Ezula 1 - Ibbaibele 1963

Koresi mbwaakazumizya ba-Juda kupiluka ku-Jerusalemu

¹ Lino mumwaka mutaanzi wabwami bwa-Koresi mwami wa-Persia, kuti lizuzigwe ijwi lya-Jehova ndyaakaamba kumulomo wa-Jeremiya, Jehova wakabusya moyo wa-Koresi mwami wa-Persia, nkabela wakatuma impuwo mubwami bwakwe boonse, alimwi wakalemba mbubonya, wati,

² Mbuboobu mbwaamba Koresi mwami wa-Persia. Zisi zyoonse zyaansi, Jehova Leza wakujulu wazyaaba mumaanza aangu. Alimwi wandilailila kumuyakila iŋanda mu-Jerusalemu mucisi ca-Juda.

³ Lino nguni akati kanu uuli wabantu bakwe? Leza wakwe abe awe. Anyamuke kuya ku-Jerusalemu mucisi ca-Juda, ayake iŋanda ya-Jehova Leza wa-Israyeli. Ngonguwt Leza uukede mu-Jerusalemu.

⁴ Kufumbwa uusyaala mumasena oonse nkwaakali kukala-kala, bantu babusena bwakwe bamugwasye insiliva angolida ambono aŋombe azipo zyamoyo zyakugwasya iŋanda ya-Leza yaku-Jerusalemu.

⁵ Mpoonya awo bapati banzubo zya-Juda azya-Benjamini abapaizi abaLevi bakabuka, boonse Leza mbaakabusya myoyo yabo, kuti baye kukuyaka iŋanda ya-Jehova mu-Jerusalemu.

⁶ Aboonse ibakeengelede bakayumya maanza aabo, babapa zibelesyo zyansiliva azyangolida, ambono aŋombe azintu ziyandisi, kutaamba zipo zyamoyo izyakaletwa.

⁷ Alakwe mwami Koresi wakagwisya zibelesyo zyaŋanda ya-Jehova, nzyaakagwisya Nebukadinezara kuzwa ku-Jerusalemu nzyaakabika muŋanda yamuzimu wakwe,

⁸ Koresi mwami wa-Persia wakazigwisya kujanza lyaMiteridati siziyobwedo, wazibala, wapa Sezibazara silutwe waba-Juda.

⁹ Ngooyu mweelwe wazyo: mitiba yangolida iili makumi otatwe, mitiba yansiliva iili cuulu, intibba zili makumi obile amusanu azine,

¹⁰ inkomeki zyangolida zili makumi otatwe, inkomeki zyansiliva zyamusyobo umbi zili myanda yone akumi, azibelesyo zimwi zili cuulu.

¹¹ Zibelesyo zyoonse, zyangolida azyansiliva, zyakali zyuulu zyosanwe amyanda yone. Ezi zyoonse Sezibazara wakeza azyo naakeza abazike baangulwidwe ibakazwa ku-Babuloni kuya ku-Jerusalemu.