Johane 1 - Ibbaibele 1963

Ijwi mbwaakalifungula mubili

¹ Kumatalikilo Ijwi wakaliko, awalo Ijwi wakali antoomwe a-Leza, eno Ijwi oyo wakali Leza,

² Ngonguwe uwakali kuli-Leza kumatalikilo.

³ Zyoonse zintu nkozyakaanzwa kulinguwe, kuti naatali nguwe nokutakwe ecomwe icakaanzwa.

⁴ Mulinguwe momwakali buumi, buumi obu wakali Mumuni wabantu.

⁵ Mumuni ulamweka mumudima, pele mudima tuuzundide.

⁶ Kwakali muntu uwakatumwa Leza, uwakali ezina lya-Johane.

⁷ Ngonguwe uwakazida bumboni, azoolungulule makani aa-Mumuni, kuti nkaambo kamajwi aakwe bantu boonse basyome.

⁸ Walo mwini engwe ngowakali Mumuni, pele wakazida kuzoolungulula Mumuni oyo.

⁹ Walo ngo-Mumuni mwinimwini uumunikila bantu boonse abazyalwa ansi ano.

¹⁰ Wakaliwo ansi, inyika yakaanzwa nguwe, pele inyika tiikamuzibide.

¹¹ Wakeza kubwami bwakwe mwini, pele bana bakwe tabakamuzuminide.

¹² Ino boonse abamuzumina, nkokuti abasyoma zina lyakwe, wabaabila nguzu zyakusanduka akuba bana ba-Leza,

¹³ kutaamba bana abakazyalwa kubantu, nokuba kukuyanda kwakuzyalana kwabuntu, nokuba kukuyanda kwamwaalumi, pele mbana abakazyalwa kuli-Leza.

¹⁴ Awalo Ijwi wakalifungula waba mubili wabuntu uwakakalakala akati kesu, uwakazywide luzyalo abwini, aswebo twakeebela bulemu bwakwe, bulemu ububa anga mbwa-Mwana uuzyalwa alike kuli-Wisi.

¹⁵ Johane wali kumulungulula, wali koompolola kuti, Ngonguwe oyu ngwendakali kumwaambila kuti, Uuza munsi lyangu uli kumbele lyangu, nkaambo ngomutaanzi kulindime.

¹⁶ Swebo toonse twakatambula kukuzyula kwakwe, luzyalo uluyungililwa luzyalo.

¹⁷ Nkaambo mulao wakapegwa Musa, pele luzyalo abwini zyakazwa kuli-Jesu Kristo.

¹⁸ Takukwe muntu uwakabona Leza neciba ciindi comwe, pele Mwana, simuzyalwa alike, uukede acamba ca-Wisi, ngowakatwaambila aanguwe.

Bumboni bwa-Johane Mubapatizi

¹⁹ Eno obu mbobumboni bwa-Johane, ba-Juda nobakatuma kulinguwe bapaizi aba-Levi abazwa ku-Jerusalemu, kumubuzya kuti, Nduweni?

²⁰ Walo wakazumina takakazizye, wakazumina kuti, Endime Kristo pe.

²¹ Bakamubuzya kuti, Ino nduweni? Sena nduwe Eliya? Wakati, Endime. Sena nduwe musinsimi oyo? Wakavuwa kuti, Pe.

²² Nkaambo kaako bakamubuzya kuti, Ino kai nduweni? Twaambile kuti tukabalungulwide kabotu abo abakatutuma, Ulaamba buti?

²³ Wakati, Ndime ijwi lyayooyo uuompolola munkanda uuti, Amululamike nzila ya-Jehova, mbubonya mbwaakaamba musinsimi Isaya.

²⁴ Eno abo abakali kutumidwe bakazwa kubaFarisi.

²⁵ Nkabela bakamubuzya kuti, Ino nkaambonzi ncobapatizya yebo, anooli toli Kristo naba Eliya, naba musinsimi oyo?

²⁶ Johane wakabavuwa kuti, Mebo ndabapatizya amaanzi. Akati kanu mpali omwe uuimvwi ngomutezi,

²⁷ nguwenya uuza munsi lyangu, ngwenteelede kuti ndyaangunune kaanzyo kandyasyo yakwe.

²⁸ Ezi zintu zyakacitika mu-Betaniya kutala lya-Jordano, nkwaali kubapatizya Johane.

²⁹ Nobwakaca wakabona Jesu uza kulinguwe wakati, Amubone, Mwanaambelele wa-Leza, uugwisya cibi cenyika.

³⁰ Ngonguwe oyo ngwendakali kwaamba kuti, Munsi lyangu uleza muntu uuli kumbele lyangu, nkaambo ngomutaanzi kulindime.

³¹ Eno nsendali kumuzi, pele kuti ayubululwe kuli-Israyeli, ncendakazida kuzoobapatizya amaanzi.

³² Alimwi Johane wakalungulula kuti, Ndakabona Muuya ulaseluka, uli mbuli nziba iizwa kujulu, wakakala alinguwe.

³³ Nsendali kumuzi, pele oyo uwakandituma kuyoobapatizya amaan: I, walo wakandaambila kuti, Oyo ngoyoobona kuti Muuya waseluka alinguwe akumukala, ngonguwe uubapatizya a-Muuya Uusalala.

³⁴ Eno ndakabona, ndakalungulula kuti oyu ngo-Mwana a-Leza,

Basikwiiya bataanzi ba-Jesu

³⁵ Alimwi nobwakaca Johane wakali kwiimvwi, abasikwiiya bakwe bobile,

³⁶ wakazilikila Jesu naali kuya bweenda wakati, Amulange. Mwanaambelele wa-Leza,

³⁷ Abalo basikwiiya bobile bakamumvwa naakaamba, nkabela bakamucilila Jesu.

³⁸ Eno Jesu wakacebuka, wakababona baza bumucilide, wakabaambila kuti, Muyandaulanzi? Bakamwaambila kuti, Rabi, (nkokuti kukupandululwa, Mwiiyi) ukala kuli?

³⁹ Wakabaambila kuti, Amuboole muzoobone. Nkaambo kaako bakaboola, bakabona nkwaali kukala, bakakala awalo elyo zuba, kwali kumazuba.

⁴⁰ Umwi wabaabo bobile abakamvwa Johane naakaamba, akumucilila Jesu, wali Andreya, mwanaakwabo Simoni Petro.

⁴¹ Wakasaanguna kuyoojana mwanaakwabo mwini Simoni, wamwaambila kuti, Twamujana Mesiya (nkokuti kukupandululwa, Kristo).

⁴² Wakamuleta kuli-Jesu, Jesu wakamuzilikila wakati, Nduwe Simoni mwana a-Jona, uyootegwa Kefasi (nkokuti kukupandululwa, Petro).

⁴³ Nobwakaca wakakanza kwiinka ku-Galilaya, wakajana Filipo. Jesu wakamwaambila kuti, Ndicilila.

⁴⁴ Eno Filipo wakali waku-Betsaida, wamumunzi wabo Andreya a-Petro.

⁴⁵ Filipo wakajana Natanayeli, wamwaambila kuti, Twakamujana oyo ngwaakalemba Musa mumulao, abasinsimi, nguwenya Jesu waku-Nazareta, mwana a-Josefa.

⁴⁶ Natanayeli wakamwaambila kuti, Sena kuli cintu cibotu icikonzya kuzwa mu-Nazareta Filipo wamwaambila kuti, Koboola uzoobone.

⁴⁷ Jesu wakabona Natanayeli uza bweenda, wakamwaamba kuti, Amubone, mu-Israyeli mwinimwini uutakwe luuni.

⁴⁸ Natanayeli wakamwaambila kuti, Ino wandiziba buti? Jesu wakavuwa kuti, Ede, katana kukwiita Filipo, ndakubona ucili kunsi abukuyu.

⁴⁹ Natanayeli wakamuvuwa kuti, Rabi, nduwe Mwana a-Leza, nduwe Mwami wa-Israyeli,

⁵⁰ Jesu wakavuwa wakati kulinguwe, Sena mbwendaamba kuti ndakubona ucili kunsi abukuyu, ncowasyoma na? Uzoobona zimbi zintu zipati iziinda ezi.

⁵¹ Wamwaambila kuti, Ncobeni ndamwaambila kuti, Muyoobona ijulu lyaba bukwazi, abaangelo ba-Leza balatanta akuseluka a-Mwana a-Muntu.