka kulibanyina akumizimu yakwe. Piluka ayebo mbuli mukwatwanyoko.

¹⁶ Pele Rute wakavuwa kuti, Utandisungilizyi kukusia nanka kuleka kukutobela, nkaambo kufumbwa nkoya yebo ndaya ambebo, nkoyookala yebo njookala ambebo. Bantu bako bayooba bantu bangu, a-Leza wako uyooba Leza wangu.

¹⁷ Kufumbwa nkoyoofwida njoofwida ambebo nkuko akuzikwa nkukonya. Leza andicitile mbubonya akwiinda na ndazumizya cintu neciba cimwi cita lufu luzutu kundaanzanya ayebo.

¹⁸ Lino Naomi naakabona kuti moyo wakwe ulisungukide loko kuya awe, wakaleka kukazyanya awe.

¹⁹ Aboobo bakeenda boonse bobile mane lumwi bakasika ku-Betelehemu, Lino nebakasika ku-Betelehemu, bantu boonse bamunzi bakagamba nkaambo kabo, nkabela banakazi bakati, Ma! Sa teensi Naomi oyu?

²⁰ Pele wakabavwiila kuti, Mutandaambi limbi kuti Naomi pe, amundaambe kuti Mara, nkaambo Syakeemba wandicitila makani aalula luu!

²¹ Nendakainka ndakalizwide, pele Jehova wandiboozya acinkwamaanza. Nkaambonzi mulandaamba kuti Naomi? Jehova wandipenzya, Syakeemba wandibisizya!

²² Mbuboobo Naomi mbwaakaboola. Wakeza a-Rute mu-Moabu mukamwana wakwe kuzwa kucisi ca-Moabu, Nkabela bakasika ku-Betelehemu maila aabbaale naakatalika kutebulwa.