2 Timoti 1 - Ibbaibele 1963

¹ Ndime Paulo, nendakasungulwa kubukanze bwa-Leza kuba apostolo wa-Kristo Jesu wakukambauka makani aabuumi mbotusyomezegwa buli muli-Kristo Jesu,

² Ndakujuzya Timoteo, mwanaangu ngwenjanda. Ube aluzyalo alweetelelo aluumuno kuzwa kuli-Leza Taateesu a-Kristo Jesu Mwami wesu.

Paulo ulalumbila Timoteo. Ulamukombelezya kujatisya lusyomo lwakwe

³ Ndalumba Leza wabamatata, ngwenkomba amoyo uusalala, kuti nsileki kukwaambilizya lyoonse muzikombyo zyangu isikati amasiku,

⁴ Kufumbwa nindayeeya misozi yako, moyo wangu ulasukama kukubona, kuti nkazule lukondo,

⁵ nkaambo nsikonzyi kuluba lusyomo lwako lwinilwini. Olo lusyomo lwakasaanguna kukala muli-Loidi banyookulu bako amuliEunike banyoko, nkabela moyo wangu ulisinizizye kuti moluli amulinduwe mbubonya.

⁶ Nkakaambo ako ncendakuyeezya kuti uleelede kubukulusya eco caabilo caluzyalo lwa-Leza lukukalide mukati, ncowakatambula kuciindi ncendakakubika maanza.

⁷ Nkaambo Leza takatupede muuya wabukandu, pe, wakatupa muuya wanguzu awakuyandana awakulibamba.

⁸ Utafwi bweeme kubumboni bwa-Mwami wesu, nokuba kulindime ndemwaange wakwe, pele kogamine kuba mupenzima wamu-Makani Mabotu kunguzu zya-Leza,

⁹ uwakatufutula akutwiita akwiitwa kusalala. Takweensi kwaamba kuti twakaitwa nkaambo kamilimo njotwakacita, pe, twakaitwa nkaambo kabukanze bwakwe mwini akaambo kaluzyalo lwakwe. Olo luzyalo twakalupegwa kalekale muli-Kristo Jesu,

¹⁰ pele sunu lwalibonya mukupompa kwa-Mufutuli wesu Krisro Jesu, nguwenya wakazoolobya lufu akuyubulula buumi butafwiki kunguzu zya-Makani Mabotu.

¹¹ Ngaonya makani ngendakabikilwa bukambausi abuapostolo abwiiyi.

¹² Ncencico eco neempengela bobuya, nekubaboobo nsyuusi insoni, pe, nkaambo ndilimuzi oyo ngwensyoma, nkabela moyo wangu ulisinizizye kuti walo ulakonzya kuyobola ncendabika mumaanza aakwe mane kusikila kubuzuba obo.

¹³ Kojatisya majwi menimeni oonse ngowakamvwa kulindime, alusyomo akuyandana kuli muli-Kristo Jesu.

¹⁴ Cintu eco cibotu ncowakapegwa, kocibamba kabotu kunguzu zya-Muuya Uusalala uutukalilide mukati.

Makani aa-Fugelo a-Hermogene a-Onesiforo

¹⁵ Ulimvwide kale kuti boonse bamu-Asiya bakandisia, bakainka. Bamwi babaabo bakandisia mba-Fugelo a-Hermogene.

¹⁶ Mwami abafwide luzyalo bana-Onesiforo, nkaambo kanjikanji wandibukulusizya moyo, nkabela taakwe anaakali kuusa insoni kunsimbi zyangu nzendakaangidwe,

¹⁷ pele naakali mu-Roma, wakasungwaala kundiyandaula, limwi mane wandijana.

¹⁸ (Mwami amujanye coolwe ca-Mwami kubuzuba obo). Ayalo milimo yoonse njaakandibelekela ku-Efese, ulizi kale yebo omwini.