Joweli 1 - Ibbaibele 1963

Cilengano cacisozi

¹ Ngaaya majwi aa-Jehova aakasika kuli-Joelimwana wa-Petueli.

² Amuswiilile, nubapati. Amuteelele nubantu boonse bamunyika. Sa kwa­ kaboneka makani aali boobu, kuciindi canu nanka kuciindi camauso?

³ Amwaambile bana banu makani, abalo bana banu baambile bana babo, abana babo baambile izyalani limbi.

⁴ Eco cakasyaala kudiingo cakacilya cisozi, aceeco cakasyaala kucisozi yakacilya inswabanda, aceeco cakasyaala kunswabanda camusokonya nguwakacilya.

⁵ Amubuke nubakolwi, mulile. Amuwuule nyoonse nubasikunywa waini, nkaambo kambote, ikuti yanyanzigwa kumilomo yanu.

⁶ Nkaambo kuleza bantu kuzoosaala nyika yangu, Mbayumu, alimwi tababaliki. Meno aabo ali mbuli meno aamulavu, abakampanga babo bali mbuli basyuumbwa,

⁷ Banyonyoona musaansa wesu, amikuyu yesu baibisya. Kukupulula baikupulula akwiisowa, amitabi yayo baisonzoola, yasalala ngende.

⁸ Amoomoke mbuli nakalindu uusamide masaka, uulila mulumi wakwe iwakamukwata lino lino.

⁹ Nkaambo cituuzyo calesegwa, acipaizyo cakunywa coonse, kuŋanda ya-Jehova. Bapaizi basimilimo ba-Jehova balalila.

¹⁰ Myuunda ilisaalidwe, nyika ilalila, nkaambo maila alisaalidwe, awaini wayuminina, aalo mafuta alimanide.

¹¹ Balimi balyuuside, abasimisaansa balalila, nkaambo kabulotwe abbaale, nkaambo zitebulwa zyamumyuunda zilimanide.

¹² Musaansa wapusama, mukuyu wafwa, misamu yapomegranite akakunka amibula, misamu yoonse yamusokwe, iliyumide. Lukondo loonse lwabamanina bantu.

¹³ Amusame zisamo zyakulila, nubapaizi. Amulile, nubasimilimo ba cipaililo. Kamuza kuzoolala azisani zyamasaka, nubasimilimo ba-Leza wangu, Nkaambo cituuzyo acipaizyo cakunywa zyoonse zyalesegwa kŋanda yaLeza wanu.

¹⁴ Amubambe ciindi cakuliimya kulya, amucite imbungano, mubunganye banene abantu boonse bamunyika kuŋanda ya-Jehova Leza wanu, mukwiile kuli-Jehova.

¹⁵ Maawe! Buzuba bulaca! Buzuba bwaJehova buli afwaafwi. Buleza mbuli lunyonyooko kuzwa kujanza lyaSinguzuzyoonse.

¹⁶ Sa zilyo teezyakasigwa kumeso esu? Lukondo alutangalo sa teezyamana kuŋanda ya-Leza wesu?

¹⁷ Inseke zyanyana kunsi lyamaganko aazyo. Zibambilo zilisaalidwe, amatala alimwaikide, nkaambo maila abola.

¹⁸ Banyama balatongela, matanga aaŋombe alalila, nkaambo taakwe bwizu bwaku cela. Aalo matanga aambelele apenga.

¹⁹ O Jehova! Ndakwilila nduwe! Nkaambo mulilo wamana kutenta mweemvwe wamumabanda, mabangabanga atenta misamu yoonse yamusokwe.

²⁰ Abalo banyama bamusokwe balalilila nduwe, nkaambo tulonga twamaanzi twayuminina nta, amulilo wamana kutenta mweemvwe wamumabanda.