Luka 1 - Ibbaibele 1963

¹ Banjibanji mbobakasoleka kulungulula makani aya aakacitwa cakasimpe akati kesu,

² mbubonya mbobakatwaambila ngao, abakali kwaabona ameso kuzwa kumatalikilo, abakali basimilimo bamakani,

³ mbwendazibisya oonse kuzwa kumazwido, ambebo ndati, ncibotu kuti ndikulembele, Teofile omulemu,

⁴ kuti uzibe kusinizya kwamakani ayo ngookaiisigwa.

Kwaambwa kuzyalwa kwa-Johane

⁵ Kumazuba aa-Heroda, mwami waku-Judaya, kwakali mupaizi uwakali kutegwa Zakariya, wamubulizi bwa-Abiya, wakalijisi mukaintu wakubana ba-Aroni, izina lyakwe wali Elizabeta.

⁶ Boonse bobile bakaliluleme kumeso aa-Leza, bakali kweenda mumilazyo emilao yoonse ya-Jehova, tabakwe nobakajisi kaambo.

⁷ Pele tabakali kujisi mwana nkaambo Elizabeta takali kuzyala, alimwi boonse bobile bakalicembeede.

⁸ Elyo mbwaakali kumana mulimo wabupaizi kumbele lya-Leza, kubulizi bwakwe,

⁹ mbubonya mbuli ciyanza cabupaizi, ngonguwe uwakasalwa kunjila muntempele ya-Jehova kuumpa tununkilizyo twakupaizya.

¹⁰ Abantu boonse bali kukombela anze kuciindi cakuumpa tununkilizyo.

¹¹ Mpoonya awo kwakalibonya kulinguwe angelo wa-Jehova uliimvwi kululyo lwacitulilo catununkilizyo.

¹² Naakamubona wakatumpuka Zakariya, wayoowa.

¹³ Nkabela angelo wakati kulinguwe, Utayoowi, Zakariya, ukukomba kwako kwamvwigwa, mukaintu wako Elizabeta uzookuzyalila mwana mulombe, ngozooulika zina lya-Johane.

¹⁴ Yebo uzooba akukondwa akusekelela, alimwi banjibanji bayoobotelwa kukuzyalwa kwakwe.

¹⁵ Unoozooli mupati mumeso aa-Jehova, takoozoonywa waini niiba mbote, unoozoozywide Muuya Uusalala kuzwa kukuzyalwa kwakwe.

¹⁶ Abanjibanji kubana baIsrayeli uyoobasandwida kuli-Jehova, Leza wabo.

¹⁷ Uyooenda kumbele lyakwe amuuya enguzu zya-Eliya, kuti aboozye myoyo yamawisi kubana, abaabo abatamvwi kuluzibo lwabaluleme, akabambile Jehova bantu balulamikidwe.

¹⁸ Zakariya wati kuli-angelo, Iniinga aya ndilaaziba buti? Nendacembaala kale mebo, amukaintu wangu ujisi myaaka minjiminji.

¹⁹ Angelo wamuvuwa kuti, Ndime Gabriyeli uuima kubusyu bwa-Leza, ndatumwa kuti ndyaambe kulinduwe, ndikuletele aya makani mabotu.

²⁰ Langa, ulaba cimuumu yebo, tokoonookonzya kwaambaula mane do kubuzuba mbwaayoocitwa makani aya, nkaambo tosyomede majwi aangu, aayooba kuciindi cao.

²¹ Abantu bakali kumulindilila Zakariya, bakagambwa kuti wamuka kuzwa muntempele.

²² Naakazwa mumo wakakakilwa kwaambaula abalo, nkabela bakaziba kuti wabona cilengaano muntempele, uya butondaika kulimbabo, ngu cimuumu.

²³ Elyo nocakamana ciindi camilimo yakwe, wakainka kuŋanda yakwe.

²⁴ Munsi lyamazuba ayo Elizabeta, mukaintu wakwe, wakamita, walivundika myeezi yosanwe wati,

²⁵ Jehova wandicita bobuya mumazuba ngaandilanga kundigwisya masampu akati kabantu.

Kwaambwa kuzyalwa kwa-Jesu

²⁶ Kumweezi wamusanu muumwi Leza wakatuma angelo Gabriyeli kuya kumunzi waku-Galilaya, uutegwa Nazareta,

²⁷ kumusimbi uwakatangidwe kumwaalumi uwali kutegwa Josefa, weŋanda ya-Davida, izina lyamusimbi wakali Maliya.

²⁸ Angelo wakamunjilila wati, Wabonwa oopedwe luzyalo, Jehova uli ayebo.

²⁹ Pele walo wakatumpuka kapati kumajwi aakwe wayeeya kuti, Nkwaanzyanzi oku?

³⁰ Angelo wakamwaambila kuti, Utayoowi, Maliya, wajana luzyalo kuli-Leza,

³¹ Langa, ulamita, uzootumbuka mwana mulombe, ngozooulika zina lya-Jesu.

³² Unoozooli mupati, uzootegwa Mwana a-Sijulu lyamajulu, Jehova Leza uzoomupa cuuno cabwami cawisi Davida,

³³ uyooendelezya ŋanda ya-Jakobo mane kukabe kutamani, ubwami bwakwe tabukooyoomana.

³⁴ Maliya wakati kuli-angelo, Ino oku kuzooba buti neentazi amwaalumi pe?

³⁵ Angelo wakamuvuwa kuti, Muuya Uusalala uzooza alinduwe, enguzu zya-Sijulu lyamajulu zikuvunikile, ayooyo Uusalala uti tumbukwe uzooambwa kuti Mwana a-Leza,

³⁶ Alimwi langa, Elizabeta musazinyoko, ulimisi mwana mulombe mubucembele bwakwe, umweezi uno ngwasanu muumwi kulinguwe uwakali kutegwa tazyali.

³⁷ Nkaambo taakwe ijwi ilizwa kuli-Leza ilibula nguzu.

³⁸ Maliya wakateeti, Ndi muzike wa-Jehova mebo, akube kulindime mbubonya mbuli kwaamba kwako. Nkabela angelo wakainka.

Maliya mbwaakaswaya Elizabeta, enyimbo zyabo

³⁹ Mumazuba ayo wakabweza Maliya, wafwambaana wainka kumalundu kumunzi waku-Juda,

⁴⁰ wakanjila muŋanda ya-Zakariya, waanzya Elizabeta,

⁴¹ Mpoonya awo Elizabeta amvwe buyo kwaanzya kwa-Mariya, mwana wasamba mwida lyakwe, alimwi Elizabeta wakazula Muuya Uusalala,

⁴² woompolola ejwi ipati wati, Uli acoolwe yebo akati kabakaintu, awalo mwana uuli mwida lyako uli acoolwe.

⁴³ Ino caba buti kulindime kuti banyina Mwami wangu baboole kulindime?

⁴⁴ Nkaambo ijwi lyakwaanzya kwako licimvwigwa buyo mumatwi aangu, mwana wasamba mwida lyangu akubotelwa.

⁴⁵ Alimwi uli acoolwe walo uwakasyoma, nkaambo kuyoocitwa ukwakaambwa Jehova kulinguwe.

⁴⁶ Nkabela Maliya wakateeti, Moyo wangu ulamulemya Jehova,

⁴⁷ Amuuya wangu ulabotelwa kuli-Leza, Mufutuli wangu,

⁴⁸ Nkaambo wayeeya bucete bwamuzike wakwe. Kuzwida sunu mazyalani oonse anoondyaamba kuti nacoolwe.

⁴⁹ Nkaambo Singuzu wandicitila zintu zipati, Lilasalala zina lyakwe.

⁵⁰ Uluzyalo lwakwe luli kumazyalani amazyalani, Kulibaabo abamuyoowa.

⁵¹ Wacita milimo yenguzu ejanza lyakwe. Wabamwaya abalisumpula mukuyeeya kwamyoyo yabo.

⁵² Wagwisya bami azyuuno zyabo, Wabasumpula balyeetezya,

⁵³ Basinzala wabakusya zilweela, Abavubi wabatanda buyo.

⁵⁴ Wagwasya muzike wakwe Israyeli, Kuti ayeeye luzyalo

⁵⁵ Kuli-Abrahamu akubazukulu bakwe mane kukabe kutamani, (Mbubonya mbuli kwaamba kwakwe kumatateesu),

⁵⁶ Maliya wakaakukala kulinguwe afwaafwi emyeezi yotatwe, nkokuya abweede kuŋanda yakwe.

Kuzyalwa kwa-Johane, alwiimbo lwa-Zakariya

⁵⁷ Eno nkabela ciindi ca-Elizabeta cakutumbuka cakasika, watumbuka mwana mulombe.

⁵⁸ Balo mbobakayakide abo abasazinyina bacimvwa kuti Jehova wakamucitila luzyalo lupati, bakasekelela anguwe.

⁵⁹ Elyo mubuzuba bwasanu mwaatatu bakasika kumupalula mwana, bati kamuulike zina lyawisi, ilyakuti Zakariya.

⁶⁰ Pele banyina bakakaka bati, Pe, ulategwa ngu-Johane.

⁶¹ Bakati kulinguwe, Taakwe musazinyoko uwakaulikidwe zina elyo.

⁶² Nkabela bakatondaika kuliwisi, na uyanda kuti aulikwe lyakutinzi.

⁶³ Walo wakakumbila cakulembela, walemba kuti, Izina lyakwe ngu-Johane. Bakaankamana boonse.

⁶⁴ Ndilyonya wakalakamuka mulomo wakwe, waanguluka mulaka wakwe, waambaula walumba Leza.

⁶⁵ Boonse mbobakayakide abo bakayoowa, amakani aya akaya mpuwo mucisi coonse camalundu a-Judaya.

⁶⁶ Boonse abakaamvwa bakaayobola mumyoyo yabo bati, Iniinga uyooba mwana uuli buti oyu? Nkaambo ijanza lya-Jehova lyakali kulinguwe.

⁶⁷ Zakariya wisi wakazula Muuya Uusalala, wakasinsima, wateeti,

⁶⁸ Akulumbwe Jehova, Leza wa-Israyeli, Nkaambo wayeeya bantu bakwe, wabanununa.

⁶⁹ Watubusizya Mufutuli Singuzu Muŋanda ya-Davida muzike wakwe,

⁷⁰ (Mbubonya mbwaakaamba kumilomo yabasinsimi bakwe abasalala, kuzwa kumatalikilo)

⁷¹ Kutuvuna kulibasinkondoma, akumaanza aabaabo boonse abatusulide.

⁷² Kucita luzyalo akati kamatateesu, Akuyeeya mulongo wakwe uusalala,

⁷³ Icikonke ncaakakonka kuli-Abrahamu taateesu

⁷⁴ Kutupa kuti, mbotwaangululwa kumaanza aabasinkondoma,

⁷⁵ Tumukombe cakutayoowa mukusalala amubululami Kumbele lyakwe mazuba esu oonse.

⁷⁶ Ayebo, omwana, uyootegwa musinsimi wa-Sijulu lyamajulu, Nkaambo uyooenda kumbele lya-Mwami kululamika nzila zyakwe,

⁷⁷ Kuzibya bantu bakwe lufutuko mukujatilwa kwazibi zyabo.

⁷⁸ Nkaambo kamoyo waluzyalo wa-Leza wesu, Kulindulo bwatuyeeya bucedo bwakujulu,

⁷⁹ Bukamunikile abakede mumudima amucimvule calufu, Bukeenzye matende esu munzila yaluumuno.

⁸⁰ Wakakomena mwana, waba anguzu kumuuya, wakalikede musokwe mane do kubuzuba mbwaakayubululwa kuli-Israyeli.