HIBRU 1 - A LEO KOKONA NOI GOD A LEO HARIKIANA KARAGWA

I God u lalahi i Natuna mo kwaha maikita

¹ Tuai, lo hukao rusa hinea rau vano ba, i God u tuku kwaha mai ratubuda vakarusa lalahi na tangaloi* duruduruki maira lo hala mataroi.

² Vae lo taro hika hinea a varamana u garagarani kwara ne rovo, i God u lalahi Natuna mo kwaha maikita. A Natu hi, i God mo lalahia mo tau na kinau savia lo varamana maia lolo taetae. Vake i God u mataia ba kwara vae lo taro hinea a varamana ne rovo savi na kinau lo varamana rana kwareki a nona.

³ Aia u vosangi na nunu na hahaviada noi God. Aia a nunu i God bakotoki hinea u vosangi na bohianana savia. U kwiribibi na varamana doluaki mana taetae doluaki ramo eno tabetabeki kina leona hinea a huirana luna. Mo vai na tangaloi ramo ngwasara tina noga hatiana, vunu mo vano mo hugu lolo taetae lo matuai God hinea u hago huirana savia.

I Natu i God u lakua karakara sileti na kaihora lolo taetae

⁴ I God u tabe hakeki i Natuna aia aulu karakara sileti na kaihora lolo taetae, hoki na hina hinea i God u betea lakwae ba u lakua sileti na hinaga.

⁵ I God he viti te vohoki kwara te lakwa na nona kaihora lolo taetae te katukwale kwara, “I nigo i Natugu. Hika karagwa nu kwareki i Tamamu bakotoki.” Vake i God he viti huri na nona kaihora tea, kwara te katukwale lolo taetae kwara “I nau na kwareki Tamana, aia ne kwareki Natugu.”

⁶ Mo garagarani kwara i God ne hora i Natuna hinea mo vora tomua halaradu vanamai tilo varamana, mo viti na leo hika kwara, “Savi na kaihora noi God lolo taetae rana sovi hivo vovohia kina domi mavakiana.”

⁷ Vae i God u viti huri na kaihora lolo taetae kwara, “Nu vai na nogu kaihora lolo taetae rau hoki na langi. Nu vaira hinea rau boloki nogu rau hoki na kabu mo toko luamea.”

⁸ Vae lolona mo kwaha mai Natuna mo viti kwara, “God. I nigo a Hugwe Lakua, vae kona hugwe koro na tangaloi vaki tuai a gwereki tikei. Ku hugwe koro na nomu tangaloi lo hala bakoto.

⁹ Ku lagwa mana doridori bakoto, ku bemu kina hatiki. Vae huri hi, i nau a nomu God nu vuraeko, nomo mataiko, vake nu vaiko komo rongo karea, huri nu tabe hakekinigo karakara sileti rabuluimu.”

¹⁰ Vunu i God mo viti vake kwara, “Hugwe*. Lo tinatinakakiki i nigo ku tau na varamana, vake ku kihi na taetae kina kabamu.

¹¹ A kinau aira vano hi vae rana va titikeiki, vae i nigo ku toka. A kinau vano hi savia vae rana va hati hoki na lugwa ngwanika,

¹² vae te taroki i nigo konari lulu tabetabekinira kona taura, hoki na tangaloi mo teri kakavuna mo lulu tabetabekinia. Konari kwanira hoki na tangaloi mo kwaniki na lugwana. Vae i nigo kwehi tigwaravu, kohe bohi tea, vake a mamaurianamu nehe rovo lai tea vohoki.”

¹³ Vae i God he viti te vohoki lakwa na nona kaihora kwara te katukwale lolo taetae kwara, “Ko hugu hikeni lo matuagu, ko mabu, tarisaki hi na vai na nomu tavaluivuro rana hugu tavutimu, rana kwareki a nomu tangaloi boloki vuroki.”

¹⁴ A kaihora lolo taetae aira a tanungwe kehekeheki, rau boloki noi God, mo toko horara laliki kwara rana hago mana tangaloi aira hinea vae ne vakahikinira.