Jobo 1 - Ibbaibele 1963

Jobu ulanyonyoonwa akutepaulwa kuti atame Leza

¹ Kaindi kwakali muntu munyika iitegwa Uzi, izina lyakwe wakali Jobu; wakali muntu uutakwe mulandu, uululeme; wakali kulemeka Leza akweeleba bubi.

² Wakalijisi bana balombe bali musanu ababili abana basimbi botatwe;

³ alimwi wakali ambelele zyakali zyuulu zili musanu azibili, ankamele zyakali zyuulu zyotatwe, acuulu cabasune, anzyazi mbongolo zyakali myaanda yosanwe antoomwe ababeleki abazike banji; nkaambo oyo muntu wakali mupati kwiinda boonse bakali mumanyika aakujwe.

⁴ Bana basankwa bakwe bakali kupobola antoomwe umwi aumwi kababamba bamwi mumalizi; alimwi bakali kutamba bacizi babo botatwe kuti bakalye akunywa ambabo.

⁵ Elyo nocakamana ciindi cakupobola cimwi acimwi, Jobu waka: tuma kuti baboole akusalazigwa, kafuma, kabacitila umwi aumwi cipaizyo cuumpe; nkaambo Jobu wakati, Atene bana bangu balibijide akusowelezya Leza mumyoyo yabo. Lyoonse Jobu wakali kucita boobo.

⁶ Bumwi buzuba baangelo bakeza kulimanala kunembo lya-Jehova, awalo Saatani wakaboola ambabo.

⁷ Jehova wakaamba kuli-Saatani kuti, Wali kuli? Saatani wakavuwa wati, Ndali kuzungazunga koonse koonse, nkenjendeenda munyika.

⁸ Elyo Jehova wakati kuli-Saatani, Sena wakabona kuti taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi?

⁹ Saatani wakavuwa Jehova wati, Taakwe kaambo sena Jobu nkalemekela Leza?

¹⁰ Teewakamuyakilide kabotu, walo abaŋanda bakwe azyoonse nzyajisi? Wakamukupusya mumulimo wakwe, alimwi matanga aakwe avula munyika.

¹¹ Pele, kuti kotambika janza lyako akuguma ncajisi uzookusinga kubusyu bwako!

¹² Elyo Jehova wakamwaambila Saatani wati, Mbubo ndabika zyoonse nzyajisi munguzu zyako; pele utabiki janza kulinguwe mwini. Aboobo Saatani wakazwa kubusyu bwa-Jehova.

¹³ Buzuba bumwi bana balombe abasimbi bakali kukulya akunywa waini muŋanda yamupati wabo,

¹⁴ sikutumwa wakaboola akumwaambila Jobu kuti, Basune bakali kulima, ambongolo zyakali kucela afwiifwi,

¹⁵ Ba-Seba nibakavuumukila akuzitola; bakajaya basimilimo, ndime endike ndayokoka kuti nkwaambile.

¹⁶ Wakacili kwaamba naakasika umwi wati, Lulabo lwakawa kujulu akuumpilila limwi mbelele abeembeli; ndime endike ndafutuka kuti nkwaambile.

¹⁷ Kacaamba, umwi wakaboola wakati, Ba-Kasidi bakalicita nkamu zyotatwe kuti bafumpe nkamele; bakazitola, akujaya babeleki; ndime endike ndasyaala nkwaambile.

¹⁸ Wakacili kucaamba naakeza aumwi wati, Bana balombe abasimbi bako bakali kukulya akunywa waini muŋanda yamupati wabo,

¹⁹ nokakaboola kambizi kakazwa munkanda kakauma zyooko zyone zyaŋanda nkabela yakabawida bana; balifwide, ndime endilike ndafutuka kuti ndikwaambile.

²⁰ Elyo Jobu wakanyamuka, wazapaula cikobela cakwe, wakalinyoola akuwida ansi kakomba cakulibombya, wakati,

²¹ Ndakazwa mwida lyabaama ndili acinswe, ndilajokela mumo nkendi ecinswe. Jehova wakapa, Jehova wanyanga-kalumbwa Jehova!

²² Mulizyoonse ezi Jobu takwaakabija, takwaakakolomena Leza.