Babetesi 1 - Ibbaibele 1963

Ba-Israyeli mbubakazunda-zunda nyika ya-Kanana

¹ Lino Joshua naakamana kufwa, bana ba-Israyeli bakabuzya kuli-Jehova kuti, Ino nguni uuelede kutusololela kuya kuyoolwana aba-Kanana?

² Nkabela Jehova wakati, Juda nguelede kumusololela, Ncobeni nyika ndaiaba mumaanza aakwe.

³ Elyo Juda wukaambila Simeoni mukulana wakwe kuti, Atweende ayebo kucaabilo cangu, tukalwisye ba-Kanana, lino ambebo nzooinka ayebo kucaabilo cako, Nkabela Simeoni wakaya awe.

⁴ Lino Juda naakainka, Jehova wakaaba ba-Kanana aba-Perizi mumaanza aabo, Bakajaya akati kabo bantu bali zyuulu zili ikumi mu-Bezeki.

⁵ Nkabela mumonya mu-Bezeki bakajana Adoni-bezeki, bakalwana awe, akuzunda ba-Kanana aba-Perizi.

⁶ Lino Adoni-bezeki wakacija, pele bakamutobela akuyoomujata, nkabela bakamukosola zyaala zyamaulu,

⁷ Elyo Adoni-bezeki wakati, Bami bali makumi aali musanu aabili bakoswedwe zyaala azyaala zyamaulu bakali kubwezelela bufwefwelenga munsi atafule lyangu, Mbuli mbundakacita, Leza wandicitila mbubonya, Lino bakamuleta ku-Jerusalemu, nkuko nkwakafwida.

⁸ Nkabda bana ba-Juda bakalwisya munzi wa-Jerusalemu, bakaujata akuusaazya ipanga, alimwi munzi bakautenta mulilo.

⁹ Lino cibe ciindi bana ba-Juda bakaya kuyoolwisya ba-Kanana ibakakede muzilundu amucimpayuma cakumusanza amutulundulundu,

¹⁰ Alimwi ba-Juda bakalwana aba-Kanana ibakakede mu-Hebroni, (izina lya-Hebroni lyakutanguna kalili Kiriyati-ariba), nkabela bakazunda Sesai a-Ahimani a-Talimai.

¹¹ Kuzwa oko bakaya kuyoolwana abakakede mu-Dibiri, (izina lya-Dibiri lyakutaa-nguna kalili Kiriyati-Seferi),

¹² Nkabela Kalebe wakati, Kufumbwa muntu uulwisya Kiriati-Seferi akuuzunda, njoomupa mwanaangu Akisa, amukwate.

¹³ Lino Otiniyeli mwana wa-Kenazi, mwanike wa-Kalebe, wakauzunda, elyo bakamupa Akisa mwanaakwe kuti amukwate,

¹⁴ Nkabela naakeza kuli-nguwe, wakamukombelezya kuti akumbile muunda kuliwisi. Lino naakaseluka ambongolo, Kalebe wakamubuzya kuti, Uyandanzi?

¹⁵ Wakati, Kondipa caabilo. Wandipa cimpayuma cakumusanza, kondipa atusensa twamaanzi. Elyo Kalebe wakamupa tusensa twakunselelo.

¹⁶ Alimwi bana ba-Keni, mulamu wa-Musa, bakapola kuzwa kumunzi watukunka antoomwe abana ba-Juda, kuya kunkanda ya-Juda iili kumusanza wa-Aradi, elyo kuzwa nkuko bakaakukala aba-Amaleki.

¹⁷ Lino Juda wakaya a-Simeoni mukulana wakwe kuyoozunda ba-Kanana bakakede mu-Zefati, nkabela bakasaala munzi, azina lyawo bakauulika Horima.

¹⁸ Alimwi Juda wakazunda Gaza acisi cawo, a-Asikeloni acisi cawo, a-Ekroni acisi cawo.

¹⁹ Jehova kali a-Juda, aboobo wakasaala nyika yazilundu, pele wakakacilwa kusaala bantu bamumpata, nkaambo kabajisi inkalaki yabutale,

²⁰ Nkabela Kalebe bakamupa Hebroni, mbubonya Musa mbwaakalailila, elyo wakatanda kuzwa nkuko bana botatwe ba-Anaki.

²¹ Abana ba-Benjamini teebakatanda ba-Jebusi ibakakede mu-Jerusalemu. Ba-Jebusi bacikede antoomwe abana ba-Benjamini mu-Jerusalemu mane kusikila sunu,

²² Alimwi bana ba-Josefa bakainka kuyoolwisya Beteli, nkabela Jehova kali abo,

²³ Lino bana ba-Josefa nibakatuma kuyoolanga-langa Beteli (ngonguwe munzi iwakataanguna kutegwa Luzi),

²⁴ balangizi bakabona muntu uuli mukuzwa mumunzi, elyo bakamwaambila kuti, Ututondezye manjililo aamunzi, lino tulakufwida luzyalo.

²⁵ Nkabela wakabatondezya manjililo aamunzi, elyo bakasaala munzi amulomo wapanga, pele oyo muntu abasiŋanda bakwe bakabalobosya.

²⁶ Lino oyo muntu wakalongela kunyika yaba-Hiti, waakuyaka munzi nkuko, wakauulika izina lya-Luzi, ndendilyo izina lyawo asunu.

²⁷ Alimwi ba-Manase teebakatanda bantu ibakakede mu-Betiseani atunzuunzi twawo, nuuba Taanaki atunzuunzi twawo, nuuba Dori atunzuunzi twawo, nuuba Ibleamu atunzuunzi twawo, nuuba Megido atunzuunzi twawo, pele ba-Kanana bakakakatila kukala omo munyika.

²⁸ Nekubaboobo ba-Israyeli nibakajana inguzu, bakatelesya ba-Kanana, Kutanda teebakabatandilila pe.

²⁹ Alimwi ba-Efraimu teebakatanda ba-Kanana ibakakede mu-Gezeri, pele ba-Kanana bakacilikede abo omo mu-Gezeri.

³⁰ Alimwi ba-Zebuloni teebakatanda bantu ibakakede mu-Kitroni nomuba mu-Nahaloli, pele ba-Kanana bakacilikede abo akutelesegwa.

³¹ Alimwi ba-Aseri teebakatanda bantu ibakakede mu-Ake, nimuba muZidoni, nimuba mu-Akalabu a-Akizibi a-Heliba a-Afeki a-Rehobo,

³² pele ba-Aseri bakalikede akati kaba-Kanana bamunyika eyo. Teebakabatandilila pe.

³³ Alimwi ba-Nafitali teebakatanda bantu baku-Beti-semesi abaku-Betianati. Bakalikede akati kaba-Kanana bamunyika, nekubaboobo bantu baku-Beti-semesi abaku-Beti-anati bakatelesegwa.

³⁴ Nkabela ba-Amori bakatonta bana ba-Dani muzilundulundu. Tcebakabazumizya kuseluka mumumpata pe.

³⁵ Ba-Amori bakakakatila kukala mucilundu ca-Heresi amu-Aijaloni amu-Saalibimu. Nekubaboobo maanza aaluzubo lwa-Josefa akabalemena mane bakatelesegwa.

³⁶ Lino mugaano waba-Amori kuuli kuzwa kumatantilo aa-Akrabimu, kuzwa ku-Sela akuya kujulu.