Ciibalusyo 1 - Ibbaibele 1963

Musa mbwaakaibalusya ba-Israyeli makatli aakweendeenda kwabo

¹ Ngaaya majwi aa-Musa ngaakaambila ba-Israyeli boonse mutala lyaJordano munkanda; ku-Araba kulangene a-Sufi, akatikati ka-Parana a-Tofeli, Labani, a-Hazeroti a-Dizahabu.

² Ndweendo lwamazuba aali ikumi abumwi kuzwa ku-Horebu kwiinda kucilundu ca-Seiri kusikila ku-Kadesi-Barinea.

³ Mumwaka wamakumi one, mumwezi wakumi aumwi, mubuzuba butaanzi bwamumwezi, Musa wakaambila bana ba-Israyeli makani oonse Jehova ngaakamulailila aakutola kulimbabo,

⁴ naakamana kunyonyoona Silioni mwami waba-Amori, iwakakede ku-Hesiboni, a-Ogi mwami wa-Basana iwakakede ku-Asitaroti aku-Edrei.

⁵ Mutala lya-Jordano, munyika ya-Moabu, Musa mwaakatalikila kupandulula eyi milao, Wati,

⁶ Jehova Leza wesu wakatwaambila ku-Horebu, wakati, Mwakala ciindi cilamfu kucilundu eci;

⁷ amunyamuke, mulongele kuzilundu zyabaAmori amisyobo iibambene abo mu-Araba, kuzilundu akucisi catulundulundu aku-Negebi akunkomwe yalwizi, nyika yaba-Kanana, a-Lebanoni, kusikila kumulonga mupati, mulonga wa-Firate.

⁸ Amubone! Ndabika nyika kumeso aanu, Amunjile, mwiivube nyika eyo Jehova njaakakonkezya kulibamausowanu, ba-Abrahamu a-Izaka a-Jakobo, kuti abape njiyo, balo alunyungu lwabo.

⁹ Kuciindi eco ndakamwaambila kuti, nsikonzyi kumulela endike.

¹⁰ Jehova Leza wanu wamuvuzya, aboobo sunu muli banji loko mbuli inyenyeezi zyakujulu.

¹¹ Jehova Leza wabamauso wanu amuyungizizye alimwi ziindi zili cuulu, muvule kwiinda sunu, akumupa coolwe mbubonya mbwaakasyomezya.

¹² Njumune buti makataazyo aanu amukuli wankondo zyanu, mebo endike?

¹³ Amusale bantu basongo, bacenjede, bali amaanu, mumisyobo yanu, mbabike kuti babe basilutwe banu.

¹⁴ Mpawo mwakandivwiila kuti, Cintu ncoamba cililuleme kuti tucite.

¹⁵ Aboobo ndakatambula basilutwe bamisyobo yanu, bantu basongo bacenjede, ndakababika kuti babe basilutwe banu, bapati bazyuulu, abapati bamyanda, abapati bankamu zyamakumi osanwe, bapati bamakumi, abasolozi, mumisyobo yenu yoonse.

¹⁶ Lino kuciindi eco nciconya ndakalailila babetesi banu kuti, Amubeteke milandu yababunyina, akukosola kabotu makani aamuntu umwi aumwi amweenzinyina naba mweenzu uukala awe.

¹⁷ Tamweelede kusalaula mukubeteka kwanu; muleelede kuswiilila makani aabantu boonse buyo, nebaba bapati nebaba baniini; alimwi mutayoowi bantu, nkaambo imilimo yakubeteka njiya-Leza. Amakani aamukacila, amwaalete kulindime, nkaswiilile.

¹⁸ Alimwi ndakamulailila kuciindi eco nciconya zintu zyoonse nzemweelede kucita.

¹⁹ Elyo twakanyamuka kuzwa ku-Horebu, twainda akati kankanda impati iiyoosya njemwakabona, kunzila yazilundu zyaba-Amori, mbubonya mbuli Jehova mbwaakatulailila, mane hunwi twakasika ku-Kadesi-Barinea.

²⁰ Lino ndakamwaambila kuti, Mwasika kuzilundu zyaba-Amori, nyika njatupa Jehova Leza wesu.

²¹ Amubone! Jehova Leza wanu wabika nyika kumeso aanu. Kamuya, mukaivube, mbubonya mbuli Jehova Leza wabamauso mbwaakamwaambila. Mutayoowi nekuba kukankama.

²² Mpawo mwakasika nyoonse akwaamba kuti, Atutaangune kutuma bantu, kuti batutwelele nyika akutuletela makani aanzila njitutola amakani aaminzi njetuyoojana.

²³ Lino ayo makani-akandibotela, nkabela ndakasala bantu bali ikumi ababili akati kanu, nkokuti muntu omwe kumusyobo umwi aumwi,

²⁴ nkabela bakanyamuka, baya kuzilundu, basika kukalonga kaEsikolo batwela nkuko.

²⁵ Elyo bakabweza imwi micelo yanyika mumaanza aabo akwiileta kulindiswe. Nkabela bakatuletela majwi aakuti, Nimbotu nyika njatupa Jehova Leza wesu.

²⁶ Nekubaboobo mwakakaka kwiinka, Mwakapapila malailile aa-Jehova Leza wanu.

²⁷ Mwakali kunyontauka muzilao zyanu cakwaamba kuti, Jehova watusula: nciceeco ncaakatugwisizya munyika ya-Egepita, kuti atwaabe mumaanza aaba-Amori akutunyonyoona.

²⁸ Ino tulaya kuli? Bakwesu bakompaamya myoyo yesu cakwaamba kuti, Bantu mbapati, alimwi mbalamfu kwiinda ndiswe. Minzi mipati, alimwi ilijisi mabaya aasika kujulu. Abalo bana ba-Anaki twababona nkuko.

²⁹ Mpawo ndakamwaa-mbila kuti, Mutakankami, nekuba kubayoowa.

³⁰ Jehova Leza wesu ulamuzulwida, ulamulwida, mbubonya mbwaakamucitila ku-Egepita kumeso aanu,

³¹ ambwaakacita munkanda, nkaambo mulibwene Jehova mbwaakamubbede mbubonya mbuli muntu mbwabbala mwana wakwe, munzila yoonse njimwakaleta mane mwakasika okuno.

³² Pele nekuba kuti ndakaamba majwi aya, mwakakaka kusyoma Jehova Leza wanu,

³³ iwakali kumuzulwida munzila yoonse kuyoomuyandawida busena bwakuyaka zilao zyanu, iwakali kweenda mumulilo ciindi camasiku, kuti amutondezye inzila njimweelede kutola, amumayoba ciindi casikati.

³⁴ Lino Jehova naakamvwa majwi aanu, wakakalala, wakakonkezya kuti,

³⁵ Ncobeni takukooyooba muntu naba omwe akati kabantu bazyalani eli ibbi, uuyoobona nyika imbotu njindakakonkezya kupa bamawisi,

³⁶ cita Kalebe mwana wa-Jefune luzutu; walo uyooibona, nkabela njoomupa nyika eyo njaakalyataula, abana bakwe, nkaambo watobela Jehova camoyo woonse.

³⁷ Ambebo, Jehova wakandikalalila nkaambo kanu. Wakati, Ayebo tokooyoonjila mulinjiyo,

³⁸ pele Joshua mwana wa-Nuni uukubelekela nguuyoonjila; komuyumya, nkaambo ngonguwe uuyookonya ba-Israyeli nyika.

³⁹ Abana banu mbomwakaamba kuti balaba cisaalo, batanaziba kwaandaanya bubotu abubi, mbembabo bayoonjila, nkabela njoobapanyika kuti baivube.

⁴⁰ Pele ciindi ecino amupiluke, muye kunkanda kunzila yaku-Lwizi Lusalala.

⁴¹ Mpawo mwakandivwiila kuti: Twabisizya Jehova; tulaya kuyoolwa mbubonya mbuli Jehova Leza wesu mbwaakatulailila. Nkabela mwakasama umwi aumwi zilwisyo zyakwe akusoleka kwiinka kunyika yazilundulundu.

⁴² Pele Jehova wakandaambila kuti, Kobaambila kuti, Mutainki kuyoolwa pe, nkaambo nsili akati kanu, kuti mutazundwi kulibasinkondonyoko.

⁴³ Elyo ndakamwaambila obo, nekubaboobo mwakakaka kuswiilila. Mwakasampaula majwi aa-Jehova, mwalisumpula, mwainka kuzihmdulundu.

⁴⁴ Mpawo ba-Amori ibakakede omo muzilundulundu bakeza kuzoomulwisya, nkabela bakamutanda mbubonya mbuzicita inzuki, akumukoma mu-Seiri mane kusikila ku-Horima.

⁴⁵ Elyo mwakapiluka akulila kubusyu bwa-Jehova, pele Jehova takwakaswiilila kulila kwanu nikuba kucenjeka matwi aakwe.

⁴⁶ Aboobo mwakalikede ku-Kadesi mazuba manji, mbubonya mbwaakabede mazuba aanu aakukala nkuko.