1 Timoti 1 - Ibbaibele 1963

¹ Ndime Paulo, apostolo wa-Kristo Jesu, nendakabikwa a-Leza muvuni wesu a-Kristo Jesu ngotulangila,

² Ndakujuzya Timoteo, mwanaangu mwinimwini wamulusyomo, Ube aluzyalo alweetelelo aluumuno, zizwa kuli-Leza Taateesu akuli-Kristo Jesu Mwami wesu.

Makani aabaiyi baiisya bumbi. Mulao mbuuelede kubelesegwa

³ Nendakali mulweendo lwangu lwakuya ku-Makedoniya, ndakakukumbila kuti ukale mu-Efeso, kuti ubalesye abo bafundisya bumbi,

⁴ kuti bataswiilili zyamankwangwaalizya nituba tunsiyansiya twamazyalani-zyalani, nkaambo aya makani alaleta inkazyanyo buyo, taakonzyi kuyaka lusyomo lwesu lwakusyoma Leza, Lino asunu ndakulailila mbubonya.

⁵ Anu calo cintu ciyandwa nduyandano luzwa mumoyo uusalala amukweezeezya kubotu amulusyomo lwinilwini.

⁶ Nokuboobo bamwi bazileka zintu ezi zinizini, bagama zimbi zyabuyo,

⁷ Balayandisya kuba baiyi bamulao, anu tabacimvwi ancobaamba neciba ceeco ncobasinizya, pe.

⁸ Eno swebo tulizi kuti Mulao mubotu kumuntu uubamba kabotu,

⁹ kufumbwa anooyeeya kuti mulao tuucitilwi muntu uuluzi, ulacitilwa basigama abantu bapilingene, basikasampusampu abasizibi, basofweede abantu bataluzi, basikujaya bamawisi abamanyina, abajaya bantu,

¹⁰ basibwaamu abasikoona baaluminyina, basimuvupu ababeji abasikukonka cakubeja, abaabo bacita zintu zimwi zili boobo zitayanzene alwiisyo lubotu,

¹¹ mbubonya mbuli Makani Mabotu aabulemu bwa-Leza uuli acoolwe, ngendakasyomezezegwa mebo.

Paulo mbwaakasanduka akuba apostolo

¹² Ndamulumba Kristo Jesu Mwami wesu, uwakandipa inguzu, nkaambo wakandisyoma kuti ndilasyomeka, ncaakandibikila munulimo wakwe.

¹³ Kuciindi cakamana ndakali sikasankusanku asikakomokomo asikazundozundo, nekuboobo ndakafwidwa luzyalo nkaambo teendakazi ncendakali kucita cakutazumina.

¹⁴ Eno luzyalo lwa-Mwami wesu lwakavula nkavulila, antoomwe alusyomo aluyandano lwamuli-Kristo Jesu.

¹⁵ Ijwi linilini litambulika loko ndeeli lyakuti, Kristo Jesu wakaboola ansi ano kuzoofutula bacitazibi. Lino mebo ndi sizibi kwiinda boonse,

¹⁶ nekuboobo ndakafwidwa luzyalo kuti Jesu Kristo abonye busicamba bwakwe boonse mulindime, kuti cibe cileezyo kulibaabo boonse baciza kukuzoomusyoma akujana buumi butamani.

¹⁷ Eno ku-Mwami mupati uutamani walyoonse, uutabonwa, Leza uuiide alike, akube bulemu akwaalaala lyoonse alyoonse kukabe kutamani. Ameni.

Paulo ulacenjezya Timoteo

¹⁸ Ndakubikila milazyo eyi, mwanaangu Timoteo, mbubonya mbuli majwi aabasinsimi ngobakakwaambilide, kuti kulingao uyasane lumamba lubotu,

¹⁹ Kojatisya lusyomo ameezeezyo mabotu, ngobayumbila ambali bamwi, lino basweeka kulusyomo mbubonya mbuli bwaato ubwaloba.

²⁰ Bamwi babaabo mbaaba, ba-Humenayo a-Alesandro, mbendakaaba kuli-Saatani, kuti baiye kutasampaula limbi Leza.