Baefeso 1 - Ibbaibele 1963

¹ Ndime Paulo, nendakasungulwa abukanze bwa-Leza kuba apostolo wa-­Kristo Jesu. Ndamujuzya nobasalali bali ku-Efeso aboonse bazumini bamuli-Kristo Jesu.

² Amube aluzyalo aluumuno luzwa kwa-Leza Taateesu aku-Mwami wesu Jesu Kristo.

Bumunuki bwesu bwamuli-Kristo

³ Alumbwe Leza Wisi wa-Mwami wesu Jesu Kristo, iwakatulongetya azilongezyo zyoonse zyamuuya munasena aakujulu mutukede muli-Kristo,

⁴ mbubonya mbuli mbwaakatusala mulinguwe kuzwa kumatalikilo aanyika, kuti tusalale, tutabi akampenda nikaba komwe kumeso aakwe,

⁵ Nkaambo wakatuyandisya, aboobo wakatukanzila kuti tube bana bakwe mwini kujanza lya-Jesu Kristo, nkabela ncobeni obu bukanze mbwaakalita

⁶ bwacitya kuti bulemekwe loko bulemu bwaluzyalo lwakwe ndwaakatufwida mu-Muyandwi wakwe.

⁷ Mulinguwe mumonya mutujene lunununo nkaambo kabulowa bwakwe, lulekelelo lwamilandu yesu, mbubonya mbuli buvubi bwaluzyalo lwakwe,

⁸ ndwaakatuvuzizya maanu oonse amancenjela,

⁹ akutucita kuti tuzibe makani aasisidwe aabukanze bwamoyo wakwe. Lulito lwakwe ndwaakalita kalekale mulinguwe ndoolu.

¹⁰ Wakabamba kuti, casika buyo ciindi ceelede, mitwe yazintu zyoonse, niziba zintu zyamujulu niziba zintu zyaansi, ibikwe antoomwe muli-Kristo,

¹¹ Muli-Kristo nguwenya mutupedwe lukono lwesu, mbubonya mbutwaakanzilwa mukulita kwayooyo uubamba makani oonse mbuli miyeeyo yamoyo wakwe,

¹² kuti tube lutembauzyo lwabulemu bwakwe, iswe nitwakasaanguna kuzuminina Kristo.

¹³ Anywebo mwakaswiilila ijwi lyalusinizyo, Makani Mabotu aalufutuko lwanu, elyo nimwakazuminina nguwe mwakabikilwa citondezyo, nkukuti Muuya Uusalala ngutwakasyomezegwa kale.

¹⁴ Oyu Muuya nguwenya ncecitondezyo calukono lwesu ncitwapegwa sunu mane do kusikila kuciindi ncituzoolya lubono loonse akutembaula bulemu bwakwe.

Paulo ulalumba Leza

¹⁵ Nkaambo kaako mebo, mbuli mbemvwide lusyomo lwanu ndumujisi muli-Jesu Mwami, aluyando lwanu ndumuyandisya basalali boonse,

¹⁶ nsileki kumulumbila lyoonse akumwaambilizya muzikombyo zyangu,

¹⁷ Ndakomba kuti Leza wa-Mwami wesu Jesu Kristo, Visi wabulemu, amupe muuya wamaanu awaciyubunuzyo, mube aluzibo lwanguwe,

¹⁸ kuti meso aamyoyo yanu abonesye, mumvwisye mbuzibede zintu nzimulangila nzyaamwiitila, ambwaabede manjdenjele malemu aalukono ndwaatupa akati kabasalali,

¹⁹ ambuzibede inguzu zyakwe impati loko ziinda nzyajisi kulindiswe, swebo nituzumina. Ezi inguzu zilabeleka muciyanza cigambya loko,

²⁰ nzizyonya zyakalibonya muli-Jesu Kristo kuciindi eco ncaakamubusya kuzwa kubafu akumubika kujanza lyakwe lyalulyo mumyeenya yamujulu,

²¹ kuti ainde loko boonse beendelezi abapati abasinguzu abami, akulemekwa kwiinda mazina oonse aambwa, nikuba kuciindi ecino nikuba kuciindi ciciza,

²² Wakabika zintu zyoonse kunsi lyamaulu aakwe, alimwi wakamubika kuti abe simutwe wazintu zyoonse kumbungano.

²³ Imbunganongano njiyonya ngumubili wakwe, mbobuzule bwayooyo uuzula zintu zyoonse.